ថ្មីៗនេះក្រុមហ៊ុន Apple បានប្រកាសផ្លូវការណ៍ស្តីពីការជួលអតិតបុគ្គលិកដែលជាប្រធានផ្នែកជាន់ខ្ពស់ផ្នែកវិស្វកម្មរថយន្តអគ្គិសនីរបស់ក្រុមហ៊ុន BMW អោយជួយជ្រំជ្រែងជម្រុញដល់ការអនុវត្តន៍គម្រោងផលិតរថយន្តអគ្គិសនីរបស់ខ្លួនអោយសម្រេចទៅបានតាមការគ្រោងទុក។
អតិតបុគ្គលិកជាន់ខ្ពស់របស់ក្រុមហ៊ុន BMW លោក Ulrich Kranz ដែលបច្ចុប្បន្ន បាននឹងកំពុងបម្រើការជាប្រធានផ្នែកជាន់ខ្ពស់ក្នុងគម្រោងផលិតរថយន្តអគ្គិសនីរបស់ក្រុមហ៊ុន Canoo Inch នឹងត្រូវចាប់ដៃសហការគ្នាជាមួយលោក Doug Field ដែលជាអតិតប្រធានផ្នែកដឹកនាំការផលិត និងផ្នែកទីផ្សាររថយន្តអគ្គិសនីម៉ាក Tesla Model 3 ហើយពូកលោកក៏នឹងសហការជាមួយនឹងក្រុមហ៊ុនផលិតរថយន្តដែលជាដៃគូសហការរបស់ Apple មួយចំនួនទៀត ដើម្បីជម្រុញអោយគម្រោងការផលិតរថយន្តអគ្គិសនីរបស់ Apple ដំណើរការទៅបានរលូន និងសម្រេចតាមគោលដៅដែលមានគ្រោងទុក។
ក្រុមហ៊ុនផលិតទូរស័ព្ទម៉ាក iPhone ដែលមានកេរ្តិ៍ឈ្មោះបោះសំឡេងគ្មានថ្ងៃថមថយរបស់អាមេរិកមួយនេះ បានប្រកាសពីគម្រោងហកចូលប្រឡូកក្នុងវិស័យឧស្សាហកម្មរថយន្តឈ្មោះថា Titan Project តាំងពីឆ្នាំ 2014 មកម៉្លេះ។ ប៉ុន្តែ Apple បានត្រឹមតែអភិវឌ្ឍន៍កម្មវិធីសម្រាប់ប្រើនៅលើរថយន្តតែប៉ុណ្ណោះដូចជា Apple CarPlay និង Apple Self-Driving ជាដើម។ ដោយឡែកកាលពីកំឡុងខែធ្នូចុងឆ្នាំ 2020 ក្រុមហ៊ុន Apple បានប្រកាសថា ខ្លួននឹងធ្វើអោយសម្រេចបាននូវការផលិតរថយន្តអគ្គិសនីដែលបំពាក់នូវបច្ចេកវិទ្យា Apple Self-Driving នៅឆ្នាំ 2024 ហើយគ្រោងនឹងចេញលក់លើទីផ្សារផ្លូវការណ៍យ៉ាងយូរបំផុតនៅឆ្នាំ 2027។
ទោះជាយ៉ាងណាមកទល់នឹងពេលនេះ គេមិនទាន់ដឹងទេថា Apple គឺអ្នកផលិតរថយន្តដោយខ្លួនឯងផ្ទាល់ ឬក៏ជួលក្រុមហ៊ុនផលិតរថយន្តផ្សេងអោយផលិតរថយន្តអោយខ្លួន ព្រោះមួយរយះពេលកន្លងមកមានបណ្តាព៌ត័មានលេចលឺហាក់ច្បាស់ការណ៍ជាច្រើនបានចុះផ្សាយថា Apple បានជូបពិភាក្សាជាមួយក្រុមហ៊ុនផលិតរថយន្ត Hyundai Moto Company របស់កូរ៉េខាងត្បូង ក៏ដូចជាក្រុមហ៊ុនផលិតអាគុយអគ្គិសនីមួយចំនួនទៀតអោយផលិត និងផ្គត់ផ្គង់អោយខ្លួន។ បើពិតដូច្នោះមែន គឺមិនខុសអីពីទូរស័ព្ទ iPhone និងឧបករណ៍ iOS មួយចំនួនទៀតនោះទេ ដែលត្រូវបានផលិតដោយក្រុមហ៊ុនចិនឈ្មោះថា Foxconn ដោយ Apple គ្រាន់តែអភិវឌ្ឍន៍ Software សម្រាប់ដាក់បញ្ចូលក្នុងឧបករណ៍ទាំងនោះប៉ុណ្ណោះ៕