LG Electronics ដែលជាក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូង បានបិទនូវអាជីវកម្មស្មាតហ្វូនរបស់ខ្លួន ហើយពេលនេះ ក្រុមហ៊ុននេះ ក៏មានគោលដៅថ្មីនៅក្នុងការបង្កើនទៅលើការផលិតរថយន្តអគ្គិសនីវិញផងដែរ។ នៅចុងខែកក្កដានេះ ក្រុមហ៊ុន LG នឹងបិទនូវអាជីវកម្មស្មាតហ្វូនរបស់ខ្លួនទាំងស្រុង និងផ្តោតទៅលើអាជីវកម្មនៃរថយន្តអគ្គិសនីវិញ។
នៅក្នុងខែដដែលនេះ ក្រុមហ៊ុន LG នឹងចាប់ផ្តើមងាកទៅផ្តោតនៅលើប្រព័ន្ធរថយន្តអគ្គិសនីវិញ។
ក្រុមហ៊ុន Magna International របស់ប្រទេសកាណាដា គឺជាក្រុមហ៊ុនមួយដែលនាំមុខនៅក្នុងការផ្គត់ផ្គង់នៃសភាសភាគសម្រាប់រថយន្ត ហើយក្រុមហ៊ុននេះ នឹងទិញនូវភាគហ៊ុនចំនួន 49% នៅក្នុងការបណ្តាក់ទុនរួមគ្នានេះ។ ការបណ្តាក់ទុនរួមគ្នានេះនឹងបង្កើតជាក្រុមហ៊ុន LG Magna e-Powertrain ដែលស្ថិតនៅក្នុងទីក្រុងកំពុងផែ Incheon។ ក្រុមហ៊ុននេះ ក៏បានត្រៀមក្នុងការបង្កើតទីតាំងនៅក្នុងទីក្រុង Michigan សហរដ្ឋអាមេរិក និងទីក្រុង Nanjing នៅក្នុងប្រទេសចិនដែលមានទីផ្សារខ្លាំងទៅលើរថយន្តអគ្គិសនីនេះ។
គួរបញ្ជាក់ផងដែរថា អតិថិជនសំខាន់របស់ក្រុមហ៊ុន Magna នេះ គឺមានក្រុមហ៊ុនធំៗជាច្រើនដូចជា General Motors, BMW និង Ford Motor ជាដើម។ នៅក្នុងកិច្ចសហការជាមួយនឹងក្រុមហ៊ុន Magna នេះ ក្រុមហ៊ុន LG នឹងមានសក្តានុពលយ៉ាងខ្លាំងក្លានៅក្នុងការផ្គត់ផ្គង់សម្រាប់ក្រុមហ៊ុនផលិតរថយន្តធំៗជាច្រើនទៀតនៅលើពិភពលោក៕
