ថ្មីៗនេះ បន្ទាប់ពីបានបើកអោយដំណើរការទទួលអតិថិជន ដែលចូលចិត្តកម្សាន្ត ជាមួយរថយន្តប្រណាំងប្រភេទ Go-Kart មួយរយៈពេលខ្លី ឃើញថា Go-Kart លើទីលាន Yamamoto Circuit គឺបានធ្វើអោយប្រជាជនជាច្រើន បង្ហាញការអារម្មណ៍យ៉ាងខ្លាំង ចំពោះវត្តមាននៃអាជីវកម្មមួយនេះ ។ ទីលានជិះកូនឡាន Go-Kart លើទីលាន Yamamoto Circuit នៅតំបន់កសិទេសចរណ៍ ម៉ុងឬទ្ធី សែនជ័យ បានកំពុងបើកទ្វារស្វាគមន៍ភ្ញៀវទេសចរ ចូលកម្សាន្តយ៉ាងមនោរម្យ និងកំពុងមានអ្នកទៅលេងកាន់តែច្រើនឡើង រៀងរាល់ថ្ងៃ។
សម្រាប់តម្លៃសំបុត្រនៃការចូលលេងកូនឡាន Go-Kart នេះ ត្រូវបានកំណត់តាមប្រភេទ និងជម្រើសដែលភ្ញៀវចង់បាន។ ចំពោះការចូលលេងដំបូង គឺគេកំណត់ល្បឿនរត់ ប្រមាញ 30 km/hជុំបន្ទាប់ អាចបើកល្បឿនដល់ 70 km/h ចំនួន 5 ជុំ វគ្គនេះ តម្លៃ 20$/ម្នាក់។ បន្ទាប់ពីលេងវគ្គនេះហើយ បើភ្ញៀវនៅតែចង់បន្តភាពសប្បាយរីករាយលើទីលាន Yamamoto Circuit អាចបន្តវគ្គល្បឿនលឿនមួយកម្រិតទៀត ដោយអាចលេងល្បឿនបានដល់ 80 km/h ចំនួន 5 ជុំ ដូចគ្នា ក្នុងតម្លៃ 18$ ។ ដោយឡែក សម្រាប់សំបុត្រចូលទស្សនា ដោយមិនបើកឡាន Go-Kart គឺថ្លៃ 1ម៉ឺនរៀលតែប៉ុណ្ណោះ។
បច្ចុប្បន្ន Yamamoto Circuit គឺជាទីលានប្រណាំង Go-Kart ធំជាងគេនៅក្នុងប្រទេសកម្ពុជា ដែលមានទីតាំងស្ថិតនៅក្នុងតំបន់កសិទេសចរណ៍ ម៉ុងឬទ្ធី សែនជ័យ ក្នុងស្រុកសំរោងទង ខេត្តកំពង់ស្ពឺ មានចម្ងាយប្រហែល 40 Km ពីរង្វល់មូលចោមចៅ។ លោកអ្នកអាចធ្វើដំណើរទៅទីនោះ តាមផ្លុវជាតិលេង 4 ហួសផ្សារព្រៃផ្ដៅបន្តិច រួចបត់ចូលតាមផ្លូវនៅខាងឆ្វេងដៃ។
ក្រៅពីជិះ Go-Kart អស់ចិត្តអស់ចង់រួចហើយ ភ្ញៀវទេសចរ ក៏អាចចូលទស្សនា និងសម្រាកលម្ហែកាយនៅ កញ្ចុះសម្រាប់អង្គុយលេង សួនសត្វ ហាងកាហ្វេ ភោជនីយដ្ឋាន ក្នុងតំបន់កសិទេសចរណ៍នេះថែមទៀតផង៕
រូបភាព៖ Yamamoto Circuit.