Ford កំពុងតែសិក្សាដាក់ឲ្យប្រើប្រាស់នូវបច្ចេកវិទ្យាឆ្លាតវៃរបស់ខ្លួន ដែលស្រដៀងរថយន្តបើកបរស្វ័យប្រវត្តិអញ្ចឹងដែរ

នៅក្នុងកំឡុងពេលដែលមានការប្រកួតប្រជែងខ្លាំងសម្រាប់ទីផ្សាររថយន្តបើកបរដោយស្វ័យប្រវត្តិ បានធ្វើអោយក្រុមហ៊ុនផលិតរថយន្តជាច្រើន បានខិតខំស្វែងរកនូវបច្ចេកវិទ្យាថ្មីៗ ដើម្បីបន្ថែមលើអ្វីដែលមានស្រាប់នាពេលបច្ចុប្បន្នរបស់ខ្លួន។ ជាក់ស្តែងពេលនេះ ក្រុមហ៊ុនរថយន្ត Ford បាននឹងកំពុងតែសិក្សា និងត្រៀម ដាក់ឲ្យប្រើប្រាស់នូវបច្ចេកវិទ្យាឆ្លាតវៃ អនុញ្ញាតឲ្យម្ចាស់រថយន្ត ដកដៃពីចង្កូត សម្រាកដៃ សម្រាកជើងបាន ស្រដៀងរថយន្តបើកបរស្វ័យប្រវត្តិអ៊ីចឹងដែរ។

ក្រុមហ៊ុន Ford បានបញ្ជាក់យ៉ាងដូច្នេះថា បច្ចេកវិទ្យាថ្មីនេះ ឈ្មោះថា Ford Active Drive Assist system។ វាអាចនឹងធ្វើការប្រកាសដាក់ឲ្យដំណើរការលើរថយន្តទំនើបៗម៉ាក Ford នាចុងឆ្នាំ 2021 ខាងមុខនេះ។ មកទល់នឹងពេលនេះ ក្រុមហ៊ុន Ford បាននឹងកំពុងសំឡឹងមើលលើរថយន្តម៉ាក Ford Mustang Mach-E ស៊េរីឆ្នាំ 2021 នៅក្នុងការបំពាក់នូវបច្ចេកវិទ្យាជំនួយដៃចង្កូតបាននេះ។ 

យ៉ាងណាមិញ បច្ចេកវិទ្យា ជំនួយដៃចង្កូតនេះ មិនមែនមានន័យថា អ្នកបើកបរអាចព្រលែង ចង្កូតរថយន្តបាន 100% ដូចរថយន្ត Tesla នោះទេ គ្រាន់តែមុខងារនេះ អាចជូយគ្រប់គ្រងការបង្កើនល្បឿន ទប់ហ្វ្រាំងពេលមានឧបសគ្គ និងជួយកាចចង្កូត ព្រមគ្នាក្នុងពេលតែមួយប៉ុណ្ណោះ។ មានន័យថា ម្ចាស់រថយន្តនៅតែតម្រូវឲ្យអង្គុយកៅអី ជួយឃ្លាំមើលផ្លូវដដែលពេលបើកបរដដែល។

ក្រុមហ៊ុន Ford បានបញ្ជាក់បន្ថែមថា មុខងារ មុខងារ Active Drive Assist System (ADAS) នេះ នឹងអាចដំណើរការ ចំពោះទីតាំង ដែលបានកំណត់ជាមុន ហើយដាក់ឲ្យដំណើរការសាកល្បង នៅតាមបណ្ដាផ្លូវ highway ក្នុងសហរដ្ឋអាមេរិច និងប្រទេសកាណាដា សិនប៉ុណ្ណោះ៕