បន្ទាប់ពីដាក់សម្ពាធពីនិយ័តករពាក់ព័ន្ធទៅនឹងបទបញ្ញត្តិទៅលើសុវត្ថិភាពរថយន្តសហរដ្ឋអាមេរិក នៅពេលនេះ ក្រុមហ៊ុនផលិតរថន្តស្វ័យបប្រវត្តិ Tesla បានសម្រេចយល់ព្រមបញ្ឈប់មិនអនុញ្ញាតអោយអ្នកបើកបរលេងវីដេអូហ្គេមទៀតនោះទេនៅលើអេក្រង់ Touchscreen នៃរថយន្តរបស់ខ្លួននៅក្នុងអំឡុងពេលដែលរថយន្តធ្វើដំណើរ។ រដ្ឋបាលសុវត្ថិភាពចរាចរណ៍ផ្លូវជាតិរបស់អាមេរិក បាននិយាយថា ក្រុមហ៊ុន នឹងធ្វើការអាប់ដេតទៅលើកម្មវិធី software របស់ខ្លួននៅលើអ៊ីនធឺណិត។
ជាមួយនឹងមុខងារថ្មីនៅក្នុងការអាប់ដេតនេះ គឺមានឈ្មោះហៅថា “Passenger Play” ដែលត្រូវចាក់សោរ ហើយវានឹងមិនដំណើរការនោះទេ នៅពេលដែលរថយន្តមានចលនា។ ការវិវត្តន៍នេះ បន្ទាប់ពីទីភ្នាក់ងារនេះបានប្រកាសថា ខ្លួននឹងបើកការស៊ើបអង្កេតផ្លូវការមួយពាក់ព័ន្ធទៅនឹងការព្រួយបារម្ភអំពីវីដេអូហ្គេមរបស់ក្រុមហ៊ុន Tesla ដែលអនុញ្ញាតអោយអ្នកធ្វើដំណើរលេងហ្គេមបាននៅពេលដែលបើកបរនោះ។
ការស៊ើបអង្កេតនេះរកឃើញថា មុខងារ “Passenger Play” គឺអនុញ្ញាតអោយអ្នកបើកបរលេងហ្គេមជាច្រើននៅលើអេក្រង់ Touchscreen ចាប់តាំងពីខែធ្នូឆ្នាំ 2020 មកម្ល៉េះ។ មុននេះ មុខងារនេះត្រូវបានដាក់អោយដំណើរការនៅពេលដែលរថយន្តចតនៅក្នុងចំណតប៉ុណ្ណោះ។ NHTSA បាននិយាយថា ហ្គេមនេះអាចលេងបានប្រសិនបើមិនមែនជាអ្នកបើកបរជាអ្នកលេង ហើយវាក៏អាចនឹងបង្ករអោយមានការកើនឡើងនៃគ្រោះថ្នាក់ចរាចរណ៍ផងដែរ។ ក្រុមហ៊ុនTesla មកទល់ពេលនេះក៏មានគ្រោះថ្នាក់ចំនួន 11 ករណីពាក់ព័ន្ធទៅនឹងមុខងារ Autopilot ឬប្រព័ន្ធបើកបរដោយខ្លួនឯងដែលបង្ករអោយមនុស្សរបួស 17 នាក់ និងស្លាប់ 1 នាក់ផងដែរ៕
