ថ្មីៗនេះ មានការបញ្ជាក់ថា ក្រុមហ៊ុនបច្ចេកវិទ្យាយក្ស Sony និង Honda បានចាប់ដៃគ្នាផលិតទៅលើរថយន្តអគ្គិសនី។ ក្រុមហ៊ុនទាំងពីរនេះ ក៏បានចុះនូវអនុស្សរណៈនៃការយោគយល់គ្នារួចហើយទៅលើផែនទីបង្ហាញផ្លូវសម្រាប់រថយន្តអគ្គិសនី Sony-Honda EV។ នៅក្នុងកិច្ចសហប្រតិបត្តិការរួមគ្នានេះ គឺប្រើប្រាស់ក្នុងភាពជាដៃគូថ្មីបើទោះបីជាវានៅមិនទាន់បញ្ចប់នៅឡើយទេនោះ។
យោងតាមប្រភពខាងលើនេះ បានបន្ថែមថា ផែនការថ្មីនេះ គឺមានទាំងព័ត៌មានក្នុងការបង្កើតនូវក្រុមហ៊ុនថ្មីនៅឆ្នាំនេះផងដែរហើយរថយន្តអគ្គិសនីដំបូងបំផុតរបស់ការបណ្តាក់ទុនរួមគ្នានេះ នឹងចាប់ផ្តើមនៅក្នុងឆ្នាំ 2025 ខាងមុខ។ នៅពេលនេះ មានក្រុមហ៊ុនបច្ចេកវិទ្យាជាច្រើន ក៏បានចាប់ផ្តើមធ្វើការផលិតទៅលើរថយន្តអគ្គិសនី។ ក្រុមហ៊ុន Apple ក៏នឹងមានការបប្រកាសចេញរថយន្តអគ្គិសនីរបស់ខ្លួនផងដែរ។
ទាក់ទងជាមួយនិងកិច្ចសហការគ្នានេះ ក្រុមហ៊ុន Honda ក៏បានផលិតនូវម៉ូដែលដំបូងបំផុតផងដែរ ខណៈពេលដែលក្រុមហ៊ុន Sony ក៏នឹងអភិវឌ្ឍនូវរថយន្តអគ្គិសនីរបស់ខ្លួនដូចគ្នា។ សម្រាប់ក្រុមហ៊ុន Sony និង Honda នឹងនាំយកនូវការពង្រឹងផ្នែកបច្ចេកទេស និងភាពជំនាញទៅលើការអភិវឌ្ឍសម្រាប់ការផលិតរថយន្តអគ្គិសនីនៅពេលនេះ។ សូមជំរាបថា Sony គឺជាក្រុមហ៊ុនមួយដែលគេស្គាល់ច្បាស់ថា មានភាពខ្លាំងទៅលើផ្នែក imaging, telecommunications និងការកម្សាន្តជាដើម ហើយក្រុមហ៊ុននេះ មានផលិតផលបច្ចេកវិទ្យាជាច្រើនដ៏អស្ចារ្យថែមទៀតផងដែរ៕
