ក្រុមហ៊ុន Maserati ត្រៀមបញ្ចេញនូវរថយន្តអគ្គីសនី GranTurismo EV ដែលមានកម្លាំងម៉ាស៊ីនដល់ទៅ 1,200 សេះ

យោងតាមការចេញផ្សាយព័ត៌មានថ្មីមួយនៅថ្ងៃនេះ បានបញ្ជាក់ថា Maserati ដែលជាក្រុមហ៊ុនរថយន្តថ្នាក់ប្រណិតដ៏ធំនៅលើពិភពលោក មានគម្រោងក្នុងការបញ្ចេញនូវរថយន្តអគ្គិសនីជាច្រើនម៉ូដែលនៅត្រឹមឆ្នាំ 2025 ខាងមុខនេះ ដោយចាប់ផ្តើមពីឆ្នាំក្រោយនេះជាមួយនឹងរថយន្តម៉ូដែល GranTurismo EV (Electric Vehicle)។ រថយន្តថ្មីនេះ នឹងមានកម្លាំង 1,200 សេះ ហើយនេះគឺរថយន្តអគ្គីសនីដែលមានស្តង់ដារថ្មីនៅក្នុងឧស្សាហកម្មនេះ។

ប្រភពខាងលើនេះបានបន្តថា GranTurismo “Folgore” នឹងក្លាយជារថយន្តអគ្គិសនីដ៏ប្រណិតរបស់អ៊ីតាលី។ សូមជំរាបថា Maserati គឺស្ថិតនៅក្រោមការគ្រប់គ្រងរបស់ក្រុមហ៊ុន Stellantis ខណៈដែលកាលពីមុននេះ ក្រុមហ៊ុននេះ គឺមានឈ្មោះហៅថា Fiat Chrysler។ រថយន្តថ្មីនេះ មានសមត្ថភាពរត់ល្បឿនដល់ទៅ 190 mph ហើយនឹងអាចបង្កើនល្បឿនចាប់ពី 0-62 mph នៅក្នុងពេលតែ 3 វិនាទីប៉ុណ្ណោះ។

បន្ថែមណពីនេះក៏មានការបញ្ជាក់ទៀត ក្រៅពីគម្រោងរថយន្ត  GranTurismo នេះ ក្រុមហ៊ុនេះ ក៏មានគម្រោងក្នុងការប្រកាសចេញនូវរថយន្ត All-Electric Grecale Midsize SUV និង Grancabrio GT ផងដែរ។ ហើយនៅឆ្នាំ 2025 ខាងមុខនេះ ក្រុមហ៊ុន Maserati ក៏មានគម្រោងក្នុងការបន្ថែមនូវម៉ូដែលសម្រាប់អគ្គិសនី ដែលមានដូចជារថយន្ត  MC20 supercar, Quattroporte Sedan និង Levante SUV របស់ខ្លួនផងដែរ។

សូមជំរាបថា រថយន្តរបស់ក្រុមហ៊ុន Maserati មិនមែនជាសម្រាប់អតិថិជនដែលមានកម្រិតមធ្យមនោះទេ ដោយសារតែនេះ គឺម៉ាកយីហោរថយន្តប្រណិតខ្លាំងមែនទែន។ ជាមួយនិងព័ត៌មាននេះ ខាងក្រុមហ៊ុន Maserati នៅមិនទាន់ទម្លាយអំពីតម្លៃរបស់រថយន្តអគ្គិសនីថ្មីនេះទេ។ សម្រាប់រថយន្តម៉ូដែលបច្ចុប្បន្នរបស់រថយន្តនេះ គឺមានតម្លៃចាប់ពី USD 78,000 ទៅ USD 200,000។ ស្របពេលដែលមានការវិវត្តនទៅលើរថយន្ត EV នេះ ក្រុមហ៊ុនជាច្រើនទៀត ដែលមានដូចជា Ford, VW និង GMC ក៏ត្រៀមខ្លួនក្នុងការបញ្ចេញនូវរថយន្តអគ្គិសនីផងដែរ៕