យោងតាមព័ត៌មានថ្មីនៅថ្ងៃនេះ ក្រុមហ៊ុនផលិតរថយន្តអគ្គិសនីរបស់ប្រទេសស៊ុយអែត Polestar បានប្រកាសអំពីការមកដល់របស់រថយន្តអគ្គិសនីស៊េរីថ្មីម៉ូដែល Polestar 2 នៅលើទីផ្សារប្រទេសអារ៉ាប់រួម (UAE) ហើយក្រុមហ៊ុននេះ ក៏បានសម្រេចជ្រើសយកក្រុមហ៊ុន Al-Futtaim Group ដើម្បីជាលក្រុមហ៊ុនចែកចាយ និងជាតំណាងផ្តាច់មុខនៅក្នុងតំបន់នេះផងដែរ។
តាមប្រសាសន៍របស់លោក Nils Moscow ដែលជាប្រធានផ្នែកយុទ្ធសាស្រ្ត និងអភិវឌ្ឍអាជីវកម្មរបស់ក្រុមហ៊ុន Polestar បាននិយាយថា “យើងពិតជារីករាយណាស់ក្នុងការប្រកាសចេញនូវម៉ាកយីហោ Polestar ទៅកាន់អតិថិជនជាច្រើនរបស់យើងនៅក្នុងប្រទេសអារ៉ាប់រួមនេះ។ ហើយក្នុងនាមជាម៉ាកយីហោរថយន្តប្រណិតនោះ យើងក៏បានរកឃើញ ដៃគូដ៏ល្អបំផុតរបស់យើងផងដែរ នោះគឺ ក្រុមហ៊ុន Al-Futtaim Group យើងពិតជារីករាយណាស់។”
សូមជំរាបថ Polestar គឺជាម៉ាកយីហោរថយន្តមួយនៅក្នុងចំនោមម៉ាកយីហោរថយន្តជាច្រើននៅក្នុងផ្នែករថយន្តអគ្គិសនីដែលផ្តោតសំខាន់ទៅលើសមត្ថភាព និងនិរន្តរភាពនៅក្នុងឧស្សាហកម្មនេះ។ រថយន្តនេះ មានការឌីស្សាញផ្នែកខាងក្នុងយ៉ាងពិសេស។ នេះគឺជាគោលដៅនៃចក្ខុវិស័យបរិស្ថានរបស់ប្រទេសនេះនៅក្នុងឆ្នាំ 2030 ។ គោលដៅដំបូងបំផុតរបស់ក្រុមហ៊ុន Polestar នៅក្នុងអារ៉ាប់រួម គឺនឹងបើកនៅទីក្រុងឌូបៃនៅចុងឆ្នាំនេះផងដែរ៕