នៅក្នុងពេលដែលតម្លៃសាំងឡើងថ្លៃនៅក្នុងប្រទេសចិន បានធ្វើអោយភាគីពាកព័ន្ធនានា ចាប់ផ្តើមធ្វើការពិភាក្សាមួយសម្រាប់ ដោះស្រាយរឿងសំខាន់នេះនៅក្នុងប្រទេសដែលមានប្រជាជនច្រើនមួយនេះ ពាក់ព័ន្ធទៅនឹងអនាគតនៃរថយន្ត។ លោក He Xiaopeng ដែលជានាយកប្រតិបត្តិរបស់ក្រុមហ៊ុន Xpeng Motors ក៏បានប្រកាសពីនូវឧបករណ៍សាកថ្មជំនាន់ថ្មីសម្រាប់ប្រើប្រាស់នៅលើរថយន្តអគ្គិសនី (EVs) ។
នាយកប្រតិបត្តិជាន់ខ្ពស់នេះ បាននិយាយថា អ្នកប្រើប្រាស់រថយន្តអគ្គិសនី EV គឺផ្តោតទៅលើប្រសិទ្ធិភាព និងភាពងាយស្រួលក្នុងការសាកថ្មទៅលើរថយន្តរបស់ពួកគេ។ សម្រាប់ក្រុមហ៊ុនផលិតរថយន្តអគ្គិសនីនៅក្នុងប្រទេសចិនជាច្រើន ក៏មានគម្រោងក្នុងការបង្ហាញនូវឧបករណ៍សាកថ្មជំនាន់ថ្មីសម្រាប់រថយន្ត EVs ដែលនឹងសាកថ្មលឿនជាងមុនដល់ទៅ 4 ដងនៅលើទីផ្សារ។ សម្រាប់ឧបករណ៍សាកថ្មជំនាន់ថ្មីនេះ នឹងអាចសាកថ្មបានចាប់ពី 10% ទៅ 80% នៅក្នុងពេលតែ 12 នាទីប៉ុណ្ណោះ។
សម្រាប់រថយន្តអគ្គិសនី NEV (New Energy Vehicles) ក៏មានការកើនឡើងទៅលើការពេញនិយមរបស់វាផងដែរ វាក៏មានការពង្រឹងទៅលើបច្ចេកវិទ្យាជាច្រើនផងដែរ។ ជាធម្មតាស្តង់ដារបច្ចុប្បន្ននៃការសាកថ្មទៅលើរថយន្តអគ្គិសនី គឺប្រហែលជា ២ ម៉ោង។ កាលពីដើមឆ្នាំនេះ លោក He Xiaopeng ប្រកាសអំពីស្ថានីយ៍សាកថ្មរបស់ក្រុមហ៊ុនXPeng នេះ គឺមានភាពទូលំទូលាយក្នុងការប្រើប្រាស់នៅក្នុងចំណោមរថយន្តអគ្គិសនីជាច្រើននៅក្នុងប្រទេសចិន។ វាក៏មានការពង្រឹងទៅលើបច្ចេកវិទ្យាសាកថ្មបានយ៉ាងលឿននៅក្នុងស្ថានីយ៍ថាមពលនេះ៕