ក្រុមហ៊ុន CATL គឺជាផលិតអាគុយរថយន្តអគ្គិសនីដ៏ធំបំផុតមួយរបស់ពិភពលោក ទើបបានប្រកាសចេញនៅគម្រោងក្នុងការផលិតអាគុយអគ្គិសនីថ្មីសម្រាប់រថយន្តអគ្គិសនីដែលអាចបើកបរបានជាង 620 ឬប្រហែលជាង 1 ពាន់គីឡូម៉ែត្រ ព្រមទាំងគាំទ្រនូវបច្ចេកវិទ្យាសាកភ្លើងល្បឿនលឿនទៀតផង។ សម្រាប់អាគុយរថយន្តអគ្គិសនីថ្មីនេះ នឹងចូលក្នុងសង្វាក់ផលិតកម្មផ្លូវការណ៍ក្នុងឆ្នាំ 2023 ដែលមានឈ្មោះផ្លូវការណ៍ថា The Qilin Battery។
The Qilin Battery ត្រូវបានក្រុមហ៊ុនបញ្ជាក់ថា គឺមានការបង្កើននូវប្រសិទ្ធិភាពខ្ពស់រហូតដល់ទៅ 50% បើធៀបនឹងអាគុយអគ្គិសនីដែលប្រើនៅលើរថយន្តរបស់ក្រុមហ៊ុន Tesla ម៉ូដែល S បច្ចុប្បន្ន។ ជាមួយសមត្ថភាពអាចកាន់ថាមពលក្នុងការបើកបរបានជាង 620 ម៉ាយល៍របស់ Qilin Battery ធៀបនឹងអាគុយអគ្គិសនីដែល Tesla ប្រើនៅលើ Model S គឺអាចបើកបានត្រឹមរយះចំងាយប្រមាណ 405 ម៉ាយល៍ប៉ុណ្ណោះ។ នៅក្នុងទីផ្សារសហរដ្ឋអាមេរិក រថយន្តអគ្គិសនីដែលអាចបើកបរបានរយះចំងាយផ្លូវឆ្លាយបំផុត គឺមានតម្លៃខ្ទង់ $169,000 របស់ក្រុមហ៊ុន Lucid Air។ Lucid Air គឺជាក្រុមហ៊ុន Startup មួយនៅក្នុងរដ្ឋកាលីហ្វញ៉ាសហរដ្ឋអាមេរិក ដែលផលិតផ្តល់នៅរថយន្តអគ្គិសនីដែលអាចបើកបរបានរយះចំងាយដល់ 520 ម៉ាយល៍ជាមួយការសាកថាមពលថ្មពេញមួយលើក។
បើតាមការបញ្ជាក់ពីក្រុមហ៊ុន CATL ដែលជាក្រុមហ៊ុនផលិតអាគុយរថយន្តអគ្គិសនីដ៏ធំបំផុតក្នុងពិភពលោក និងជាអ្នកផ្គត់ផ្គង់ដ៏សំខាន់របស់ក្រុមហ៊ុន Tesla បាននិយាយថា ថ្មរថយន្តថ្មី The Qilin Battery គឺនឹងផលិតឡើងជាមួយនឹងទំហំតូចសម្រាប់បំពាក់នៅលើរថយន្តតែមានប្រសិទ្ធិភាពថាមពលខ្លាំងជាងអាគុយអគ្គិសនីប្រើក្នុងរថយន្តនាពេលបច្ចុប្បន្ន។ ក្រុមហ៊ុននេះបានបញ្ជាក់ទៀតថា The Qilin Battery គឺផ្ទុកថាមពលប្រមាណ 255Whr ក្នុងទំងន់ 1 គីឡូក្រាម ដែលមានប្រសិទ្ធិខ្ពស់ដល់ទៅ 13% បើធៀបនឹងអាគុយរថយន្ត Tesla Model Y SUVs បច្ចុប្បន្ន ដែលមានបង្គុំដោយថ្មចំនួន 4680។ ហើយចំពោះការសាកបំពេញថាមពលថ្មវិញ គឺពី 10% ទៅ 80% ចំនាយពេលប្រមាណតែ 10 នាទីប៉ុណ្ណោះ។
ទោះជាយ៉ាងណាបើតាមប្រភពបានបញ្ជាក់ ក្នុងខណៈពេលនេះ នៅមិនទាន់មានក្រុមហ៊ុនផលិតរថយន្តអគ្គិសនីរបស់សហរដ្ឋអាមេរិកមានការចាប់អារម្មក្នុងការប្រើប្រាស់អាគុយអគ្គិសនី The Qilin សម្រាប់រថយន្តរបស់ពួកគេនៅឡើយទេ។ ទន្ទឹមនឹងនេះបើតាមការចុះផ្សាយពីបណ្តាញសារព័ត៌មាន Bloomberg បានឲ្យដឹងថា មានក្រុមហ៊ុនផលិតរថយន្តអគ្គិសនីធំៗចំនួនពីររបស់ប្រទេសចិន គឺ Hozon និង Li Auto បានបញ្ជាក់ផ្លូវការណ៍ថានឹងប្រើប្រាស់អាគុយអគ្គិសនី The Qilin នៅលើរថយន្តរបស់ពួកគេដែលនឹងមកដល់នាពេលខាងមុខ៕