នៅពេលនេះ ក្រុមហ៊ុន Samsung Electronics របស់ប្រទេសកូរ៉េខាងត្បូង បានធ្វើការពង្រីកទៅលើបន្ទះឈីបសម្រាប់រថយន្ត។ តាមការបញ្ជាក់របស់ប្រភពជាច្រើនអោយដឹងថា ក្រុមហ៊ុន Samsung Electronics នឹងធ្វើការផ្គត់ផ្គង់បន្ទះឈីប automotive semiconductors (Exynos Auto) ទៅកាន់ក្រុមហ៊ុន Volkswagen ដែលជាក្រុមហ៊ុនផលិតរថយន្តធំបំផុតរបស់ពិភពលោកបន្ទាប់ពីក្រុមហ៊ុន Audi ។
អាជីវកម្ម System LSI Division របស់ក្រុមហ៊ុន Samsung Electronics បានធ្វើការផ្គត់ផ្គង់នូវបន្ទះឈីប ‘Exynos Auto’ ដែលជាបន្ទះឈីបចុងក្រោយបំផុតរបស់ក្រុមហ៊ុននេះទៅកាន់ក្រុមហ៊ុនផលិតរថយន្ត Volkswagen ចាប់តាំងពីដើមឆ្នាំនេះ។ Exynos Auto គឺជាប្រភេទបន្ទះឈីប system-on-a-chip (SoC) របស់ក្រុមហ៊ុន Samsung Electronics ហើយវាគឺជាខួរក្បាលរបស់ប្រព័ន្ធរថយន្តទាំងមូលតែម្តង។
ក្រុមហ៊ុនបច្ចេកវិទ្យា Samsung Electronics បានផ្តោតខ្លាំងទៅលើបន្ទះឈីបសម្រាប់រថយន្តដែលជាផ្នែកមួយដ៏សំខាន់សម្រាប់ពេលអនាគត។ Exynos Auto គឺជាម៉ាកយីហោដំបូងបំផុតរបស់ក្រុមហ៊ុននេះ។ បន្ទះឈីប Exynos Auto series នេះគឺផ្គត់ផ្គង់ដោយក្រុមហ៊ុន Samsung Electronics ទៅកាន់ក្រុមហ៊ុន Audi ផងដែរហើយវាមានមុខងារជាច្រើនដូចជា status control, navigation និង multimedia playback ។ បច្ចុប្បន្ននេះ រថយន្តជាច្រើនចុងក្រោយបំផុតរបស់ក្រុមហ៊ុន Audi គឺប្រើប្រាស់នូវបន្ទះឈីប Exynos Auto semiconductor របស់ក្រុមហ៊ុន Samsung Electronics។
គួរបញ្ជាក់ផងដែរថា ក្រុមហ៊ុន Volkswagen គឺជាក្រុមហ៊ុនធំរបស់ក្រុមហ៊ុនAudi ។ ក្រុមហ៊ុននេះក៏ប្រកួតប្រជែងជាមួយនឹងក្រុមហ៊ុន Toyota របស់ជប៉ុនសម្រាប់តំណែងជាក្រុមហ៊ុនផលិតរថយន្តធំបំផុតរបស់ពិភពលោកផងដែរ។ នៅក្នុងឧស្សាហកម្មផលិតរថយន្តនេះ អ្នកវិភាគជាច្រើននិយាយថា ក្រុមហ៊ុន Samsung Electronics នឹងផ្គត់ផ្គង់បន្ទះឈីប automotive semiconductors នេះទៅកាន់ក្រុមហ៊ុន Volkswagen បន្ទាប់ពី Audi ។ នេះគឺជាលើកដំបូងបំផុតដែលយើងបានដឹងអំពីកិច្ចព្រមព្រៀងនេះ៕