លោក Lei Jun ដែលជាស្ថាបនិករបស់ក្រុមហ៊ុនបច្ចេកវិទ្យា Xiaomi ទើបតែធ្វើការចែករំលែកនូវការផ្សព្វផ្សាយការជ្រើសរើសបុគ្គលិកជាច្រើននាក់នៅលើគណនី Weibo របស់គាត់។ នៅក្នុងការផ្សព្វផ្សាយនេះ ក្រុមហ៊ុននេះ ប្រកាសក្នុងការជ្រើសរើសនូវអ្នកជំនាញជាច្រើននៅក្នុងបច្ចេកវិទ្យាបើកបរស្វ័យប្រវត្តិនៅក្នុងអាជីវកម្មរថយន្តរបស់ខ្លួន។
កាលពីខែមីនាកន្លងទៅនេះ ក្រុមហ៊ុនបច្ចេកវិទ្យាយក្សរបស់ចិននេះ បានប្រកាសថា ខ្លួននឹងចូលទៅក្នុងអាជីវកម្មរថយន្តឆ្លាតវៃ Smart Electric Vehicle ជាមួយនឹងការវិនិយោគទឹកប្រាក់ចំនួន 10 ពាន់លានយ័ន (1.5 ពាន់លានដុល្លារអាមេរិក)។ នៅពេលនេះ នាយកប្រតិបត្តិនេះ គឺបានចែករំលែកអំពីការជ្រើសរើសអ្នកជំនាញជាង 500 នាក់ឯណោះ ដើម្បីចូលរួមនៅក្នុងផ្នែកបើកបរស្វ័យប្រវត្តិ “Xiaomi Autonomous Driving Department” នេះ ។
នៅក្នុងការបង្ហោះនៅលើបណ្តាញសង្គមនេះ គឺបានបញ្ជាក់ថា ខ្លួនប្រកាសជ្រើសរើសនូវអ្នកជំនាញជាង 500 នាក់ក្នុងការបង្កើតនូវបច្ចេកវិទ្យាបើកបរស្វ័យប្រវត្តិ Self-Driving Technology សម្រាប់រថយន្តឆ្លាតវៃជាច្រើនរបស់ខ្លួន។ បន្ថែមពីនេះទៀតនោះ ក្រុមហ៊ុននេះ ក៏បានបង្កើននូវការខិតខំប្រឹងប្រែងក្នុងការជ្រើសរើសបុគ្គលិក និងការបើកផ្នែករថយន្តស្វ័យប្រវត្តិជាច្រើនផងដែរ។ នៅក្នុងនោះក៏មានផ្នែក data platforms, millimeter wave algorithms, control system, embedded software, imaging/perception និងជាច្រើនទៀតផង។ ទាក់ទងជាមួយបច្ចេកវិទ្យានេះ ត្រូវបានក្រុមហ៊ុននិយាយថា គឺនឹងមានការអាប់ដេតជាច្រើនទៀតនៅក្នុងពេលខាងមុខនេះ៕