ថ្មីៗនេះ ក្រុមហ៊ុន Ola Electric ទើបតែបង្ហាញនូវម៉ូតូអគ្គិសនីចំនួន 2 នៅក្នុងទីផ្សាររបស់ប្រទេសឥណ្ឌា ដែលមានដូចជា ម៉ូតូ Ola S1 មានតម្លៃចាប់ពី ₹99,999 (~$1,348) ខណៈពេលដែលតម្លៃរបស់ម៉ូតូ Ola S1 Pro មានតម្លៃចាប់ផ្តើមពី ₹1,29,999 (~$1,753)។ ក្រុមហ៊ុននេះ បាននិយាយថា ម៉ូតូ e-Scooter ត្រូវបានឌីស្សាញ និងតម្លើងនៅក្នុងប្រទេសឥណ្ឌាសម្រាប់ទីផ្សារពិភពលោក។ ការដឹកជញ្ជូនម៉ូតូអគ្គិសនី Scooter នេះនឹងចាប់ផ្តើមនៅក្នុងខែតុលានេះ។
ក្រុមហ៊ុននេះ បានបន្តថា ម៉ូតូនេះ គឺមានបំពាក់នូវអេក្រង់ទំហំ 7-inch touchscreen ជាមួយនឹងបន្ទះឈីប octa-Core processor និងរ៉េមទំហំ 3GB ដោយនៅលើអេក្រង់នេះ ក៏មានមុខងារជាច្រើនទៀតដូចជា geo-fencing, anti-theft alert, Bluetooth connectivity, GPS និង WiFi រួមជាមួយនឹង Speakers ថែមទៀតផង។ សម្រាប់ម៉ូតូ S1 Pro នេះគឺមានសម្បកកង់ប្រភេទ 110/70-R12 MRF។
និយាយពីសមត្ថភាពម៉ូតូនេះ គឺដំណើរការជាមួយនឹងថាមពលថ្ម ហើយយើងក៏អាចមើលថាមពលថ្មថា នៅសល់ប៉ុន្មាន ឬអាចទៅបានប៉ុណ្ណា តាមរយៈកម្មវិធី Ola Electric app ផងដែរ។ ជាមួយនឹងវត្តមានរបស់ផលិតផលថ្មីនេះ ក្រុមហ៊ុននេះ ក៏បានបង្កើតនូវប្រព័ន្ធប្រតិបត្តិការ Ola MoveOS សម្រាប់ម៉ូតូនេះ ដើម្បីជំនួយដល់ការប្រើប្រាស់បានកាន់តែស្រួលផងដែរ។ ម៉ូតូនេះ ប្រើប្រាស់នូវ ‘Hyperdrive motor’ ដែលមានថាមពលដល់ទៅ 8.5kW ។
សម្រាប់ការធ្វើដំណើរនៅលើដងវិថី ម៉ូតូ S1 នេះ គឺអាចជិះបានក្នុងល្បឿនដល់ទៅ 90 Km ក្នុងមួយម៉ោង ខណៈពេលដែលម៉ូតូ Ola S1 Pro មានល្បឿនដល់ទៅ 115 Km ក្នុងមួយម៉ោងឯណោះ។ ម៉ូតូ Ola S1 នេះ ត្រូវបានក្រុមហ៊ុនបំពាក់នូវថាមពលថ្មទំហំ 2.98 kWh ខណៈពេលដែលម៉ូឌែល Pro គឺមានថាមពលថ្មទំហំ 3.97 kWh។ សម្រាប់ការសាកថ្មរយៈពេល 15 នាទីអាចធ្វើដំណើរបានដល់ទៅ 75 គីឡូម៉ែត្រ៕