បច្ចុប្បន្នយើងមើលឃើញថាវិស័យឧស្សាហកម្មរថយន្តកំពុងតែមានភាពរីកចម្រើនខ្លាំងគួរអោយកត់សំគាល់ពិសេសរថយន្តដើរដោយថាមពលអគ្គសនីតែម្តង។ ជាមួយគ្នានេះដែរយើងឃើញថាមានក្រុមហ៊ុនបច្ចេកវិទ្យាធំៗល្បីៗក្នុងពិភពលោកបាននឹងកំពុងបោះជំហានចូលប្រឡូកក្នុងវិស័យមួយនេះផងដែរ ដោយក្នុងនោះយើងឃើញមានជាអាថិ៍ដូចជាក្រុមហ៊ុនផលិតស្មាតហ្វូន Apple, Xiaomi និង Huawei ជាដើម។
ងាកមកក្រុមហ៊ុនផលិតស្មាតហ្វូនរបស់ប្រទេសចិនដែលកំពុងឡើងកូដខ្លាំងក្នុងឆ្នាំ 2021 គឺ Xiaomi ឯណេះវិញ គឺបានសម្រេចហក់ចូលប្រឡូកក្នុងវិស័យឧស្សាហកម្មរថយន្តជាផ្លូវការណ៍ហើយ។ ដោយក្រុមហ៊ុនផលិតស្មាតហ្វូនរបស់ចិនមួយនេះបានប្រកាសផ្លូវការណ៍កាលពីថ្ងៃម្សិលមិញនេះថា ខ្លួនបានបង្កើនក្រុមហ៊ុនថ្មីមួយឈ្មោះថា Xiaomi EV Inc ដែលជាក្រុមហ៊ុនធ្វើការលើផ្នែករថយន្តអគ្គសនី ដើម្បីចូលរួមប្រកូតប្រជែងទីផ្សារលើវិស័យរថយន្តអគ្គសនីនាពេលខាងមុខនេះ។ ការប្រកាសនេះត្រូវបានធ្វើឡើងបន្ទាប់ពី Xiaomi បានចចារទិញយកក្រុមហ៊ុនផលិតបច្ចេកវិទ្យាបើកបរដោយស្វ័យប្រវត្តិ (Self-driving Technology) ឈ្មោះថា DeepMotion បានជោគជ័យកាលពីពេលថ្មីៗនេះ។
ជាមួយនឹងការបង្កើតក្រុមហ៊ុនថ្មីនេះ Xiaomi ត្រូវបានគេដឹងថា បានចាយទុនវិនិយោគជំហានដំបូងដល់ទៅ 1.5 ពាន់លានដុល្លារអាមេរិក និងបានជួលបុគ្គលិកថ្មីដែលជំនាញខាងផ្នែករថយន្តដល់ទៅជាង 300 នាក់ឯណោះ។ បន្ថែមពីនេះ Xiaomi ក៏មានគម្រោងបន្ថែមទុនវិនិយោគប្រមាណ 1.5 ពាន់លានដុល្លារអាមេរិកសម្រាប់រយះពេល 10 ឆ្នាំខាងមុខទៀត។ ទោះជាយ៉ាងណាក៏ដោយគេមិនទាន់ទទួលបានរបាយការណ៍ជាក់លាក់ដែលបញ្ជាក់ថា តើក្រុមហ៊ុនបច្ចេកវិទ្យាខ្នាតយក្សរបស់ប្រទេសចិនមួយនេះ ធ្វើការអភិវឌ្ឍន៍ផលិតរថយន្តអគ្គីសនីដោយខ្លួនឯង ឬក៏ផលិតតែគ្រឿងបរិក្ខាបំពាក់សម្រាប់រថយន្តអគ្គសនីដូចជាគ្រឿងបន្លាស់ (Hardware) និងកម្មវិធី (Software solution) ដើម្បីធ្វើផ្គត់ផ្គង់ដល់ក្រុមហ៊ុនផលិតរថយន្តធំៗនៅលើពិភពលោក ឬយ៉ាងណា៕