យើងដឹងហើយថា BMW គឺជាក្រុមហ៊ុនផលិតរថយន្តប្រណិតល្បីឈ្មោះបំផុតមួយនៅលើពិភពលោក។ ក្រៅពីផលិតរថយន្តទំនើបៗទៅក្រុមហ៊ុនអាល្លឺ ម្ម៉ង់មួយនេះក៏ផ្តោតទៅលើទីផ្សារផលិតម៉ូតូអគ្គីសនីផងដែរ ហើយក្រុមហ៊ុននេះក៏បានបង្ហាញចេញនូវគំរូមួយចំនួនរួចហើយកាលពីប៉ុន្មានឆ្នាំមុននេះ ហើយក្នុងចំនោមម៉ូតូអគ្គិសនីទាំងអស់របស់ BMW យើងឃើញមានម៉ូដែល CE04 ត្រូវបានក្រុមហ៊ុនបង្ហាញចេញផ្លូវការណ៍រួចរាល់ហើយដែរ ដែលមានតម្លៃខ្ទង់ប្រមាណជា $14,300 ឯណោះ ហើយនឹងត្រូវចេញលក់នៅឆ្នាំ 2022 ខាងមុខ។
ដោយឡែកក្នុងពេលនេះ BMW ក៏បានបង្ហាញចេញនូវគំរូកូនម៉ូតូអគ្គីសនី (mini-bike) ម៉ូដែល CE02 មួយបន្ថែមទៀតនៅមុនព្រឹត្តិការណ៍ IAA Mobility Conference ដែលត្រូវប្រារព្ធធ្វើឡើងនៅប្រទេសអាល្លឺម្ម៉ង់ផ្ទាល់តែ។ កូនម៉ូតូអគ្គិសនីថ្មីនេះត្រូវបានក្រុមហ៊ុនបញ្ជាក់ថា វាត្រូវបានបង្កើតឡើងដើម្បីផ្តល់ជូនអ្នកប្រើប្រាស់ដែលមានវ័យក្មេងៗដែលចេះជិះម៉ូតូមិនទាន់ស្ទាត់ ឬក៏អ្នកចាប់ផ្តើមរៀនជិះម៉ូតូលើកដំបូង។
លក្ខណៈពិសេសរបស់ BMW CE02 គឺមានទំហំតូចទំងន់ស្រាលជាមួយទំងន់ប្រមាណ 120 គីឡូក្រាមប៉ុណ្ណោះ និងមានតួរផលិតឡើងពីសារធាតុពណ៌ប្រាក់លាយខ្មៅដែល BMW ហៅថា “technoid typography” ព្រមទាំងមានបំពាក់នូវអេក្រង់ LED ទំហំធំល្មមមួយសម្រាប់ផ្តល់នូវព័ត៌មានសំខាន់ៗមួយចំនួនរបស់ម៉ូតូដូចជាកម្រិតល្បឿន និងថាមពលថ្មជាដើម។
កូនម៉ូតូអគ្គិសនីថ្មីនេះបំពាក់មកជាមួយម៉ូទ័រប្រភេទ belt-driven motor ដែលអាចផលិតកំលាំងអគ្គិសនីបាន 11kW មានថ្មសាកពេញម្តងដែលអាចបើកបានរយះចំងាយផ្លូវ 90km ជាមួយល្បឿនលឿនបំផុតដល់ 90Km/h។ ទោះជាយ៉ាងណា BMW មិនបានបញ្ជាក់ពីទំហំថ្មអគ្គិសនីដែលប្រើនៅលើកូនម៉ូតូអគ្គិសនីថ្មីនេះទេ។
BMW បានបញ្ជាក់ថា CE02 មិនមែនជាប្រភេទម៉ូតូធម្មតា ឬក៏ជា Scooter នោះទេ ប៉ុន្តែវាគឺជាកូនម៉ូតូអគ្គិសនី (mini-bike) ដែលផលិតឡើងសម្រាប់ទីផ្សារអ្នកប្រើដែលមានវ័យក្មេង។ ក្រុមហ៊ុនផលិតរថយន្តប្រណិតរបស់អាល្លឺម៉្មង់ខាងលើនេះមិនបានបញ្ជាក់ពីថ្ងៃប្រកាសចេញផ្លូវការណ៍ និងតម្លៃរបស់ CE02 mini-bike នៅឡើយទេ ប៉ុន្តែ គេរំពឹងថាកូនម៉ូតូអគ្គិសនីនេះនឹងមានតម្លៃធូរថ្លៃច្រើនជាងម៉ូដែល BWM CE04៕