Mercedes គ្រោងបង្កើតបណ្តាញស្ថានីយ៍សាកភ្លើងរថយន្តអគ្គិសនីផ្ទាល់ខ្លួនជាង 1 ម៉ឺនកន្លែងបន្ថែមទៀតនៅទូទាំងពិភពលោក

ក្រុមហ៊ុនផលិតរថយន្តប្រណិតលំដាប់អភិជន Mercedes-Benz មានគម្រោងក្នុងការបង្កើតបណ្តាញស្ថានីយ៍សម្រាប់សាកភ្លើងរថយន្តអគ្គិសនីច្រើនជាង 10,000 កន្លែងនៅទូទាំងសកលលោក ដែលនឹងចាប់ផ្តើមដំបូងពីទឹកដីអាមេរិកខាងជើង មុនពេលពង្រីកទៅកាន់ទឹកដីប្រទេសចិន អឺរ៉ុប និងតំបន់ផ្សេងៗទៀត។ សម្រាប់ស្ថានីយ៍ដំបូងរបស់ Mercedes អាចនឹងត្រូវសាងសងឡើងនៅក្នុងទឹកដីសហរដ្ឋអាមេរិក និងកាណាដានៅមុនដំណាច់ឆ្នាំ 2023 ជាមួយគោលដៅក្នុងការពង្រីកបណ្តាញស្ថានីយ៍សាកភ្លើង និងដំណើរការរហូតដល់ឆ្នាំ 2030។

គម្រោងការនេះ គឺជាផ្នែកយុទ្ធសាស្រ្តរបស់ Mercedes-Benz ក្នុងការប្តូរសង្វាក់ផលិតកម្មរថយន្តប្រើចំហេះក្នុងរបស់ខ្លួនទៅរថយន្តអគ្គិសនីពេញលេញនាពេលអនាគតដ៏ខ្លីខាងមុខ។ Mercedes-Benz កំពុងចំនាយទុកខ្ទង់ពាន់លានដុល្លារអាមេរិកនៅក្នុងរោងចក្រសង្វាក់ផលិតកម្មរថយន្តអគ្គិសនី និងការសាងសងស្ថានីយ៍សាកភ្លើង។ Mercedes-Benz មានគោលបំណងពន្លឿនការផ្លាស់ប្តូរទៅការផលិតរថយន្តអគ្គិសនីសុទ្ធនាពេលអនាគត ដែលដោយផ្តល់នូវជម្រើសនៃការសាកថ្មដែលអាចទុកចិត្តបានសម្រាប់ម្ចាស់យានយន្តអគ្គិសនី។ ចំពោះស្ថានីយ៍សាកថ្មរបស់ Mercedes នឹងមានទីតាំងនៅទីក្រុងធំៗ និងតំបន់ទីប្រជុំជន នៅជិតផ្សារទំនើប ហាងលក់រថយន្ត Mercedes និងផ្លូវធំៗ។ កិច្ចខិតខំប្រឹងប្រែងរបស់ Mercedes គឺដើម្បីដោះស្រាយកង្វល់របស់អតិថិជនអំពីការទិញរថយន្តអគ្គិសនីដោយមិនមានបណ្តាញសាកថ្មដែលអាចទុកចិត្តបាន។

នៅសហរដ្ឋអាមេរិក Mercedes-Benz នឹងចាប់ដៃគូជាមួយ MN8 Energy ដែលជាក្រុមហ៊ុនផលិតថាមពលពន្លឺព្រះអាទិត្យឈានមុខគេ និងក្រុមហ៊ុនស្តុកទុកថ្ម និង ChargePoint ដែល Mercedes គឺជាអ្នកវិនិយោគរួចហើយ ដើម្បីសាងសង់បណ្តាញស្ថានីយ៍សាកថ្ម។ ជាគោលដៅ គឺដើម្បីបង្កើតឱ្យមានស្ថានីយចំនួន 400 កន្លែងដែលដំណើរការនៅឆ្នាំ 2027 ដោយកន្លែងនីមួយៗមានឆ្នាំងសាកផ្ទាល់ខ្លួនច្រើនជាង 2,500។ Mercedes-Benz និង MN8 Energy គ្រោងនឹងវិនិយោគទឹកប្រាក់ប្រមាណ 1 ពាន់លានដុល្លារសម្រាប់រយៈពេលពី 6 ទៅ 7 ឆ្នាំខាងមុខ ជាមួយនឹងការចំណាយស្មើគ្នារវាងក្រុមហ៊ុនទាំងពីរ។ កន្លែងសាកថ្មទាំងនេះជាធម្មតានឹងមានឆ្នាំងសាកចន្លោះពី 4 ទៅ 12 ប៉ុន្តែតំបន់ដែលមានចរាចរណ៍ច្រើនអាចមានឆ្នាំងសាករហូតដល់ 30 ហើយឆ្នាំងសាក នឹងជាឆ្នាំងសាកដែលមានថាមពលខ្ពស់ (HPCs) ដែលមានល្បឿនសាករហូតដល់ 350kW។

យោងតាមលោក Ola Kallenius ប្រធានក្រុមប្រឹក្សាភិបាលនៃក្រុមហ៊ុន Mercedes-Benz Group AG មានប្រសាសន៍ថា “ក្រុមហ៊ុនរបស់លោកបានផ្តល់ជូននូវរថយន្តអគ្គិសនីដ៏ល្អបំផុតនៅលើទីផ្សាររួចហើយ។ ទោះជាយ៉ាងណាក៏ដោយ ដើម្បីពន្លឿនការផ្លាស់ប្តូរទៅជាយានជំនិះអគ្គិសនី Mercedes-Benz ជឿជាក់ថា វាមានសារៈសំខាន់ក្នុងការកែលម្អទៅលើបទពិសោធន៍នៃស្ថានីយ៍សាកថ្មផងដែរ។” Mercedes-Benz មានគោលបំណងដាក់ឱ្យដំណើរការការសាកថ្មកាន់តែមានភាពងាយស្រួលតាមដែលអាចធ្វើទៅបានសម្រាប់អតិថិជនរថយន្តអគ្គិសនីរបស់ខ្លួនដោយប្រើបច្ចេកវិទ្យា Plug & Charge ដែលមាននៅលើម៉ូដែល Mercedes EQ។ ដែលបច្ចេកវិទ្យានេះ គឺអនុញ្ញាតឱ្យរថយន្តចាប់ផ្តើមការគិតប្រាក់ដោយស្វ័យប្រវត្តិ និងគ្រប់គ្រងការទូទាត់ដោយមិនចាំបាច់ឱ្យអ្នកបើកបរបញ្ចូលព័ត៌មានក្នុងការទូទាត់ ឬបញ្ជាក់ការគិតថ្លៃនៅស្ថានីយ៍នោះឡើយ៕