ន័រវេស គឺជាប្រទេសមួយដែលស្ថិតនៅក្នុងចំនោមប្រទេសជាច្រើនដែលមានការប្រើប្រាស់នូវរថយន្តអគ្គិសនីច្រើនបំផុតរបស់ពិភពលោក។ ប្រទេសនេះ គឺតែងតែជាអ្នកគាំទ្រទៅលើរថយន្តអគ្គិសនី។ នៅក្នុងចំនោមប្រទេសទាំងអស់ នៅក្នុងអ៊ឺរ៉ុប ប្រទេសនេះ គឺនាំមុខគេជាមួយនឹងកម្រិត 70% នៅក្នុងឆ្នាំ 2021។ ថ្មីៗនេះ អ្នកកាប់ដើមឈើនៅក្នុងប្រទេសន័រវេសក៏បង្ហាញអំពីចំណាប់អារម្មណ៍របស់គេជាមួយនឹងការចង់ប្រើប្រាស់រថយន្ត Cybertruck នៅលើបណ្តាញសង្គម។
យោងតាមអ្នកប្រើប្រាស់ម្នាក់នៅលើ Instagram លោក Knut Skinnes ក៏បានបង្ហោះវីដេអូមួយដែលបង្ហាញអំពីគាត់ និងក្រុមការងារបស់គាត់ធ្វើការដឹកជញ្ជូនឈើតាមរយៈរថយន្ត Tesla Model 3 ចំនួន 3 គ្រឿង។ នៅក្នុងវីដេអូនេះ គឹមានចំនងជើងថា “ខណៈពេលដែលយើងរង់ចាំរថយន្ត Cybertruck នៅក្នុងប្រទេសន័រវេសនោះ យើងនឹងធ្វើការងារដឹកជញ្ជូនឈើរបស់យើងជាមួយនឹងរថយន្ត Model 3 ជាមុនសិន! ប្រញាប់ឡើង! កសិករជាច្រើនទន្ទឹងរង់ចាំរថយន្តនេះ!”
ប្រទេស ន័រវេស គឺជាកន្លែងផលិតប្រេងធំបំផុតទី 7 នៅក្នុងពិភពលោក ហើយជាកន្លែងដែលផលិតប្រេងធំបំផុតនៅក្នុងទ្វីបអ៊ឺរ៉ុបភាគខាងលិច។ បើទោះបីជាប្រទេសនេះ សម្បូរប្រេងក៏ដោយ ប៉ុន្តែតម្លៃប្រេងនៅក្នុងប្រទេសន័រវេសពិតជាខ្ពស់មែនទែន។ ដូចនេះ វាមិនមានអ្វីដែលគួរអោយភ្ញាក់ផ្អើលនោះទេដែលអ្នកដឹកជញ្ជូនឈើនៅក្នុងប្រទេសន័រវេសចាប់ផ្តើមដឹកជញ្ជូនដោយរថយន្ត Tesla Model 3 នេះ។ នាយកប្រតិបត្តិរបស់ក្រុមហ៊ុន Tesla លោក Elon Musk បាននិយាយថា រថយន្ត Cybertruck នឹងធ្វើការផ្លាស់ប្តូរទៅលើលក្ខណៈសម្បត្តិមួយចំនួន និងតម្លៃផងដែរ ហើយអាចនឹងបង្ហាញខ្លួននៅក្នុងឆ្នាំ 2023 នេះ៕