ក្រុមហ៊ុន Giant បានប្រកាសចេញកង់អគ្គិសនីស៊េរីថ្មីម៉ូដែល Giant Stormguard E+ SUV e-Bike ដែលមានបំពាក់នូវអេក្រង់ប្រភេទ RideDash Evo Display ជាមួយមុខងារវាស់ចង្វាក់បេះដូងផងដែរ។ ជាមួយអេក្រង់ RideDash Evo Display របស់កង់អគ្គិសនីស៊េរីថ្មីនេះ គឺវាបង្ហាញនូវព័ត៌មាននៃការជិះដូចជាល្បឿន ភាគរយថ្ម ក៏ដូចជាការទទួល និងបង្ហាញសារអេឡិចត្រូនិច emails ថែមទៀតផង។
Stormguard E+ SUV e-bike មានភាពសក្តិសមសម្រាប់គ្រប់ស្ថានភាពផ្លូវលំបាក និងមានប្រព័ន្ធសុវត្ថិភាពបំពាក់ទាំងនៅលើផ្នែកកង់ខាងមុខ និងខាងក្រោយបានយ៉ាងពេញលេញ។ កង់អគ្គិសនីស៊េរីថ្មីនេះ ត្រូវបានបំពាក់មកជាមួយនឹងហ្វ្រាំងប្រភេទ Shimano M6120 ឬ Shimano MT420 ដែលមានសុវត្ថិភាពខ្ពស់នៅពេលចាប់ហ្វ្រាំងបន្ទាន់។ កង់អគ្គិសនី Stormguard E+ SUV e-bike នេះអាចទ្រទម្ងន់បានប្រហែល 156kg រួមនឹងទាំងអាចផ្ទុកនូវឥវ៉ាន់បាន 20kg រួមជាមួយអ្នកជិះផងដែរ។
កង់អគ្គិសនីស៊េរីថ្មីមួយនេះត្រូវបានក្រុមហ៊ុនបំពាក់នូវថាមពលថ្ម EnergyPack 800 Battery ដែលមានកំលាំងសរុប 800Wh ដែលអាចជិះបានក្នុងរយះចំងាយជិត 200 គីឡូម៉ែត្រពេលសាកថ្មពេញម្តង។ ប៉ុន្តែអាចជិះបានចំងាយដល់ 200 គីឡូម៉ែត្រប្រសិនបើជ្រើសរើសយកជម្រើសបន្ថែមថាមពលថ្ម 250Wh។ Stormguard E+ SUV e-bike បានបំពាក់មកជាមួយម៉ូទ័រអគ្គិសនីប្រភេទ SyncDrive Pro 2 electronic motor ដែលរួមសហការផលិតដោយក្រុមហ៊ុន Giant និង Yamaha។ ដោយម៉ូទ័រអគ្គិសនីនេះមានល្បឿងរង្វិលជុំ 85Nm ខណៈដែរក្រុមហ៊ុន Giant និយាយថា Carbon belt drive របស់កង់អាចរត់បានរហូតដល់ទៅ 1 ម៉ឺនគីឡូម៉ែត្រឯណោះ។
Giant Stormguard E+ SUV e-Bike ត្រូវបានបំពាក់ដោយឧបករណ៍ចាប់សញ្ញាឆ្លាតវៃចំនួនប្រាំមួយ ដែលត្រួតពិនិត្យថាមពលឈ្នាន់ និងកែតម្រូវជំនួយតាមកាលៈទេសៈផ្លូវ។ ចំនែកអេក្រង់ RideDash Evo Display ក៏អាចឱ្យអ្នកជិះអាចមើលនូវទិន្នន័យកាយសម្បទាដូចជា អត្រាចង្វាក់បេះដូង ព្រមទាំងអាចភ្ជាប់ទៅកាន់ស្មាតហ្វូនដើម្បីទទួលសារ Email ថែមទៀតផង។ Giant Stormguard E+ SUV e-bike អាចរកទិញបាននៅតាមតំបន់មួយចំនួននៃទ្វីបអឺរ៉ុបដូចជា ប្រទេសហូឡង់ បារាំង និងស៊ុយអែត ដែលមានតម្លៃខ្ទង់ប្រហែល $6,716 និងមានទំហំខុសៗគ្នាគឺទំហំ S ដល់ XL។ មិនទាន់មានព័ត៌មានលម្អិតអំពីការដាក់លក់នៅលើទីផ្សារសកលសម្រាប់កង់អគ្គិសនីស៊េរីថ្មីនេះនៅឡើយទេ៕