ក្រុមហ៊ុនផលិតរថយន្តរបស់ប្រទេសចិន JAC ត្រៀមនាំយករថយន្តអគ្គិសនីប្រភេទ Pick up ស៊េរីថ្មីឆ្នាំ2025 ម៉ូដែល JAC T9 ចូលទៅក្នុងដឹកដីប្រទេសអូស្ត្រាលី ដើម្បីដាក់បង្ហាញនៅក្នុងព្រឹត្តិការណ៍ពិព័រណ៌រថយន្តប្រចាំឆ្នាំ 2025 Melbourne Auto Show។ JAC T9 EV ក៏នឹងក្លាយជារថយន្តអគ្គិសនី Pick up ដំបូងដែលត្រៀមខ្លួនក្នុងការប្រគូតប្រជែងជាមួយរថយន្តម្ចាស់ស្រុក គឺ LDV eT60 និង eTerron 9 ផងដែរ។
បើតាមរបាយការណ៍ដែលបានបង្ហាញចេញពីប្រទេសអូស្ត្រាលីកាលពីពេលថ្មីៗនេះ បានឲ្យដឹងថា JAC T9 EV មានបំពាក់នូវកញ្ចប់អាគុយអគ្គិសនីទំហំ 88kWh ដែលផ្តល់ថាមពលអូសទាញទៅកាន់ប្រព័ន្ធម៉ូទ័រចំនួនពីរ។ យ៉ាងណាមិញបើតាមអ្នកនាំពាក្យក្រុមហ៊ុន JAC Motor Australia បានបញ្ជាក់ថា សម្រាប់ផែនការណ៍មួយចំនួនអាចនឹងមានការកែប្រែថ្មី។
JAC T9 EV នឹងផ្តល់ជូនជម្រើសថ្មីសម្រាប់រថយន្ត Pick up EV ដល់អ្នកប្រើប្រាស់ទូទៅ និងអ្នកធ្វើអាជីវកម្មក្នុងទឹកដីប្រទេសអូស្រ្តាលី ជាមួយនឹងរថយន្តដែលគ្មានការបំភាយនូវឧស្ម័នចូលទៅក្នុងបរិស្ថាន។ ចំពោះអនុភាពកំលាំងម៉ូទ័រទាំងពីររបស់ JAC T9 EV គឺធ្វើបានដល់ 220kW និងកំលាំងរមូល 516Nm ដែលធ្វើឲ្យរថយន្ត Pick up របស់ប្រទេសចិនមួយនេះ មានកំលាំងខ្លាំងជាងរថយន្ត Pick up ប្រើម៉ាស៊ីនម៉ាស៊ូតរបស់ជប៉ុនដូចជាម៉ូដែល Toyota HiLux ដែលមានកំលាំង 150kW/500Nm និង Nissan Navara មានកំលាំង 140kW/450Nm។
ទៅលើការជាន់សន្ទុះល្បឿនវិញ JAC T9 EV អាចជាន់ស្ទុះពីកុងទ័រ 0 ទៅ 100km/h ចាយពេលប្រមាណ 8.5 វិនាទី ដែលចាយពេលរាងយូរជាងបើធៀបនឹងរថយន្ត Ford Ranger Raptor និង BYD Shark 6 PHEV។ ហើយរយះចម្ងាយដែល JAC T9 EV អាចជិះបាន គឺ 330km នៅពេលសាកភ្លើងពេញម្តង នេះបើតាមការធ្វើតេស្តពីស្ថាប័ន European WLTP។ ទៅលើល្បឿនសាកភ្លើងចូលវិញ JAC T9 គាំទ្រនូវប្រព័ន្ធសាកភ្លើងល្បឿនលឿន DC fast-charging 88kW ដែលសាកពី 15% ទៅ 80% ចាយពេលខ្ទង់ 40 នាទី។ បន្ថែមពីនេះ JAC T9 EV ក៏គាំទ្រនូវប្រព័ន្ធ vehicle-to-load (V2L) សម្រាប់ធ្វើការសាកភ្លើងទៅកាន់ឧបករណ៍ប្រើប្រាស់ផ្សេងៗបានថែមទៀតផង។
បច្ចុប្បន្នស្រឡាយរថយន្តម៉ាក JAC T9 ចែកចេញជាពីរម៉ូដែល គឺ Oasis និង Haven ដែលមានតម្លៃខ្ទង់ $42,662 ដល់ $45,630 តម្លៃចេញពីរោងចក្រ (មិនទាន់គិតពន្ធ)។ ទោះជាយ៉ាងណា JAC មិនទាន់បង្ហើបនូវតម្លៃរបស់ T9 EV Pick up របស់ខ្លួននៅឡើយទេ ប៉ុន្តេ មានការព្យាករណ៍ថា តម្លៃរបស់ T9 EV អាចនឹងមានតម្លៃថ្លៃប្រសិនបើក្រុមហ៊ុនប្រកាសចេញលក់ផ្លូវការណ៍នៅទីផ្សារអូស្ត្រាលី។ ក្នុងពេលបច្ចុប្បន្នរថយន្តអគ្គិសនី Pick up ដែលផលិតនៅទឹកដីអូស្ត្រាលីផ្ទាល់ម៉ូដែល LDV eT60 electric បានចេញលក់ជាមួយជម្រើសម៉ូដែល 2x4 dual-cub មានតម្លៃខ្ទង់ $92,990៕
