នៅក្នុងព្រឹត្តិការណ៍ពិរណ៌រថយន្ត Bangkok International Motor Show (BIMS) កាលពីខែមេសា ឆ្នាំ 2024 ក្រុមហ៊ុនផលិតរថយន្តអគ្គិសនីរបស់វៀតណាម VinFast បានប្រកាសពីគម្រោងក្នុងការចូលប្រឡូកនៅក្នុងទីផ្សាររថយន្តអគ្គិសនីប្រទេសថៃ ហើយក្រុមហ៊ុនផលិតរថយន្តវៀតណាមនេះ ត្រូវបានគេដឹងថា បានបង្កើតនូវកិច្ចព្រមព្រៀងភាព ជាដៃគូជាមួយក្រុមហ៊ុនចែកចាយក្នុងប្រទេសថៃចំនួន 15 ដែលត្រូវបានគេរំពឹងថា នឹងបង្ហាញរថយន្តអគ្គិសនីរបស់ខ្លួនជាច្រើនម៉ូដែលនៅមុនដំណាច់ឆ្នាំនេះផងដែរ។
យ៉ាងណាមិញនៅពេលឥឡូវនេះ VinFast ត្រូវបានគេដឹងថា ទំនងជានឹងបោះបង់ចោលគម្រោងក្នុងការចូលប្រឡូកក្នុងទីផ្សាររថយន្តអគ្គិសនីរបស់ប្រទេសថៃ។ បើតាមគេហទំព័រព័ត៌មានប្រទេសថៃឈ្មោះថា Headlightmag តាមរយៈការបង្ហោះនៅលើទំព័រហ្វេសប៊ុករបស់ខ្លួន បានរៀបរាប់ថា VinFast Thailand បានបញ្ឈប់កិច្ចសហប្រតិបត្តិការទាំងអស់ ហើយគ្រោងនឹងចាកចេញពីទីផ្សាររថយន្តអគ្គិសនីប្រទេសថៃ ដោយសារតែសង្គ្រាមតម្លៃរថយន្តអគ្គិសនីដែលកំពុងបន្ត ដែលធ្វើឲ្យក្រុមហ៊ុននេះអសមត្ថភាពក្នុងការប្រកួតប្រជែងពីទិដ្ឋភាពនៃតម្លៃបាន។
ជាមួយគ្នានេះសម្រាប់ដៃគូដែល VinFast ប្រកាសសហការជាមួយក្នុងប្រទេសថៃត្រូវបានគេរាយការណ៍ថា កំពុងរៀបចំបណ្តឹងទាមទារសំណងការខូចខាតពីបរាជ័យក្នុងការវិនិយោគនេះ។ ប្រភពដដែលបន្ថែមទៀតថា បន្ទាប់ពីការចាកចេញពីទីផ្សារប្រទេសថៃ ម៉ាកយីហោរថយន្តអគ្គិសនីរបស់វៀតណាមនេះ គ្រោងនឹងស្វែងរកទីផ្សារថ្មីក្នុងតំបន់អាស៊ាន ដូចជាទីផ្សារក្នុងប្រទេសហ្វីលីពីនជាដើម។
ហេតុការទាំងអស់នេះ បានកើតឡើងតែប៉ុន្មានថ្ងៃប៉ុណ្ណោះបន្ទាប់ពីមានសេចក្តីរាយការណ៍ថា VinFast បានពន្យារពេលក្នុងការបើកដំណើរការបណ្តាញអ្នកចែកចាយរបស់ខ្លួននៅក្នុងប្រទេសថៃ ដោយលើកឡើងពីការធ្លាក់ចុះយ៉ាងខ្លាំងនៃការលក់រថយន្តដឹកអ្នកដំណើរនៅក្នុងប្រទេសដែលជាហេតុផលដែលធ្វើឲ្យក្រុមហ៊ុនធ្វលការលប់ចោលគម្រោងរបស់ខ្លួនដូចនេះ។
បើតយោងតាមការចេញផ្សាយដោយបណ្តាញសារព័ត៌មាន Bloomberg ដែលបានដកស្រង់ចេញពីសេចក្តីថ្លែងការណ៍របស់ VinFast តាមរយះសារអ៊ីមែលថា ខ្លួននឹង "វាយតម្លៃដោយប្រុងប្រយ័ត្ន" ពេលវេលានៃការលក់រថយន្តអគ្គិសនីរបស់ខ្លួននៅក្នុងប្រទេស។ ក្រុមហ៊ុននេះបាននិយាយនៅក្នុងសេចក្តីថ្លែងការណ៍ថា "យើងបានពន្យារពេលការបើកដំណើរការក្រុមហ៊ុនចែកចាយរបស់យើងនៅក្នុងប្រទេសថៃ ដើម្បីធានាថាហេដ្ឋារចនាសម្ព័ន្ធ និងប្រតិបត្តិការរបស់យើងស្របតាមស្តង់ដារសកលរបស់ VinFast" ។
ទន្ទឹងនឹងនេះ VinFast បានកំណត់គោលដៅក្នុងការពង្រីកទីផ្សារម៉ាកយីហោរថយន្តអគ្គិសនីរបស់ខ្លួនទៅកាន់ប្រទេសយ៉ាងហោចណាស់ 50 ប្រទេសនៅឆ្នាំ 2024 នេះ។ ខណៈពេលដែលខ្លួនគ្រោងនឹងសាងសង់រោងចក្រដំឡើងរថយន្តថ្មីនៅក្នុងប្រទេសឥណ្ឌូនេស៊ី ហើយថ្មីៗនេះ ក៏បានប្រកាសចេញម៉ូដែល VinFast VF5 នៅក្នុងសាធារណរដ្ឋនោះរួចហើយដែរ។
កាលពីខែមុននេះ ក្រុមហ៊ុន VinFast បានថ្លែងថា ខ្លួននឹងពន្យារពេលការបើកដំណើរការរោងចក្ររបស់ខ្លួននៅសហរដ្ឋអាមេរិកដែលស្ថិតនៅរដ្ឋ North Carolina ក្នុងរយៈពេលបីឆ្នាំ គឺរហូតដល់ឆ្នាំ 2028 ដើម្បីគ្រប់គ្រងការចំណាយរយៈពេលខ្លី “កាន់តែមានប្រសិទ្ធភាព” និងផ្តោតលើធនធានលើគោលដៅកំណើនរយៈពេលខ្លី។ ថ្មីៗនេះ VinFast ត្រូវបានគេដឹងថាបាននឹងកំពុងធ្វើការសាកល្បងរថយន្តស៊េរីថ្មីម៉ូដែល VF e35 និង VF5 ប៉ុន្តែមិនទាន់មានព័ត៌មានផ្លូវការណាមួយបញ្ជាក់ពីការបង្ហាញខ្លួនរថយន្តម៉ូដែលទាំងពីរនេះនៅលើទីផ្សាររថយន្តអាមេរិកនោះទេ៕
