SGMW បង្ហាញចេញគំរូរថយន្តដំបូងឈ្មោះថា Light of ASEAN ដែលមានទ្វារបើកត្រដាងដូចស្លាបបក្សី

កាលពីថ្ងៃទី 24 ខែកញ្ញា ម្សិលមិញនេះ សម្ព័ន្ធក្រុមហ៊ុនរួមគ្នា SAIC-GM-Wuling ហៅកាត់ថា SGMW បានធ្វើការបង្ហាញចេញគំរូរថយន្តប្រណិតដំបូងរបស់ខ្លួននៅក្នុងសន្និសិតដែលប្រារព្ធធ្វើឡើងនៅទីក្រុងណាននីង ប្រទេសចិន។ គំរូរថយន្តប្រណិតមួយនេះត្រូវបានកកើតឡើងដោយការបណ្តាក់ទុនរួមគ្នារវាងក្រុមហ៊ុនផលិតរថយន្តអគ្គិសនីអគ្គិសនីធំរបស់ប្រទេសចិន ហើយបានប្រើឈ្មោះថា “Light of ASEAN” ឬ “ពន្លឺនៃអាស៊ាន”។

តាមគំរូរថយន្តប្រណិតមួយនេះ ត្រូវបានរចនាឡើងជាប្រភេទរថយន្ត Sedan ដែលមានទ្វារបើកឡើងលើត្រដាងស្លាបដូចសត្វបក្សី ឬហៅថា gull-wing doors។ ទ្វារចំហៀងសងខាងរបស់រថយន្តនេះត្រូវបានរចនាឡើងតែពីរប៉ុណ្ណោះ ដែលខុសពីរថយន្ត Sedan ផ្សេងទៀតដែលមានទ្វារបួន។

ផ្នែកខាងមុខរបស់ Light of ASEAN ត្រូវបានរចនាឡើងមានរាងជាអក្សរ X រំលេចជាមួយអំពូលភ្លើង LED Light-strip រចនាតូចស្លីមរចនាអូសកាត់ពីម្ខាងទៅម្ខាង។ ផ្នែកទាក់ទាញខ្លាំងបំផុតសម្រាប់ការរចនារបស់រថយន្ត Light of ASEAN គឺជាទ្វារបើកត្រដាងស្លាបទៅលើធំទាំងសងខាងដែលធ្វើគ្របបិទជិតទាំងផ្នែកកៅអីមុខ និងខាងក្រោយតែម្តង ដែលមានន័យថា រថយន្តនេះមិនប្រើគ្រោងឆ្អឹងកណ្តាលដូចរថយន្ត Sedan ដទៃទៀតឡើយ។

នៅក្នុងសន្និសិទម្សិលមិញនេះសម្ព័ន្ធក្រុមហ៊ុន SGMW ក៏បានប្រកាសអំពីយុទ្ធថ្មីសម្រាប់ប្រទេសក្នុងតំបន់សាស្ត្រអាស៊ានផងដែរ គឺគម្រោង “មួយ ពីរ បី” របស់ខ្លួនក្នុងការកសាងខ្សែសង្វាក់ឧស្សាហកម្មរថយន្តដំណើរការដោយថាមពលអគ្គិសនីថ្មីនៅក្នុងបណ្តាប្រទេសអាស៊ានទាំងដប់នៅឆ្នាំ 2030 ដែលរួមមានទាំងការផលិតយានយន្ត ការលក់ សេវាកម្ម ហិរញ្ញវត្ថុ ប្រព័ន្ធបង្កើតថាមពល ការគ្រប់គ្រងប្រព័ន្ធអេឡិចត្រូនិច និងប្រព័ន្ធបើករថយន្តអគ្គិសនីឆ្លាតវៃ intelligent electric drive ជាដើម។

មកដល់ពេលនេះ SGMW បាននាំចេញរថយន្តរបស់ខ្លួនទៅកាន់ប្រទេស និងតំបន់ជាង 104 នៅទូទាំងពិភពលោកជាមួយនឹងការនាំចេញសរុបជាង 1.07 លានគ្រឿងគិតត្រឹមខែសីហា ឆ្នាំ 2024 ដែលស្មើនឹងទឹកប្រាក់សុទ្ធសរុបប្រមាណ 6.615 ពាន់លានដុល្លារអាមេរិក។ 

ជាងនេះទៅទៀត រថយន្តអគ្គិសនីសុទ្ធថ្មីគ្រឿងទី 2 លានរបស់ SGMW បានចាប់ផ្តើមដំណើរការផលិតនៅចុងខែសីហា។ បច្ចុប្បន្ន SGMW បានធ្វើការចេញលក់រថយន្តស៊េរីដូចជា Wuling Red Label, Wuling Silver Label និងរថយន្តម៉ាក Baojun៕