ក្រោយពីហក់ចូលប្រឡូកនៅក្នុងវិស័យយានយន្តដំណើរការដោយថាមពលអគ្គិសនីជាមួយការបង្ហាញចេញវត្តមាន និងបានចេញលក់ផ្លូវការណ៍រថយន្តអគ្គិសនីដំបូងម៉ូដែល SU7 រួចមក ក្រុមហ៊ុនផលិតស្មាតហ្វូន និងគ្រឿងបរិក្ខាអេឡិចត្រូនិកខ្នាតយក្សរបស់ប្រទេសចិន Xiaomi ពិតជាទទួលបានការចាប់អារម្ម និងទទួលបានការគាំទ្រខ្លាំងមែនទែនពីសំណាក់អ្នកប្រើប្រាស់។
.jpg)
SU7 មានសមាជិកចំនួនបី គឺ SU7, SU7 Pro និង SU7 Ultra ដែលបច្ចុប្បន្ន SU7 និង SU7 Pro ត្រូវបានក្រុមហ៊ុនធ្វើការចេញលក់នៅលើទីផ្សារជាផ្លូវការណ៍រួចហើយ នៅឡើយតែម៉ូដែល Ultra មិនទាន់ត្រូវបានក្រុមហ៊ុនធ្វើការប្រកាសចេញ និងចេញលក់ផ្លូវការណ៍នៅឡើយទេ។
យ៉ាងណាមិញកាលពីអំឡុងខែកក្តដា កន្លងទៅ Xiaomi បានធ្វើការដាក់តាំងបង្ហាញគំរូរបស់ Xiaomi SU7 Ultra ជាផ្លូវការណ៍ហើយក៏ទទួលបានការចាប់អារម្មខ្លាំង និងក្រោយៗមកទៀតមានការទម្លាយចេញនៅព័ត៌មានសំខាន់ៗជាច្រើនរបស់ SU7 Ultra។ រថយន្តអគ្គិសនីដែលជាបងធំក្នុងត្រកូល SU7 របស់ Xiaomi មួយនេះ ត្រូវបានក្រុមហ៊ុនធ្វើការរចនាឡើងជាប្រភេទរថយន្ត Supercar Sport EV ដែលត្រូវបានគេដឹងថាមានបំពាក់នូវប្រព័ន្ធម៉ូទ័រអគ្គិសនីចំនួន 3 ដែលអាចផលិតកំលាំងបានដល់ទៅ 1,548 សេះឯណោះ។
បើតាមប្រភពព័ត៌មានចុងក្រោយនេះបានបញ្ជាក់ថា Xiaomi SU7 Ultra នឹងបង្ហាញវត្តមានលើទីផ្សារជាផ្លូវការណ៍នៅដើមឆ្នាំ 2025 ហើយសម្រាប់សង្វាក់ផលិតកម្មនៃកំពូលរថយន្តអគ្គិសនីមួយនេះនឹងត្រូវចាប់ផ្តើមនាថ្ងៃទី 29 ខែតុលា ស្អែកនេះ។
ដោយថ្ងៃទី 29 ខែតុលា ស្អែកនេះ គឺត្រូវបានគេដឹងថា ជាថ្ងៃដែល Xiaomi បើកបង្ហាញវត្តមានកំពូលស្មាតហ្វូនជំនាន់ថ្មី Xiaomi 15 និង Xiaomi 15 Pro ដូច្នេះ មានន័យថា ក្រុមហ៊ុននឹងប្រើព្រឹត្តិការណ៍ស្អែកនេះក្នុងការប្រកាសចេញស្មាតហ្វូន និងផលិតផលជំនាន់ថ្មីផង និងប្រកាសចេញពីការចាប់ផ្តើមសង្វាក់ផលិតកម្ម Xiaomi SU7 Ultra ផង។ បើតាមការបញ្ជាក់ពីស្ថាបនិក និងជានាយកប្រតិបត្តិ Xiaomi លោក Lei Jun សម្រាប់សង្វាក់ផលិតកម្មសម្រេចរបស់ Xiaomi SU7 Ultra គឺនឹងដូចគំរូរថយន្តដែលបានបង្ហាញ ដូចជាការរចនារូបរាង សមាសធាតុផលិត ប្រព័ន្ធម៉ូទ័រអគ្គិសនី 3 និងកញ្ចប់ថាមពលថ្មជាដើម។
ទោះជាយ៉ាងណាលោក Lei Jun បានបញ្ជាក់ថា សម្រាប់សមាធាតុផលិតតួរពីសារធាតុកាបោននឹងមានការកាត់បន្ថយខ្លះដើម្បីរក្សាតម្លៃមិនឲ្យថ្លៃខ្ពស់ពេក។ សម្រាប់គំរូរថយន្ត Xiaomi SU7 Ultra ដែលបានបង្ហាញនាពេលកន្លងមកបានបញ្ជាក់ថា រថយន្ត Supercar sport មួយនេះអាចជាន់ស្ទុះល្បឿនពី 0 ទៅ 100km/h ប្រើពេលប្រមាណតែ 1.97 វិនាទីប៉ុណ្ណោះ និងជាន់ពី 0 ទៅ 200km/ ប្រើពេលប្រមាណ 5.96 វិនាទី ហើយនិងអាចជាន់ល្បឿនលឿនបំផុត Top Speed បានដល់ 350km/h។ សម្រាប់តម្លៃបឋមរបស់ Xiaomi SU7 Ultra ដែលត្រូវបានគេទម្លាយចេញចុងក្រោយនេះ គឺខ្ទង់ជាង 11 ម៉ឺនដុល្លារអាមេរិក៕
