LG G6 ដែលជាស្មាតហ្វូនស៊េរីថ្មីបំផុតរបស់ក្រុមហ៊ុន LG ដែលគ្រប់ៗគ្នាកំពុងតែរង់ចាំនោះ បានបង្ហាញខ្លួន ក៏ដូចជាចេញលក់ជាផ្លូវការនៅក្នុងទីផ្សារប្រទេសកម្ពុជាហើយ នៅក្នុងថ្ងៃនេះដែលមានតម្លៃ 666 ដុល្លា នេះបើយោងតាមការបញ្ជាក់ក្រុមហ៊ុន ggear ដែលជាអ្នកចែកចាយផលិតផល LG នៅក្នុងប្រទេសកម្ពុជា។ ដំណិឹងនេះ អាចចាត់ទុកថា គឺជាឱកាសដ៏ល្អមួយសំរាប់ប្រិយមិត្តទាំងអស់របស់ LG G6 ដែលកំពុងតែចង់បានផលិតផលផ្លូវការ ដែលចេញកលក់ដោយក្រុមហ៊ុន LG និងមានការធានាត្រឹមត្រូវពីក្រុមហ៊ុន។ ហើយស្មាតហ្វូន LG G6 ដែលចេញលក់នៅពេលនេះ គឺប្រើប្រាស់នូវរ៉េម ទំហំ 4GB និងម៉េមូរីក្នុងម៉ាស៊ីនទំហំ 64GB ហើ។
គួរបញ្ជាក់ថា ស្មាតហ្វូន LG G6 មានអេក្រង់ទំហំ 5.7 អ៊ីងកម្រិត IPS LCD ដែលក្រុមហ៊ុន LG ហៅឈ្មោះថា FullVision ដែលបន្ទះអេក្រង់នេះគឺមានកំរិត 18:9 Aspect Ratio និងកម្រិតភាពច្បាស់ 2880x1440 ភិចសែលជាមួយនឹងកម្រិតដង់ស៊ីតេ 565ppi ។ ស្មាតហ្វូនស៊េរីថ្មី LG G6 មានជ្រុងមូលដែលធន់ទៅនឹងការជ្រុះធ្លាក់ដោយសារតែវាប្រើប្រាស់នូវកញ្ចក់ការពារខាងក្រៅ Gorilla Glass 5 និងស្រោបដោយអាលុយមីញ៉ូមពីខាងក្រៅ។ អ្វីដែលកាន់តែ ទាក់ទាញទៀតនោះ ស្មាតហ្វូនថ្មីនេះ ប្រើប្រាស់នូវប្រព័ន្ធការពារការពារការជ្រាបទឹក និងការពារធូលី (IP68) ។
ទូរស័ព្ទ LG G6 ប្រើប្រាស់នូវប្រព័ន្ធកាមេរ៉ាភ្លោះ: Wide Angle ទំហំ 13 មេហ្គាភិចសែល និង Normal ដែលមានទំហំ 13 មេហ្គាភិចសែលដែលខុសពីកាមេរ៉ាភ្លោះរបស់ LG G5 ប្រើប្រាស់ប្រព័ន្ធកាមេរ៉ាភ្លោះ 16MP + 8MP ។ កាមេរ៉ា Normal ប្រើប្រាស់នូវមុខងារ OIS និង Autofocus ហើយកាមេរ៉ាខាងមុខរបស់ស្មាតហ្វូន LG G6 នឹងមានទំហំ 5 មេហ្គាភិចសែល។ស្មាតហ្វូន LG G6 ប្រើប្រាស់នូវបន្ទះឈីប Snapdragon 821 ដោយសារតែក្រុមហ៊ុនបច្ចេកវិទ្យា Samsung រក្សាទុកនូវបន្ទះឈីប Snapdragon 835 សម្រាប់ប្រើប្រាស់នៅលើស្មាតហ្វូន Galaxy S8 របស់ខ្លួន។ ក្រុមហ៊ុន LG ផ្តោតទៅលើការបង្កើនប្រសិទ្ធិភាពជាជាងការប្រើប្រាស់នូវបន្ទះឈីបដែលខ្លាំង ហេតុនេះទើបស្មាតហ្វូន LG G6 ប្រើប្រាស់នូវបំពង់បំភាយកម្តៅដើម្បីធ្វើយ៉ាងណាកុំឱ្យស្មាតហ្វូននេះនេះក្តៅខ្លាំងនៅពេលកំពុងប្រើប្រាស់។ ស្មាតហ្វូន LG G6 ប្រើប្រាស់នូវរ៉េមផ្ទុកទិន្នន័យបណ្តោះអាសន្នទំហំ 4GB និងម៉េមូរីក្នុងម៉ាស៊ីនទំហំ 64GB ហើយវាក៏មានរន្ធដោតបន្ថែមនូវ microSD កាតថែមទៀត។
ស្មាតហ្វូន LG G6 ដំណើរការជាមួយនឹងប្រព័ន្ធប្រតិបត្តិការ Android 7.0 Nougat និងប្រើប្រាស់នូវប្រព័ន្ធ Google Assistant ផងដែរ។ វាប្រើប្រាស់នូវ Full Screen UX នៅលើផ្នែកខាងលើនៃប្រព័ន្ធប្រតិបត្តិការផងដែរ។ ស្មាតហ្វូន LG G6 ប្រើប្រាស់នូវថាមពលថ្មខ្លាំងកម្លាំង 3300mAh និងបច្ចេកវិទ្យា QuickCharge 3.0 ដែលអាចបញ្ជូលថ្មពេញបានរយៈពេល 96 នាទី ហើយវាអាចបញ្ចូលថ្មបាន 50% ចំណាយពេលត្រឹមតែ 32 នាទីប៉ុណ្ណោះ។ស្មាតហ្វូន LG G6 មានវិមាត្រដល់ទៅ 148.9 x 71.9 x 7.9 mm ដែលមានរូបរាងតូចជាង Samsung Galaxy S7 Edge និងមាន 3 ពណ៌សម្រាប់ធ្វើការជ្រើសរើសគឺពណ៌ខ្មៅ (Astro Black), ពណ៌ស (Mystic White) និងពណ៌ប្រផេះ( Ice Platinum) ៕