កាលពីថ្ងៃទី 8 ខែសីហា ឆ្នាំ 2017 កន្លងទៅនេះ ក្រុមហ៊ុន ASUS Republic of Gamers (ROG) បានធ្វើការប្រកាសជាផ្លួវការ ពីការអោយបើកចូលរួម ប្រកួតព្រឹត្តិការណ៍កីឡាអេឡិចត្រូនិក ROG Masters 2017 ដែលមានការចូលរួមពីក្រុមជំនាញៗជាច្រើន ជុំវិញពិភពលោក ដើម្បីធ្វើការប្រកួតយកប្រាក់រង្វាន់ដល់ទៅ $500,000 ។ ការប្រកួតកីឡាអេឡិចត្រូនិក នេះត្រូវបានបែងចែកជា ពីរប្រភេទសម្រាប់ធ្វើការប្រកួតប្រជែង គឺ Dota 2 និង Counter Strike Global Offensive ។
សម្រាប់ក្រុមដែលចង់ចូលរួម ប្រកួតនៅក្នុងព្រឹត្តិការណ៍នេះ ត្រូវធ្វើការចុះឈ្មោះសមាជិកក្រុម ចាប់ពីថ្ងៃទី 14 សីហា រហូតដល់ថ្ងៃទី 20 សីហា។ ដើម្បីធ្វើការចុះឈ្មោះ អ្នកត្រូវចូលទៅកាន់គេហទំព័រ ROG Masters ហើយជ្រើសរើស តំបន់(Region) ហើយចុចយក APAC បន្ទាប់មកជ្រើសរើសប្រភេទហ្គេមដែលក្រុមអ្នកចូលចិត្ត ។ តំណរភ្ជាប់ចុះឈ្មោះក្រុម អាចចុចលើនេះបាន https://goo.gl/qijcrA ។ បន្ទាប់ពីធ្វើការចុះឈ្មោះក្រុមរួចហើយ សូមធ្វើការរងចាំ ធ្វើការប្រកួត Online ជាមួយនឹងក្រុមផ្សេងៗទៀតបាននៅក្នុងចន្លោះពីថ្ងៃទី 22 សីហា ដល់ថ្ងៃទី 26 សីហា ឆ្នាំ 2017ខាងមុខ។
សូមជំរាបថា ការប្រកួតបានចាប់ផ្តើមតាំងពីខែឧសភា ឆ្នាំ 2017 កន្លងទៅ ដោយធ្វើការប្រកួតប្រជែងជម្រុះ តាមបណ្តាប្រទេស ចំនួន 30 រួចមកហើយ ដោយធ្វើការជម្រើសយកក្រុមជើងឯកតាមទ្វីបចំនួន 4 ក្រុម (EMEA, Americas, APAC, China)។ ក្រុមដែលបានចូលរួមប្រកួត ដែលឈ្នះ នឹងធ្វើការប្រកួតជម្រុះជុំ តាមតំបន់ទាំងបួននេះ និងប្រកួតបន្តទៀត ដើម្បីធ្វើការដណ្តើមកៅអីទៅជុំផ្តាច់ព្រាត់នៅខែវិច្ឆកា ឆ្នាំ 2017 ។
តាមប្រសាសន៍របស់លោក Derek Yu ដែលជាប្រធានផ្នែកទីផ្សារ ROG បានលើកឡើងថា អស់រយៈពេលជាងមួយទសវត្សកន្លងមកនេះ ROG តែងតែជាម៉ាកសញ្ញានាំមុខទៅលើគ្រឿងផ្គុំ (Hardware) សម្រាប់ប្រើប្រាស់លេងហ្គេម នៅលើពិភពលោក ហើយនៅឆ្នាំមុន យើងបានធ្វើការរៀបចំកម្មវិធីយ៉ាងពិសេស ទៅអោយសហគមន៍ កីឡាអេឡិចត្រូនិក ទាំងអស់អាចធ្វើការទស្សនា នឹងប្រកួតបាននៅក្នុងព្រឹត្តិការណ៍ ROG Masters លើកទី 1 ។ ដោយសារតែមានការគំាទ្រយ៉ាងខ្លាំង។ ឆ្នាំនេះ ពួកយើង បានរៀបចំព្រឹត្តិការណ៍ ROG Masters លើកទី 2 ដោយធ្វើការអញ្ញើញ ក្រុមជំនាញៗ និងក្រុមដែលទើបចាប់ផ្តើមមកពី 30 ប្រទេសផ្សេងៗគ្នាទូទាំងទ្វីបចំនួន 5 មកធ្វើការប្រកួតប្រជែងដណ្តើមជើងឯក ។