ថ្ងៃទី 21 សីហា 2017 នៅសណ្ឋាគារសូហ្វីតែលភ្នំពេញ ក្រុមហ៊ុន Smart និង Huawei បានរួមគ្នាបង្ហាញ 4.5G រឺ LTE Advance Pro ដែលជាបច្ចេកវិទ្យាថ្មី អាចបង្កើនប្រសិទ្ធភាពបណ្តាញទូរស័ព្ទ ដែលនឹងផ្តល់ជូនអតិថិជន Smart នូវអ៊ិនធឺណិតល្បឿនលឿនជាងមុខ រួមផ្សំជាមួយបទពិសោធន៍ និងការកម្សាន្តផ្សេងទៀតដែលផ្តល់ជូនដោយ Smart នៅលើសេវា 4G+ និង 4.5G នៅពេលនេះ។ ពិធីប្រកាសដាក់ដំណើរការបច្ចេកវិទ្យា 4.5G ជាផ្លូវការនៅកម្ពុជានៅពេលនេះ គឺប្រព្រឹត្តិទៅក្រោមវត្តមានរបស់ ឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍កម្ពុជា រួមជាមួយនិងភ្ញៀវកត្តិយសជាច្រើនទៀត។
ក្រុមហ៊ុន Smart បានប្តេជ្ញាចិត្តថា នឹងបង្កើនសមត្ថភាពរបស់ខ្លួនអោយបានកាន់តែខ្លាំង នៅក្នុងការជម្រុញការអភិវឌ្ឍន៍ និងភាពរីកចម្រើនផ្នែកទូរគមនាគមន៍ និងអ៊ិនធឺណិតចល័តនៅព្រះរាជាណាចក្រកម្ពុជា។ សូមជំរាបថា នៅក្នុងឆ្នាំ 2014 Smart បានក្លាយទៅជាប្រតិបត្តិករដំបូងបង្អស់នៅកម្ពុជាដែលផ្តល់ជូនសេវា 4G LTE ។ ក្នុងឆ្នាំ 2016 ក្រុមហ៊ុន Smart បានចាប់ផ្តើមដំណើរការ 4G + ហើយបានពង្រីកសេវា 4G របស់ខ្លួននៅគ្រប់២៥ រាជធានីខេត្ត។ នៅក្នុងឆ្នាំ 2017 Smart បានដាក់ដំណើរការ 4G + ជាមួយ HD Voice ឬ VoLTE ដើម្បីបង្កើនបទពិសោធន៍សំលេងលឺច្បាស់ជាងមុន និង បន្តភាពឈានមុខរបស់ខ្លួនក្នុងការផ្តល់សេវាអ៊ិនធឺណិតល្បឿនលឿននៅកម្ពុជា។
ក្រុមហ៊ុន Smart បានបញ្ជាក់ថា បណ្តាញ 4.5G លឿនជាង 4G ធម្មតារហូតដល់ 8 ដង។ អាស្រ័យទៅតាមទំហំហ្វ្រេកង់ស៍ដែលមាន បច្ចេកវិទ្យានេះ អាចសម្រេចបាននូវល្បឿនអតិបរមា 1Gbps ជាមួយទូរស័ព្ទម៉ូដែលចុងក្រោយបំផុតរបស់ក្រុមហ៊ុន Samsung ក្រុមហ៊ុន Sony និងក្រុមហ៊ុន Huawei ។ គេរំពឹងថា ក្រុមហ៊ុនផលិតស្មាតហ្វូនកាន់តែច្រើននឹងបញ្ចូលមុខងារគាំទ្របច្ចេកវិទ្យានេះតាមរយៈការ upgrade សុហ្វវ៊ែរនៅក្នុងរយៈពេលប៉ុន្មានខែខាងមុខនេះ។ ការប្រើប្រាស់បច្ចេកវិទ្យា 256QAM 4x4 MIMO និងពហុបណ្តាញរួមគ្នា (Multi Carrier Aggregation) បណ្តាញសេវារបស់ Smart អាចសម្រេចបានរហូតដល់ 600 Mbps នៅក្នុងតំបន់មួយចំនួន គិតមកដល់បច្ចុប្បន្ន * ។
លោក ថូម៉ាស ហ៊ុន បានពន្យល់ថា “យើងប្រឹងប្រែងឲ្យក្លាយជាក្រុមហ៊ុនទូរគមនាគមន៍ដែលរីកចម្រើនបំផុតនៅកម្ពុជា។ Smart នៅតែបន្តធានាអោយបានថា អតិថិជនរបស់យើងអាចទទួលបានសេវាកម្មល្អបំផុត។ យើងបានបោះទុនវិនិយោគចំនួន 75 លានដុល្លារនៅឆ្នាំ 2016 និង 80 លានដុល្លារទៀតក្នុងឆ្នាំនេះ ដើម្បីពង្រីកនិងកែលម្អបណ្តាញ ដើម្បីផ្តល់ជូនសេវាអ៊ិនធឺណិត និងសេវាកម្មបែបឌីជីថលនានាបន្ថែមទៀត។
បន្ទាប់ពីបានក្លាយជាប្រតិបត្តិករដំបូងបង្អស់ដែលនាំយក 4G LTE និង 4G + មកកម្ពុជា ឥឡូវនេះយើងនាំមកនូវ 4.5G ដល់កម្ពុជាទៀត ហើយ 5G ក៏នឹងគង់តែនាំមកដែរ. លោកបាននិយាយថា Smart កំពុងតែសិក្សាលទ្ធភាពបច្ចេកវិទ្យា 5G ដែលរួមមានបច្ចេកវិទ្យា Massive MIMO ដើម្បីធានាថាខ្លួនបានត្រៀមរួចរាល់ សម្រាប់ពេលដែលបទដ្ឋាននិងបច្ចេកវិទ្យានេះបានមកដល់។ ទោះបីជាវានៅថ្មីថ្មោងក៏ដោយ គេរំពឹងថា 5G នឹងនាំមកនូវល្បឿន ជាច្រើន Gbps សមត្ថភាពបណ្តាញធំទូលាយ ភាពយឺតយ៉ាវទាប និងសមត្ថភាពតភ្ជាប់ភ្លាមៗទៅនឹងឧបករណ៍ក្នុងពេលដំណាលគ្នា។ អ្នកជំនាញខាងផ្នែកនេះរំពឹងថា ការចាប់ផ្តើមដំណើរការបច្ចេកវិទ្យា 5G នឹងមកដល់នៅឆ្នាំ 2020 ។
លោក David Li អគ្គនាយកក្រុមហ៊ុន Huawei Technologies Cambodia បានមានប្រសាសន៍ថា “ខ្ញុំមានសេចក្តីរីករាយណាស់ដែលរួមសហការជាមួយក្រុមហ៊ុន Smart ដោយនាំយកបណ្តាញ 4.5G មកកម្ពុជា ហើយនឹងការខិតទៅរកបច្ចេកវិទ្យាជំនាន់ក្រោយ ។ ការវិវត្តន៍នៃបច្ចេកវិទ្យា 4.5G ពិតជានឹងនាំមកនូវការអភិវឌ្ឍសំខាន់ៗពីលើ 4G ដែលមាននៅពេលបច្ចុប្បន្ននេះ ក៏ដូចជាដើរតួនាទីជាស្ពានឆ្ពោះទៅរកបច្ចេកវិទ្យា 5G នាពេលអនាគត ដែលវានឹងគាំទ្រសេវានានារួមមាន សេវា Mobile Cloud Service ការទស្សនាវីដេអូក្នុងកម្រិត 4K Virtual Reality, Internet of Things និងបច្ចេកវិទ្យាអស្ចារ្យជាច្រើនទៀត។
