បន្ទាប់ពីបានប្រកាសចូលខ្លួនមកកាន់ទីផ្សារស្មាតហ្វូននៃព្រះរាជាណាចក្រកម្ពុជា កាលពីខែកក្កដាកន្លងទៅថ្មីៗនេះ! នៅថ្ងៃនេះ ក្រុមហ៊ុន Falcon Tech ដែលទើបតែបានចាប់ដៃគូជាផ្លូវការជាមួយនឹង Apple Inc កាលពីពេលថ្មីនេះ បានប្រកាសថា ខ្លួននឹងនាំយកនូវស្មាតហ្វូន iPhone 6 ស៊េរី 2017 មកកាន់ទីផ្សារកម្ពុជា សារជាថ្មីម្តងទៀត ដែលស្មាតហ្វូនថ្មីនេះ ត្រូវបានក្រុមហ៊ុនច្នៃប្រឌិតជាមួយនិងរចនាបថថ្មី ដោយបានបំពាក់នូវទំហំផ្ទុកថ្មីទំហំ 32GB ដែលជាសមល្មមនឹងតម្រូវរបស់អ្នកប្រើប្រាស់នៅក្នុងប្រទេសកម្ពុជាតែម្តង។
តាមប្រសាសន៍របស់លោក Jim ដែលជានាយកគ្រប់គ្រង Falcon Tech Co., Ltd បានបញ្ជាក់ប្រាប់ ទស្សនាវដ្តី ពិភពអេឡិចត្រូនិក យ៉ាងដូច្នេះថា លោកពិតជាមានមោទកភាពខ្លាំងណាស់ ដែលបានចាប់ដៃគូជាមួយនិងក្រុមហ៊ុន Apple Inc នៅក្នុងការនាំមកនូវផលិតផល Apple មកកាន់កម្ពុជា ហើយពេលនេះ ក្រុមហ៊ុនរបស់លោក បានសម្រេចនាំយកនូវទូរស័ព្ទ iPhone 6 មកកាន់ទីផ្សារប្រទេសកម្ពុជា សារជាថ្មីម្តងទៀត ជាមួយនឹងរូបរាង រចនាបទថ្មី និងមានទំហំផ្ទុកថ្មីគឺ 32GB ដែលសមល្មមទៅនឹងតម្រូវការប្រើប្រាស់នាពលបច្ចុប្បន្ន ដោយមិនធំពេក និងមិនតូចពេក គឺល្មមប្រើតែម្តង ជាពិសេស គឺវាប្រើប្រាស់នូវវត្ថុធាតុដើមដូចគ្នាទៅហ្នឹងទូរស័ព្ទ iPhone7 អញ្ចឹងដែរ។
លោក Jim បានបន្តថា ជាមួយនឹងការមកដល់របស់ទូរស័ព្ទ iPhone 6 ស៊េរី 2017 ថ្មី នាពេលនេះ គឺអតិថិជននៅកម្ពុជា នឹងទទួលបាននូវអត្ថប្រយោជន៍យ៉ាង ទាំងតម្លៃ ក៏ដូចជាសេវាផ្សេងៗ រួមមានដូចជា ការបង់រំលស់ដោយគ្មានការប្រាក់ពីក្រុមហ៊ុន AEON រយៈពេលចំនួន 6 ខែ រួមជាមួយនិងការថែមជូននូវកញ្ចប់សេវាអ៊ីនធើណែតពីក្រុមហ៊ុន Smart រយៈចំនួន 6 ខែដូចគ្នា អ្វីដែលពិសេសបំផុតនោះ កឺមានការធានារយៈពេលមួយឆ្នាំពេញពីក្រុមហ៊ុន Apple ថែមទៀតផង ដូច្នេះជាមួយការជាវទូរស័ព្ទ iPhone 6 ស៊េរី 2017 នេះ អតិថិជន មិនចាំបាច់បារម្មណ៍ដូចកាលពីមុនឡើយ មានន័យថា លោកអ្នកមានការធានាពីក្រុមហ៊ុនរួចរាល់ហើយ។ លោកជឿជាក់ថា ជាមួយនឹងតម្លៃថ្មី 398 ដុល្លារ អតិថិជនទាំងអស់ នឹងរីករាយជាមួយនឹងការប្រើប្រាស់ទូរស័ព្ទថ្មីនេះ ដោយសារតែវាជាទូរស័ព្ទដែលបាននាំមកផ្ទាល់ពីក្រុមហ៊ុន Apple។ លោកបានបញ្ជាក់បន្ថែមទៀតថា iPhone 6 ស៊េរី 2017 ថ្មីនេះ មានតែមួយពណ៌ប៉ុណ្ណោះ គឺពណ៌មាស ( Gold) ហើយអតិថិជន អាចរកជាវបាននៅគ្រប់ហាងលក់ទូរស័ព្ទដៃទាំងអស់នៅទូទាំងព្រះរាជាណាចក្រកម្ពុជា។
Jim បានបញ្ជាក់យ៉ាងច្បាស់ថា Falcon Tech Co., Ltd គឺជាក្រុមហ៊ុនថ្មីមួយ ដែលទើបតែបង្កើតឡើងនៅក្នុងឆ្នាំ 2017 នេះ ហើយបានក្លាយជាអ្នកតំណាងចែកចាយដោយស្របច្បាប់ និងផ្លូវការ នៅក្នុងការនាំចូលផលិតផល Apple មកកាន់ទីផ្សារប្រទេសកម្ពុជា។ ចាប់ពីពេលនេះ អតិថិជនរបស់ Apple ទាំងអស់ នឹងមានមោទកភាពចំពោះការមកដល់របស់ Apple ផ្លូវការនៅ ពេលនេះ ដោយអតិថិជន អាចជាវ និងប្រើប្រាស់ផលិតផល ដែលមានគុណភាពខ្ពស់ ដោយមានការបង់ពន្ធរួចរាល់ 100% គ្មានការបន្លំ និងជាផលិតផលថ្មី ដែលចេញពីរោងចក្រផ្ទាល់ (All in one box) តែម្តង។ ជាពិសេស គឺមានការធានាផ្លូវការមួយឆ្នាំពីក្រុមហ៊ុន Apple ដែលមិនធ្លាប់មានពីមុនមកសម្រាប់អ្នកប្រើប្រាស់នៅក្នុងប្រទេសកម្ពុជា។
គួរបញ្ជាក់ថា iPhone 6 ត្រូវបានរចនាជាមួយនិងរូបរាងឡូយ និងមានអេក្រង់ទំហំ 4.7 អ៊ីង (Retina Display) អាចទ្រទ្រង់បានជាមួយ នឹងទំហំរូបភាព 750 x 1,334 pixels និងមានកាមេរ៉ាទំហំ 8 មេហ្កាភិចសែល អមមកជាមួយនូវបចេ្ចកវិទ្យា OIS ដែលពិតជាពិសេសបំផុត។ ចំពោះថ្មរបស់វា គឺអាចកាន់បានយូជាងម៉ូដែលមុន។ ស្មាតហ្វូនស៊េរីថ្មី 2017 នេះ ត្រូវបានក្រុមហ៊ុន ដំឡើងមកជាមួយនូវបន្ទះឈីប A8 អមមកជាមួយនឹងអង្គប្រតិបត្តិការ M8 motion ហើយនិងបានអភិវឌ្ឍបន្ថែមនូវឧបករណ៍សំរាប់ភ្ជាប់ទៅកាន់បច្ចេកវិទ្យា LTE ដែលមានល្បឿនលឿនរហូតដល់ 150Mbps លើសពីនេះ វាក៏អាចទ្រទ្រង់ជាមួយមួយនឹងបច្ចេកវិទ្យាថ្មី AC Wi-Fi ផងដែរ។ សូមជំរាបថា iPhone 6 ស៊េរីថ្មី 2017 នឹងដំណើរការដោយប្រព័ន្ធប្រតិបត្តិការណ៍ iOS 10 ហើយនឹងអាច upgrade ទៅប្រព័ន្ធប្រតិបត្តិការណ៍ iOS 11 ជំនាន់ថ្មីនាពេលខាងមុខ។