កាលពីខែសីហាកន្លងទៅ លោកអ្នកប្រាកដជាបានដឹងរូចមកហើយថា មានការបែកធ្លាយនូវគំនិតនៃការរចនាមួយរបស់ស្មាតហ្វូន Huawei P11 ដែលបង្កើតឡើងដោយ DBS DESIGNING ហើយឥឡូវនេះ គឺយើងទទួលបាននូវគំនិតនៃការរចនាថ្មីមួយទៀតហើយរបស់ស្មាតហ្វូននេះ ដែលគឺជាគំនិតនៃការរចនារបស់ Concept Creator។ ការរចនាទៅលើគំនិតថ្មីនេះ ក៏មានបង្ហោះនៅក្នុងបណ្តាញសង្គម YouTube ផងដែរ តាមរយៈវីដេអូខាងក្រោមនេះ។
បើយើងផ្អែកទៅលើគំនិតនៃការរចនារូបរាងស្មាតហ្វូនស៊េរីថ្មីនេះ មើលទៅគឺពិតជារលោង និងទាក់ទាញចិត្តរបស់អ្នកប្រើប្រាស់មែនទែន។ ស្មាតហ្វូន Huawei P11 ដែលបង្ហាញខ្លួននៅក្នុងវីដេអូនេះ មិនមានស៊ុមព័ទ្ធអេក្រង់នោះទេសម្រាប់ផ្នែកគែមរបស់វា ហើយនៅផ្នែកខាងលើ និងផ្នែកខាងក្រោមគឺមានស៊ុមតូចស្តើងបំផុត។ ស្មាតហ្វូននេះ ត្រូវបានផលិតឡើងពីលោហៈធាតុ ហើយវាបំពាក់នូវប្រព័ន្ធកាមេរ៉ាភ្លោះនៅផ្នែកខាងក្រោយជាប់ជាមួយនឹងភ្លើង LED Flash ភ្លោះ ភ្លើង Dual-Tone Flash ភ្លោះ និង Laser Autofocus ផងដែរ។
ចំនែកនៅផ្នែកខាងក្រោមរបស់ស្មាតហ្វូននេះវិញ គេសង្កេតឃើញថា មានរន្ធដោតថាមពលថ្ម 3.5mm Headphone Jack ជាមួយនឹងឧបាល័រ និងរន្ធសាកថាមពលថ្មប្រភេទ Type-C USB ថែមទៀតផង។ លោកអ្នក នឹងនៅតែមើលឃើញនូវម៉ាកយីហោរបស់ Huawei នៅផ្នែកខាងក្រោមរបស់ទូរស័ព្ទនេះ ហើយប្រព័ន្ធស្កេនក្រយ៉ៅដៃក៏ស្ថិតនៅផ្នែកខាងក្រោយដែរ។ សម្រាប់ម៉ាកយីហោរបស់ LEICA អាចមើលឃើញយ៉ាងច្បាស់នៅផ្នែកខាងក្រោយផងដែរ។ ស្មាតហ្វូននេះ នឹងមាន 4 ពណ៌សម្រាប់ជ្រើសរើសគឺពណ៌ខ្មៅ ពណ៌ខៀវ ពណ៌ក្រហម និងពណ៌បៃតង។
អ្វីដែលគួរឱ្យកត់សម្គាល់ទៀតនោះគឺថា ស្មាតហ្វូននេះ ថែមទាំងមានភ្ជាប់ជាមួយនឹងប្រព័ន្ធកាមេរ៉ាភ្លោះ នៅផ្នែកខាងមុខដែលមានន័យថា ស្មាតហ្វូននេះមានកាមេរ៉ាចំនួន 4 គ្រាប់។ ស្មាត ហ្វូននេះ មានរូបរាងស្តើង ប៉ុន្តែប្រភពនេះ នៅមិនទានទម្លាយអំពីទំហំប្រវែងរបស់វានៅឡើយទេ។ អ្នករចនាម៉ូដទៅលើស្មាតហ្វូននេះ បានសន្មត់ថា ស្មាតហ្វូននេះ នឹងមានរ៉េមផ្ទុកទិន្នន័យបណ្តោះអាសន្នទំហំ 6GB និងម៉េមូរីក្នុងម៉ាស៊ីនទំហំ 128GB។ បន្ថែមពីនេះទៀត ស្មាតហ្វូននេះនឹងមិនបង្ហាញខ្លួននៅក្នុងប៉ុន្មានខែខាងមុខនេះ នោះទេ គឺប្រហែលជាបង្ហាញខ្លួននៅក្នុងខែកុម្ភៈឆ្នាំក្រោយ៕