រំលឹកដល់ការត្រឡប់មកវិញរបស់ក្រុមហ៊ុន Motorola មកកាន់ទីផ្សារប្រទេសកម្ពុជា ក្រោយពីការខកខានអស់រយៈពេលយូរគ្រាន់បើនោះ មើលទៅហាក់បីដូចជាមិនសូវជាកម្រើកសោះ ទាំងក្រុមហ៊ុន ក៏ដូចជាអ្នកចែកចាយ ឃើញថា ហាក់បីដូចជាស្ងប់ស្ងាត់មែនទែន ប្រៀបធៀបជាមួយនឹងបណ្តាក្រុមហ៊ុនទូរស័ព្ទចិនមួយចំនួន ដែលទើបតែបានមកដល់ដូចគ្នា។ ឥលូវនេះ ដើម្បីរួមចំណែកធ្វើអោយប្រិយមិត្តបានស្គាល់ស្មាតហ្វូនរបស់ក្រុមហ៊ុននេ កាន់តែច្រើន ក្រុមការងាររបស់ទស្សនាវដ្តី ពិភពអេឡិចត្រូនិក សូមនាំយកស្មាតហ្វូនស៊េរីថ្មីមួយម៉ូដែលមកបង្ហាញប្រិយមិត្ត នោះគឺ Moto G5S Plus ជាស្មាតហ្វួនដែលមានការរចនាប្លែកស្រស់ស្អាត និងផ្តោតសំខាន់ទៅលើបច្ចេកវិទ្យាកាមេរ៉ាភ្លោះ សម្រាប់ការថតរូបផងដែរ។
Moto G5S Plus គឺជាស្មាតហ្វូនស៊េរីថ្មីដែលមានការរចនារូបរាងស្រស់ស្អាតស៊ីវិល័យទាន់សម័យ និងទាក់ទាញចិត្តអ្នកប្រើប្រាស់។ ស្មាតហ្វូននេះមានការកែប្រែទៅលើលក្ខណៈពិសេសមួយចំនួនដូចជាការពង្រឹងទៅលើបច្ចេកវិទ្យាកម្រិតខ្ពស់នៃប្រព័ន្ធកាមេរ៉ា ការរចនារូបរាងស្រោបពីលោហៈធាតុ ការប្រើប្រាស់អេក្រង់រួមជាមួយនឹងប្រព័ន្ធប្រតិបត្តិការខ្លាំង ការពង្រឹងទៅលើប្រព័ន្ធថាមពលថ្ម និងប្រព័ន្ធសុវត្ថិភាពជាដើម។ បើក្រឡេកទៅមើលផ្នែកខាងមុខរបស់ស្មាតហ្វូននេះគេសង្កេតឃើញមានអេក្រង់ទំហំ 5.5 អ៊ីង ដែលផ្នែកខាងលើរបស់ស្មាតហ្វូននេះមានកាមេរ៉ា ឧបាល័រ (នៅក្រោមវាមានពាក្យថា moto) និងសេនស័រ ចំនែកផ្នែកខាងក្រោមគេសង្កេតឃើញមានប៊ូតុង Home សម្រាប់ប្រើប្រាស់ជាមួយនឹងមុខងារស្កេនក្រយ៉ៅដៃថែមទៀតផង។
ក្រឡេកទៅមើលគែមផ្នែកខាងស្តាំរបស់ស្មាតហ្វូននេះវិញ គេសង្កេតឃើញមានប៊ូតុងចំនួន 3 គឺប៊ូតុងបិទបើក ប៊ូតុងឡើងចុះសំឡេង ហើយនៅផ្នែកបាតរបស់ស្មាតហ្វូននេះគេសង្កេតឃើញមានរន្ធសម្រាប់សាកថាមពលថ្ម USB 2.0 និងឧបាល័របំពងសំឡេងដែលមានរន្ធចំនួន 5 ផងដែរ។ ក្រឡេកទៅមើលផ្នែកខាងក្រោយរបស់ស្មាតហ្វូននេះគេអាចមើលឃើញកាមេរ៉ាភ្លោះស្ថិតនៅលើភ្លើង LED Flash និងតួអក្សរ M ដែលតំណាងឱ្យម៉ាកយីហោរបស់ក្រុមហ៊ុនបច្ចេកវិទ្យា Motorola ថែមទៀតផង។
ក្រៅពីការរចនារូបរាងដ៏ស្រស់ស្អាតជាមួយនឹងការស្រោបដោយលោហៈធាតុរួចមក ស្មាតហ្វូននេះផ្តោតសំខាន់ទៅលើបច្ចេកវិទ្យានៃប្រព័ន្ធកាមេរ៉ាភ្លោះទំហំ 13MP ភ្ជាប់ជាមួយនឹងមុខងារសំខាន់ៗដូចជា f/2.0, Autofocus, Face Detection, Self-Timer, Digital Zoo, Geo Tagging, ISO Control, White Balance, Burst Mode, HDR, Panorama និងការថតវីដេអូនៅក្នុងកម្រិតដល់ទៅ 3840 x 2160 ភិចសែល រួមជាមួយនឹងប្រព័ន្ធកាមេរ៉ាមុខទំហំ 8MP ថែមទៀតផង។ ស្មាតហ្វូន Moto G5S Plus មាន 3 ពណ៌សម្រាប់ធ្វើការជ្រើសរើសគឺពណ៌មាស ពណ៌ប្រផេះ និងពណ៌ស។ ស្មាតហ្វូននេះប្រើប្រាស់អេក្រង់ទំហំ 5.5 អ៊ីញជាមួយនឹងកម្រិតភាពច្បាស់ 1080 x 1920 ភិចសែលកញ្ចក់ប្រភេទ IPS LCD Corning Gorilla Glass 3 សម្រាប់ការពារការកោសឆ្កូតថែមទៀតផង។
ស្មាតហ្វូន Moto G5S Plus បំពាក់នូវបន្ទះឈីបប្រភេទ ដែលមានអង្គគណនា និងក្រាហ្វិកកាតប្រភេទ ។ ស្មាតហ្វូននេះប្រើប្រាស់រ៉េមផ្ទុកទិន្នន័យបណ្តោះអាសន្នទំហំ 4GB និងម៉េមូរីក្នុងម៉ាស៊ីនទំហំ 64GB ហើយលោកអ្នកអាចធ្វើការបន្ថែមនូវម៉េមូរីប្រភេទ microSD ទំហំបានដល់ទៅ 128GB ថែមទៀត។ ស្មាតហ្វូននេះប្រើប្រាស់ប្រព័ន្ធស្កេនក្រយ៉ៅដៃ (Fingerprint) និងថាមពលថ្មទំហំ 3000mAh ។ កាន់តែពិសេសជាងនេះទៀតនោះ ស្មាតហ្វូននេះមានទម្ងន់ត្រឹមតែ 168g និងដំណើរការប្រព័ន្ធប្រតិបត្តិការ Android 7.1 ថែមទៀតផង៕