iPhone X ដែលត្រូវបានអ្នកនិយមលេងទូរស័ព្ទស្មាតហ្វូននៅក្នុងប្រទេសកម្ពុជា ភាគច្រើនបានចាត់ទុកជារបស់ដែលមានតម្លៃ ហើយនឹងបានទន្ទឹងរង់ចាំអស់រយៈពេលយូរមកហើយនោះ បានបង្ហាញខ្លួននៅលើទីផ្សារកម្ពុជាហើយ តែមិនមែនទូរស័ព្ទផ្លូវការដែលនាំចូលដោយក្រុមហ៊ុនស្របច្បាប់ដែលកំពុងតែវត្តមាននៅកម្ពុជានោះទេ។ ចាប់តាំងពីថ្ងៃចេញលក់ទូរ ស័ព្ទនេះ តម្លៃរបស់វា គឺខ្ពស់កក់ពពក ពោលគឺតម្លៃជាង 1,800 ដុល្លារ សម្រាប់ទំហំ 64 GB និងតម្លៃជាង 2,200 ដុល្លារ សម្រាប់ទំហំ 256GB។ តែគួរស្ញប់ស្ញែងនោះ គឺថា បើទោះជាទូរស័ព្ទ iPhone X មានតម្លៃខ្ពស់ក៏ដោយ អ្នកប្រើប្រាស់មួយចំនួននៅកម្ពុជា ក៏នៅតែមានអ្នកហ៊ានចំណាយប្រាក់ទិញប្រើប្រាស់ដែរ។
ក៏ប៉ុន្តែអ្វីដែលគួរឱ្យចាប់អារម្មណ៍សំរាប់ពេលនេះនោះគឺ ទូរស័ព្ទ iPhone x ហាក់មានការធ្លាក់ថ្លៃលឿន សំរាប់រយៈពេលខ្លី ប្រៀបធៀបជាមួយនឹងម៉ូដែលមុនៗរបស់ Apple ដែលធ្វើអោយអ្នក ដែលបានទិញមុនគេនោះ មានការភ្ញាក់ផ្អើល និងបង្ហាញពីអារម្មណ៍មិនល្អពីតម្លៃរបស់ iPhone X នេះ នៅគ្រប់ទីកន្លែង ជាពិសេសនៅលើហ្វេសប៊ុកតែម្តង។ គួរបញ្ជាក់ថា នេះមិនមែនជាលើកទីមួយទេ ហើយក៏មិនមែនជារឿងចម្លែកដែរ ដែលទូរស័ព្ទត្រកូល iPhone បានធ្លាក់ថ្លៃជាបន្តបន្ទាប់ក្រោយបង្ហាញវត្តមាន នៅលើទីផ្សារ ដោយសារតែតម្លៃរបស់ទូរស័ព្ទនេះ ភាគច្រើនមិនផ្លូវការទេ។ ហេតុនេះ អ្នកប្រើប្រាស់គួរពិចារណាឱ្យបានច្បាស់លាស់ មុននឹងសម្រេចចិត្តទិញទូរស័ព្ទ ដែលមិនបាននាំមកផ្លូវការ។ ត្រូវតែរង់ចាំ និងងាកមកជាវផលិតផល Apple ដែលមានការនាំចូលដោយក្រុមហ៊ុនស្របច្បាប់វិញ។
បើយើងក្រឡេកទៅមើលដៃគូរប្រកួតប្រជែងរបស់ iPhone x នេះវិញ គឺហ្វាប់ប្លេត Samsung Galaxy Note 8 ដែលមានបច្ចេកវិទ្យាប្រហាក់ប្រហែលគ្នានោះ រហូតមកដល់ពេលនេះ គឺនៅតែបានរក្សាតម្លៃថេររបស់ខ្លួនប្រហាក់ប្រហែលជា 900 ដុល្លារដដែល។ កត្តានេះ ក៏អាចជាហេតុផលមួយ ដែលធ្វើអោយរបស់តម្លៃ iPhone X មានធ្លាក់ចុះលឿនផងដែរ ដោយ សារតែអ្នកប្រើប្រាស់ គាត់នៅមិនទាន់មានការសម្រេចច្បាស់ជាមួយនឹងទូរស័ព្ទថ្មីនេះ។ សូមជំរាបថា មកដល់ថ្ងៃនេះ សម្រាប់ iPhone x ទំហំ 64GB គឺមានតម្លៃជាង 1370 ដុល្លារ និងសម្រាប់ទំហំ 256GB តម្លៃជាង 1570 ដុល្លារតែប៉ុណ្ណោះតម្លៃនៅលើទីផ្សារកម្ពុជា។