ឧបករណ៍ស្តាប់តន្ត្រីដែលគ្រប់គ្នានិយមហៅថា (Speaker) កំពុងតែទទួលបានប្រជាប្រិយភាពខ្លាំងសម្រាប់មនុស្សស្ទើគ្រប់វ័យទាំងអស់ពី ព្រោះថា វាបានជួយបន្ថែមរសជាតិជីវិតអោយពោរពេញទៅដោយភាពសប្បាយរីករាយបានគ្រប់ពេល និងគ្រប់ទីកន្លែងជាមួយនិងការស្តាប់តន្ត្រី។ នៅក្នុងទីផ្សារបច្ចុប្បន្ននេះ មានម៉ាក Speaker ជាច្រើន បាននឹងកំពុងតែវាយឡុកទីផ្សារយ៉ាងសកម្មបំផុត ហើយមានម៉ាកខ្លះមានតម្លៃថ្លៃៗ ដែលធ្វើអោយយើងមិននឹងស្មានដល់ថែមទៀតផង។ ហើយពេលនេះគេហទំព័រទស្សនាវដ្តីពិភពអេឡិចត្រូនិកនឹងបង្ហាញជូនប្រិយមិត្តនូវកូនឧបករណ៍បំពងសំឡេង (Bluetooth Speaker) ប៉ុន្មានស៊េរីរបស់ក្រុមហ៊ុនល្បីៗដែលមានគុណសម្បត្តិល្អ និងគុណភាពសំឡេងល្អបំផុត រួមទាំងតម្លៃសមរម្យអាចទទួលយកបាន។
-JBL Charge 3 មានតម្លៃ $120
នេះជាកូនបាហ្វបំពងសំឡេងជំនាន់ថ្មីមួយរបស់ JBL ដែលវាត្រូវបានភ្ជាប់មកជាមួយសមត្ថភាពថ្មខ្លាំងដែលអាចកាន់បានដល់ទៅ 20 ម៉ោងឯណោះ។ JBL Charge 3 មានសំឡេងលឺខ្លាំងជាមួយសំឡេងបាហ្វបុកល្អមិនរ៉ែ និងជាពិសេសគឺវាបានភ្ជាប់នូវប្រព័ន្ធការពារជ្រាបទឹកបានយ៉ាងល្អដែលមិនធ្វើអោយយើងព្រួយបារម្មណ៍រឿងទឹកចូល ឬធ្លាក់ចូលទឹកឡើយ។ បន្ថែមពីនេះវាបានភ្ជាប់នូវប្រព័ន្ធតភ្ជាប់ JBL Connect ដែលអាចអោយយើងភ្ជាប់ទៅកាន់ឧបករណ៍បំពងសំឡេងពីរក្នុងពេលដំណាលគ្នាដើម្បីបង្កើតទៅជាសំលេងស្តេរ៉េអូដែលបន្ថែមនូវរសជាតិស្តាប់តន្ត្រីបានយ៉ាងពិរោះរណ្តំចិត្តបន្ថែមទៀត។
-UE Boom 2 មានតម្លៃប្រហែល $130
កូន Speaker របស់ UE មួយនេះមានគុណសម្បត្តិ និងតម្លៃប្រហាក់ប្រហែល JBL Charge 3 ដែរ។ វាភ្ជាប់នូវប្រព័ន្ធការពារជ្រាបទឹក និងចរន្តឆក់បានយ៉ាងប្រសើរបំផុត។ UE Boom 2 មានថ្មកាន់បាន 15 ម៉ោង ហើយអាចធ្វើការតភ្ជាប់បានជាមួយនឹងបច្ចេកវិទ្យាសំលេង Amazon Alexa ក្នុងការបញ្ជានូវមុខងារមួយចំនួន និងគ្រប់គ្រងការចាក់តន្ត្រី។ ជាមួយគ្នានេះដែរយើងក៏អាចគ្រប់គ្រងការចាក់តន្ត្រីដោយផ្ទាល់នៅលើប៊ូតុងរបស់វាដោយការចុចប៊ូតុង UE ម្តងដើម្បីចាក់តន្ត្រី, ចុចម្តងទៀតដើម្បីបញ្ឈប់ ឬក៏ចាក់ឡើងវិញ, ចុចពីរដងជាប់គ្នាដើម្បីចាក់បទចម្រៀងបន្ទាប់ និងចុចអោយជាប់យូរបន្តិចដើម្បីភ្ជាប់ទៅកាន់ឧបរកណ៍ UE speaker ដែលនៅជិតវា។
-Bose SoundLink mini 2 មានតម្លៃប្រហែល $180
កូន Speaker របស់ Bose មួយនេះក៏មិនអន់ប៉ុន្មានដែរ។ វាមានរូបរាង និងរចនាបថបែបចាស់ជំនាន់បន្តិចក៏ប៉ុន្តែគុណភាពសំឡេងរបស់វាវិញមានសមត្ថភាពអាចផ្តួល JBL Charge 3 និង UE Boom 2 បាន។ Bose SoundLink mini 2 មានផ្ទៃឧប៉ាល័រសម្រាប់បំពងសំលេងលាតពេញផ្ទៃខាងមុខរបស់វាតែម្តងដែលធ្វើអោយការបញ្ចេញសំឡេងបានលឺខ្លាំងពិរោះបុកណែនល្អ ពិសេសពេលចាក់ស្តាប់នៅក្នុងបន្ទប់។ វាមានសមត្ថភាពគ្រប់គ្រងសំឡេងបានយ៉ាងល្អមិនថាការបើកសំលេងខ្លាំង និងទម្លាក់កម្រិតសំឡេងមកទាបនោះទេ។ សម្រាប់ Speaker Bose មួយនេះមានថ្មអាចកាន់បាន 10 ម៉ោង។
-Sony SRSXB3 មានតម្លៃប្រហែល $125
ងាកមកកូន Speaker របស់ SONY ស៊េរី SRSXB3 នេះវិញក៏មិនធម្មតាដែរវាមានទំហំតូចល្មមដែលផ្តល់នូវភាពងាយស្រួលយកតាមខ្លួនបានគ្រប់ពេល។ សមត្ថភាពថ្មរបស់វាកាន់បានរហូតដល់ 24 ម៉ោង, វាភ្ជាប់នូវបច្ចេកវិទ្យាសំឡេងលឺច្បាស់ល្អជាមួយកំលាំង bass បុកល្អ ដូចនេះពេលមាន Sony SRSXB3 នៅក្បែរលោកអ្នកនឹងទទួលបានភាពសប្បាយរីករាយក្រៃលែងក្នុងការស្តាប់តន្ត្រី។
-Beats Pill+ មានតម្លៃប្រហែល $160
សម្រាប់ Speaker រាងដូចថ្នាំពេទ្យទ្រវែងរបស់ Beats មួយនេះត្រូវបានក្រុមហ៊ុនរចនាឡើងប្លែកដោយភ្ជាប់នូវគុណភាពសំឡេងលឺល្អខ្លាំងពិរោះរណ្តំ ហើយបើយើងដាក់វានៅគៀកនឹងជញ្ជាំងពេលនោះលទ្ធផលសំឡេង bass ដែលបញ្ចេញមកពិតជាពិរោះបំផុត។ ជាមួយគ្នានេះដែរវាក៏អាចធ្វើការភ្ជាប់ (Pair) ទៅកាន់ Speaker Pill+ ផ្សេងទៀតបានដើម្បីបង្កើតនូវសំលេង amplified sound ដែលបន្ថែមនូវរសសំឡេងកាន់តែអស្ចារ្យបានមួយកម្រិតទៀត។ Beats Pill+ មានថ្មកាន់បាន 12 ម៉ោង។
-Jawbone Mini Jambox តម្លែប្រហែល $50
Speaker ថ្មីមួយនេះ មានការរចនារូបរាងបែបសាមញ្ញាប៉ុន្តែបង្កប់នូវភាពទាក់ទាញហើយតម្លៃរបស់វាក៏ធូរថ្លៃណាស់ដែរ។ សម្រាប់ការកម្សាន្ត ក្នុងការចាក់តន្រ្តីស្តាប់គឺថ្មរបស់វាអាចកំដរអារម្មណ៍របស់យើងបានដល់ 10 ម៉ោង ហើយសំឡេងរបស់វាក៏លឺពិរោះរង្ងំរណ្តំអាចទទួលយកបានផងដែរ។
-VaVa Voom 20 មានតម្លៃប្រហែល $70
ចំពោះ Speaker ម៉ូដែលនេះវិញវាបានភ្ជាប់នូវថ្មដែលអាចកំដរការចាក់ស្តាប់តន្ត្រីរបស់យើងបានដល់ 10 ម៉ោងដែរ រីឯការបំពងសំឡេងរបស់វាក៏បានលឺខ្លាំងពិរោះរណ្តំមិនចាញ់ Speaker ដែលមានតម្លៃប្រហាក់ប្រហែលនឹងវានោះទេ។
-DOSS Touch មានតម្លៃប្រហែល $30
កូន Speaker ចុងក្រោយនេះមានតម្លៃធូរថ្លៃមែនទែនតែម្តង ប៉ុន្តែការប្រើប្រាស់នៅលើវាគឺមានភាពទំនើបមិនធម្មតាឡើយ។ វាមានភ្លើង LED នៅត្រង់កន្លែងគ្រប់គ្រងការចាក់តន្ត្រី និងរង្វង់កណ្តាលដែលមានភ្លើងដេញតាមចង្វាក់ភ្លេងយើងស្រស់ស្អាត។ ចំពោះគុណភាពសំឡេងរបស់វាក៏បញ្ចេញមកបានលឺច្បាស់ពិរោះផងដែរ រីឯថ្មរបស់វាវិញអាចកាន់បានដល់ 10 ម៉ោង៕ ប្រភពព័តមាន៖ https://www.phonearena.com/news/Best-Bluetooth-speakers-comparison-2017-sound-quality-and-price_id99851