ដើម្បីការកសាងនូវទំនុកចិត្ត និងភាពជឿជាក់ក្នុងការប្រើប្រាស់គ្រឿងអេឡិចត្រូនិចរបស់ក្រុមហ៊ុនសាមសុង នៅថ្ងៃនេះទី 11 ខែធ្នូនេះ ក្រុមហ៊ុន សាមសុង បាន បើកវគ្គបណ្តុះបណ្តាលជំនាញជួសជុលនិងតំឡើងម៉ាស៊ីនត្រជាក់ ដែលមានរយៈពេល 17 ថ្ងៃ គឺចាប់ពីថ្ងៃទី 11 ខែធ្នូ រហូតដល់ថ្ងៃទី 28 ខែធ្នូ ឆ្នាំ 2018 នេះ ដែលមានការចូលរួមពីសិក្ខាកាមជំនាញចំនួន 350 នាក់មកពី 6 ខេត្តក្រុងផ្សេងៗគ្នា រួមមានដូចជា ខេត្តកំពង់ចាម ខេត្តបាត់ដំបង ខេត្តបន្ទាយមានជ័យ ក្រុងព្រះសីហនុ ខេត្តសៀមរាប និងរាជធានីភ្នំពេញ។
កម្មវិធីបណ្តុះបណ្តាលជំនាញជួសជុល និងតំឡើងម៉ាស៊ីនត្រជាក់ ដែលមានរយៈពេលដល់ទៅ 17 ថ្ងៃនេះ គឺមានការបង្ហាញ និងការរៀនទាំងទ្រឹស្តី និងការអនុវត្តជាក់ស្តែងជាមួយនឹងសម្ភារៈគ្រឿងអេឡិចត្រូនិចរបស់ សាមសុង ដែលបង្ហាត់បង្ហាញដោយគ្រូជំនាញរបស់ក្រុមហ៊ុន សាមសុង ផ្ទាល់តែម្តង។
វគ្គបណ្តុះបណ្តាលជំនាញនេះមានគោលដៅធំៗសំខាន់ចំនួន 3 គឺ៖
1. ការបណ្តុះបណ្តាលអំពីជំនាញទៅលើការតម្លើងម៉ាស៊ីនត្រជាក់ និងប្រព័ន្ធម៉ាស៊ីនត្រជាក់ជាមួយនឹងទំនុកចិត្តខ្ពស់បំផុតសម្រាប់អតិថិជន
2. ការកសាងនូវទំនុកចិត្ត និងភាពជឿជាក់ក្នុងការប្រើប្រាស់គ្រឿងអេឡិចត្រូនិចរបស់ក្រុមហ៊ុនសាមសុងដែលផ្តល់នូវភាពងាយស្រួលក្នុងការតម្លើង និងជួសជុល
3. ការពង្រឹងបន្ថែមទៅលើចំណេះដឹងថ្មីៗកាន់តែទូលំទូលាយ និងជំនាញកម្រិតខ្ពស់សម្រាប់ការតម្លើងទៅលើម៉ាស៊ីនត្រជាក់សាមសុង
ដូចនេះ ក្រោយបញ្ចប់នូវវគ្គបណ្តុះបណ្តាលទៅលើជំនាញគ្រឿងអេឡិចត្រូនិចនេះ សិក្ខាកាមដែលចូលរួមនឹងទទួលបាននូវចំណេះដឹងយ៉ាងច្រើនដែលជួយពួកគេកាន់តែមានភាពងាយស្រួលនៅក្នុងការផ្តល់នូវសេវាកម្ម គុណភាពរហ័សល្អបំផុត និងភាពជឿជាក់ខ្ពស់បំផុតសម្រាប់អតិថិជនរបស់សាមសុង។
គួរបញ្ជាក់ផងដែរថា ក្រុមហ៊ុន សាមសុង គឺជាក្រុមហ៊ុនដែលឈានមុខគេនៅលើពិភពលោក ផ្នែកបច្ចេកវិទ្យា ដោយបានផ្តល់នូវរបកគំហើញថ្មីៗ សម្រាប់ជួយអោយការរស់នៅរបស់មនុស្សកាន់តែស៊ីវិល័យ និងប្រកបដោយភាពងាយស្រួលបំផុត។ តាមរយៈរបកគំហើញថ្មីៗ ឥតឈប់ឈររបស់ក្រុមហ៊ុន សាមសុង យើងឃើញមានការវិវត្តន៍កាន់តែប្រសើរឡើង ទៅលើផលិតផលគ្រឿងអេឡិចត្រូនិចទំនើបៗ ជាច្រើនដូចជា ទូរទស្សន៍ ស្មាតហ្វូន កុំព្យូទ័រផ្ទាល់ខ្លួន កុំព្យូទ័រលើតុ ម៉ាស៊ីនថតរូប ឧបករណ៍ប្រើប្រាស់នៅផ្ទះបាយ ម៉ាស៊ីនថតចម្លង ប្រព័ន្ធ LTE និងដំណោះស្រាយជាច្រើនទៀតនៅក្នុងវិស័យឧស្សាហកម្មព័ត៌មានបច្ចេកវិទ្យា៕
