កាលពីថ្ងៃទី 14 ខែកុម្ភៈ ឆ្នាំ 2019 កន្លងទៅនេះ ធនាគារ ជីប ម៉ុង ខមមើសល ប៊ែង បានសម្ពោធដាក់ឲ្យដំណើរការជាផ្លូវការនូវសាខាថ្មីព្រះនរោត្តម ដែលជាសាខាទីពីររបស់ខ្លូន មានទីតាំងស្ថិតនៅតាមបណ្តោយមហាវិថីព្រះនរោត្តម កែងផ្លូវសម្តេចប៉ាន សង្កាត់បឹងរាំង ខណ្ឌដូនពេញ។ នេះគឺជាដំណើរការបន្ថែមនូវការិយា ល័យបំរើសេវាថ្មីមួយទៀត របស់ធនាគារ ជីប ម៉ុង ខមមើសល ប៊ែង ស្របពេលកម្ពុជា មានការវិវត្តន៍ឥតឈប់ឈរនៃវិស័យបច្ចេកវិទ្យាហិរញ្ញវត្ថុ និងកំណើននៃចំនួនប្រតិបត្តិការ ក៏ដូចជាទំហំទឹកប្រាក់នៃសេវាធនាគារអេឡិចត្រូនិច។ ធនាគារ ជីប ម៉ុង ខមមើសល ប៊ែង បានបញ្ជាក់អោយដឹងថា នៅក្នុងឱកាសនៃការដាក់សម្ពោធដំណើរការជាផ្លូវការសាខាព្រះនរោត្តមនៅពេលនេះ អតិថិនជនទាំងអស់ នឹងរីករាយទទួលបាននូវឱកាសយ៉ាសងពិសេស ដោយអាចធ្វើការជ្រើសរើសលេខគណនីពិសេសចំនួន 8 ខ្ទង់ ទៅតាមចំណង់ចំណូលចិត្តសម្រាប់ការបើកគណនីណាមួយរបស់ខ្លួននៅទីនោះផងដែរ។
ធនាគារ ជីប ម៉ុង ខមមើសល ប៊ែង បានបន្តថា ជាមួយនឹងវត្តមាននៅពេលនេះ ខ្លួនគឺបានផ្តោតសំខាន់យ៉ាងពិសេសលើការប្រើប្រាស់ប្រព័ន្ធបច្ចេកវិទ្យាឌីជីថល សុទ្ធសាធសម្រាប់ប្រតិបត្តិការហិរញ្ញវត្ថុផ្សេងៗ ដោយចាប់តាំងពីការបើកគណនីធនាគារ រហូតដល់ការទូរទាត់ផ្សេងៗ ក្នុងការប្រើប្រាស់ប្រចាំថ្ងៃ។ ជាងនេះទៅទៀតនោះ លក្ខណៈពិសេសនៃធនាគារ ជីប ម៉ុង ខមមើសល ប៊ែង នឹងបម្រើសេវាកម្មហិរញ្ញវត្ថុ បែបឌីជីថលដ៏សម្បូរបែប សម្រាប់បំពេញតម្រូវការ ហិរញ្ញវត្ថុដល់អតិថិជន ដែលអនុញ្ញាតអោយអតិថិជនទទួលបានលើសពីសេវា ដែលផ្តល់ជូនតាមរយៈដៃគូសហការពាណិជ្ជកម្មរបស់យើង។
សូមជំរាបថា ធនាគារ ជីប ម៉ុង ខមមើសល ប៊ែង គឺបានចាប់ផ្តើមឈានជើងចូលក្នុងវិស័យធនាគារ ប្រកបដោយទំនុកចិត្តក្នុងទីផ្សារប្រទេសកម្ពុជា ស្របពេលដែលរបាយការណ៍ធនាគាជាតិនៃកម្ពុជាប្រចាំឆ្នាំ 2018 ដោយបានបង្ហាញថា ទំហំនៃប្រតិបត្តិការនៃសេវាធនាគារអេឡិចត្រូនិច ដែលបានប្រើប្រាស់បច្ចេកវិទ្យាហិរញ្ញវត្ថុ មានរហូតតដល់ជាង៩ពាន់ 600 លានដុល្លារសហរដ្ឋអាមេរិក។
ធនាគារ ជីបម៉ុង ខមមើសល ប៊ែង គឺជាពាណិជ្ជកម្មទី 12 នៃក្រុមហ៊ុន ជីប ម៉ុង ផ្តោតសំខាន់លើការប្រើប្រាស់ប្រព័ន្ធឌីជីថល និងបច្ចេកវិទ្យាទំនើប ដើម្បីបម្រើ និងផ្តល់សេវាកម្មទៅដល់អតិថិជនរបស់ខ្លួន ដែលបានឆ្លុះបញ្ចាំងនូវការវិវឌ្ឍធំមួយទៀត នៅក្នុងការចូលរួមធ្វើទំនើបកម្មលើវិស័យធនាគារ ដែលជាចំណែកមួយយ៉ាងសំខាន់ នៅក្នុងការអភិវឌ្ឍន៍ប្រព័ន្ធសេវាកម្មធនាគារឲ្យកាន់តែសម្បូរបែប មានប្រសិទ្ធិភាព និងប្រសិទ្ធិផលខ្ពស់ និងភាពងាយស្រួលជាងមុន៕
