នៅប៉ុន្មានថ្ងៃនេះវត្តមានស្មាតហ្វូនចិននៅប្រទេសកម្ពុជា បាននឹងកំពុងតែប្រជែងតម្លៃគ្នាកាន់យ៉ងខ្លាំង ដែលបានធ្វើអ្នកប្រើប្រាស់មួយចំនួនធំ ពិបាកក្នុងសម្រេចចិត្តនៅក្នុងការជ្រើសរើស។ ស្របពេលដែលកំដៅទីផ្សារនេះ កំពុងតែពុះកញ្ជ្រោលនោះ ក្រុមហ៊ុន HMD Global នៅថ្ងៃនេះ ក៏បានចេញលក់នូវទូរស័ព្ទស៊េរីថ្មីរបស់ខ្លួនចំនួន 2 ម៉ូដែល នៅក្នុងប្រទេសកម្ពុជាយើងផងដែរ ដើម្បីជាការឆ្លើយតបទៅនឹងតម្រូវការមួយនេះ។
ទូរស័ព្ទនោះរួមមានដូចជា ទូរស័ព្ទ Nokia 210 (ស៊ីមពីរ) និង Nokia 106 (ស៊ីមពីរ) ដោយសមាជិកថ្មីទាំងពីរនេះ គឺជាទូរស័ព្ទតម្លៃសមរម្យ មានសមត្ថភាពខ្ពស់ ដែលបានរួមចំណែកធ្វើអោយជាក្រុមហ៊ុននេះ ក្លាយជាចែកចាយទូរស័ព្ទធូថ្លៃចំណាត់ថ្នាក់លេខ 1នៅលើពិភពលោកផងដែរ។ Nokia 210 (ស៊ីមពីរ) មានអេក្រង់ 2.4" QVGA កាមេរ៉ា VGA ស្ថិតនៅផ្នែកខាងក្រោយ និងភ្លើង LED Flash ផងដែរ។ ទូរស័ព្ទនេះ ដំណើរការនូវ S30 software ដែលផ្តល់ជាមួយនឹងកម្មវិធី Opera Mini Browser, Facebook និងហ្គេម Classic Snake game។ ទូរស័ព្ទ ក៏មានភ្ជាប់ជាមួយនឹង Mobile Store សម្រាប់ការទាញយកកម្មវិធី Apps ផងដែរ។ Nokia 210 (ស៊ីមពីរ) នេះចេញលក់ហើយជាមួយនឹងតម្លៃត្រឹមតែ $34 ប៉ុណ្ណោះ។
Nokia 106 (ស៊ីមពីរ) គឺជាទូរស័ព្ទ Feature ជំនាន់ថ្មី មានទំហំតូច មានថ្មកាន់បានយូ និងមានអង្គចងចាំអាចកត់ត្រាឈ្មោះដល់ទៅ 2,000 ព្រមទាំងអាផ្ញើសារជាអក្សរបាន 500 ទៀតផង។ ក្រុមហ៊ុន បានបញ្ជាក់ថា ទូរស័ព្ទ Nokia 106 ថ្មីនេះ មាន RAM មានទំហំ 4MB និងមានអេក្រង់ទំហំ 1.8 "120x160 ភិចសែល ប៉ុន្តែមិនមានកាមេរ៉ានោះទេ។ អ្វីដែលល្អឥតខ្ចោះសម្រាប់ទូរស័ព្ទនេះ គឺការលេងហ្គេម Snake Xenzia។ លក្ខណៈពិសេសដ៏ល្អបំផុតរបស់ទូរស័ព្ទ Nokia 106 (ស៊ីមពីរ) គឺមានរូបរាងផលិតពីសារធាតុ Polycarbonate ផ្សំឡើងជាមួយនឹងការលាយបញ្ចូលគ្នានូវថ្នាំលាបដែលបង្កើតជាពណ៌ដូចគ្នានៅជុំវិញ បានធ្វើឱ្យទូរស័ព្ទថ្មីនេះ មានព័ណកាន់តែស្អាត និងការពារការឆ្កូត និងសឹករិចរឹល បានគួរឱ្យកត់សម្គាល់។
Nokia 106 (ស៊ីមពីរ) មានថ្មទំហំ 800mAh ដែលអាចសន្ទនាជាប់រហូតបានចំនួន 15 ម៉ោង និងអាចបើកទុកចោលបានរហូតដល់ទៅ 20 ថ្ងៃឯណោះ។ ទូរស័ព្ទ Nokia 210 (ស៊ីមពីរ) មានតម្លៃ 34 ដុល្លា និង Nokia 106 (ស៊ីមពីរ) មានតម្លៃ 18 ដុល្លា។ លោកអ្នកអាចរកទិញបាន នៅគ្រប់ហាងលក់ទូរស័ព្ទទាំងអស់នៅទូទាំងប្រទេស៕