កាលពីទី 8 ខែធ្នូ ឆ្នាំ 2017 កន្លងទៅនេះ នៅសណ្ឋាគារ Sofitel ក្រុមហ៊ុន ECI Distribution សហការជាមួយនិងក្រុមហ៊ុន Bitdefender រៀបចំនូវពិធីចុះហត្ថាលេខាចាប់ដៃគូរជាផ្លូវការនៅក្នុងការនាំមកនូវកម្មវិធីកំចាត់មេរោគកុំព្យូទ័រលំដាប់ពិភពលោកមកកាន់កម្ពុជា ក្រោមវត្តមានអ្នកគ្រប់គ្រងក្រុមហ៊ុនធំៗទាំងពីរួមជាមួយនឹងអ្នកតំណាងមកពីស្ថាប័ននានាជាច្រើនរូបផងដែរ។ នៅក្នុងខ្លឹមសារនៃពិធី គឺ Bitdefender ដែលជាក្រុមហ៊ុនផ្គត់ផ្គង់នូវប្រព័ន្ធសុវត្ថិភាពឈានមុខគេនៅក្នុងពិភពលោក បានសម្រេចផ្តល់សិទ្ធិជាផ្លូវការជូនដល់ក្រុមហ៊ុន ECI Distribution នៅក្នុងការចែកចាយនូវផលិត ផលសុវត្ថិភាពខ្ពស់សម្រាប់ទីផ្សារនៅក្នុងប្រទេសកម្ពុជា។
យោងតាមប្រសាសន៍របស់លោក ញឹប ចាន់ថា ដែលជាអ្នកគ្រប់គ្រងទូទៅរបស់ក្រុមហ៊ុន ECI Distribution Co., Ltd បានបញ្ជាក់អោយដឹងថា សព្វថ្ងៃនេះ ការវិវិត្តរីកចំរើន និងការកើនឡើងយ៉ាងរហ័ស នៃហេដ្ឋារចនាសម្ព័ន្ធអ៊ីនធើណិត ប្រព័ន្ធឌីជីថល និងចំនួនអ្នកប្រើប្រាស់កុំព្យូទ័នៅក្នុងប្រទេសកម្ពុជាបានធ្វើអោយមានការព្រួយបារម្ភយ៉ាងច្រើនពីសុវត្ថិភាព និងការ Hack ពីសំណាក់ជនអណាមិក ដូច្នេះហើយ គ្រប់គ្នាគឺទាមទារឱ្យមានការការពារទៅលើប្រព័ន្ធសុវត្ថិភាពកម្មអ៊ីនធើណិត (Cybersecurity) អោយបានកាន់តែម៉ត់ចត់ និងមអោយខានតែបាន។ ការប្រើប្រាស់ផលិតផលជាច្រើន ដែលមានសុវត្ថិភាពជឿជាក់ ដើម្បីការពារប្រព័ន្ធបច្ចេកវិទ្យា IT គឺពិតជាសំខាន់ខ្លាំងណាស់ យើងត្រូវប្រើប្រាស់នូវស្រទាប់សុវត្ថិភាពជាច្រើន (Multi-layered) ជាពិសេសម្រាប់ស្ថាប័នរដ្ឋាភិបាល គឺត្រូវតែការពារទៅលើប្រព័ន្ធ System នៅគ្រប់ស្ថាប័នទាំងអស់។ លោកបានបន្ថែមថា រហូតមកដល់ពេលនេះ Bitdefender មានវត្តមានច្រើនជាង 200 ប្រទេសនៅជុំវិញពិភពលោក ឥលូវនេះ ក្រុមហ៊ុនកម្មវិធីកំចាត់មេរោគនេះ ពិតជារីករាយណាស់ ដែលក្លាយជាដៃគូជាមួយនឹងក្រុមហ៊ុន ECI របស់យើង នៅក្នុងចែកចាយសម្រាប់ក្រុមហ៊ុន Bitdefender នៅក្នុងប្រទេសកម្ពុជា។
លោកបន្ថែមថា “ដើម្បីសុវត្ថិភាពនោះ អ្នកប្រើប្រាស់កុំព្យូទ័រផ្ទាល់ខ្លួនជាច្រើនគួរតែប្រើប្រាស់នូវកម្មវិធីការពារមេរោគ ដែលខ្លាំង ដើម្បីការពារឧក្រិដ្ឋកម្មអ៊ីនធើណិត Cybercrime ដែលផ្តោតសំខាន់ៗ ទៅលើកត្តាមួយចំនួន រួមមានដូចជា ការបង់ប្រាក់តាមអនឡាញ និងការបាត់បង់នូវទិន្នន័យឯកជនភាព និងទិន្នន័យផ្ទាល់ខ្លួនផ្សេងទៀត។ សម្រាប់អ្នកប្រើប្រាស់នៅក្នុងក្រុមហ៊ុន និងរដ្ឋាភិបាល គឺពិតជាចាំបាច់ណាស់នៅក្នុងការប្រើប្រាស់កម្មវិធីកំចាត់មេរោគ ពីព្រោះថា កម្មវិធីនេះ នឹងអាចការការពារទៅលើទិន្នន័យសម្ងាត់របស់ក្រុមហ៊ុន ដែលអាចបែកធ្លាយ ឬត្រូវបានគេហេគ ដែលអាចធ្វើឱ្យខាតបង់យ៉ាងច្រើនសម្រាប់ក្រុមហ៊ុនដោយពេលណាមួយ។ សំរាប់ការចុះអនុស្សារនៈជាមួយនឹង Bitdefender នៅពេលនេះ ក្រុមហ៊ុន ECI មានគោលដៅក្នុងការផ្តល់នូវដំណោះស្រាយសុវត្ថិភាពអ៊ីនធើណិតទៅកាន់ គ្រប់វិស័យទាំងអស់ក្នុងប្រទេសកម្ពុជា ដែលរួមមានដូចជា វិស័យអប់រំ និងស្ថាប័នរដ្ឋាភិបាល មន្ទីរពេទ្យ ធនាគារ ក្រុមហ៊ុនសហគ្រាសតូច ធំ និងជាច្រើនទៀត។”
ជាមួយគ្នានេះ លោក Michal Dominik ដែលជាអគ្គនាយករបស់ក្រុមហ៊ុន Bitdefender ក៏មានប្រសាសន៍បញ្ជាក់អោយដឹងផងដែរថា នាពេលថ្មីៗនេះអ្នកប្រើប្រាស់ច្រើនជាង 500 លាននាក់នៅជុំវិញពិភពលោកពេញចិត្តជាមួយនឹងការប្រើប្រាស់នូវបច្ចេកវិទ្យារបស់ក្រុមហ៊ុន Bitdefender ពីព្រោះថា កម្មវិធីរបស់ក្រុមហ៊ុនយើងនេះ គឺជាស្ថាប័នជាប់ចំណាត់ថ្នាក់លេខ 1 តាមការស្រាវជ្រាវរបស់វិទ្យាស្ថានសុវត្ថិភាពឯករាជ្យអ៊ីនធើណិតអន្តរជាតិដូចជា AV-Test (Germany) និង AV-Comparatives (Austria)។ លោក Michal Dominik បន្ថែមថា ប្រទេសកម្ពុជា គឺជាទីផ្សារថ្មីមួយសម្រាប់ក្រុមហ៊ុន Bitdefender។ យើងជឿជាក់ថា ទីផ្សារនេះ នឹងមានការកើនឡើងខ្លាំងជាមិនខាន ដោយសារតែពេលនេះ ប្រទេសកម្ពុជា បាននឹងកំពុងតែមានការអភិវឌ្ឍន៍ខ្លាំង ចំនួននៃការប្រើប្រាស់កុំព្យូទ័រ និងវិស័យហេដ្ឋារចនាសម្ព័ន្ធ និងសំណង់កាន់តែច្រើនឡើងៗពីមួយថ្ងៃៗ ដូច្នេះយើងយល់អំពីតម្រូវការ និងទីផ្សារនៅទីនេះ ដោយនឹងនាំមកនូវការការពារសុវត្ថិភាពអោយកាន់តែពិសេសំរាប់អតិថិជនទាំងអស់។
លោក Michal Dominik បានបញ្ជាក់បន្ថែមថា ចំណុចសំខាន់ដែលក្រុមហ៊ុន Bitdefender សំរេចចិត្តចាប់ដៃគូរជាមួយនឹងក្រុមហ៊ុន ECI ដើម្បីធ្វើជាអ្នកតំណាងចែកចាយនៅពេលនេះ គឺដោយសារតែក្រុមហ៊ុន ECI គឺជាក្រុមហ៊ុនដែលមានបទពិសោធន៍ខ្ពស់នៅក្នុងវិស័យនេះ ជាពិសេស គឺការផ្តល់ដំណោះស្រាយព័តមានវិទ្យា ហើយក្រុមហ៊ុននេះ ក៏មានក្រុមការងារល្អៗ និងសំបូរទៅដោយអ្នកបច្ចេកទេសល្អៗ ដែរង់ចាំោផ្តល់ដំណោះស្រាយជូនអ្នកប្រើប្រាស់គ្រប់ពេលវេលា។ នេះជាអ្វីដែលយើងស្វែងរក និងផ្តល់ការសហការជាមួយគ្នា៕”