នេះជាជំនាន់ទីបួនហើយដែលក្រុមហ៊ុនសាមសុងបានបើកវគ្គបណ្តុះបណ្តាលនិងផ្តល់ឱកាសដល់សិស្សនិស្សិតដែលបានបញ្ចប់ការសិក្សាវគ្គបណ្តុះបណ្តាលសាមសុង Tech Instituteជំនាន់ទីបួន។វគ្គបណ្តុះបណ្តាលនេះមិនត្រឹមតែផ្តោតសំខាន់ខ្ពស់ទៅលើវិស័យអប់រំនិងបច្ចេកវិទ្យាក្នុងប្រទេសកម្ពុជាប៉ុណ្ណោះទេថែមទាំងជួយឧបត្ថម្ភបរិក្ខារសិក្សាផ្សេងៗដល់សិស្សនិស្សិតដើម្បីប្រើប្រាស់ក្នុងពេលកំពុងសិក្សាផងដែរ។
លោកជាចាន់ណាដែលជាអតីតនិស្សិតនៃវគ្គបណ្តុះបណ្តាលសាមសុង Tech Institute នៅវិទ្យាស្ថានជាតិពហុបច្ចេកទេសកម្ពុជានិងបច្ចុប្បន្នជាអ្នកហាត់ការនៅក្រុមហ៊ុនសាមសុងជំនាញបរិក្ខារអេឡិចត្រូនិចបានមានប្រសាសន៍ថា៖
«បន្ទាប់ពីខ្ញុំទទួលបានបទពិសោធន៍ជាច្រើនពីក្រុមហ៊ុនសាមសុងនៅថ្ងៃអនាគតខ្ញុំគិតថាខ្ញុំនឹងអាចមានឱកាសការងារនិងលទ្ធភាពជាច្រើនដើម្បីបង្កើតជាមុខរបរនៅថ្ងៃអនាគតដូចជាបើកកន្លែងជួសជុលគ្រឿងបន្លាស់អេទ្បិចត្រូនិកដោយខ្លួនឯងជាដើម»។
គូសបញ្ជាក់ផងដែរថានៅក្នុងវគ្គបណ្តុះបណ្តាលសាមសុង Tech Institute សិស្សានុសិស្សទាំងអស់នឹងត្រូវឆ្លងកាត់ការប្រលងបញ្ចប់ការសិក្សាដើម្បីទទួលវិញ្ញាបនបត្រហើយសិស្សពូកែចំនួន៨នាក់នឹងទទួលបានឱកាសការងារព្រមទាំងការបណ្តុះបណ្តាលការងារពីក្រុមហ៊ុនសាមសុងនិងបណ្តាដៃគូក្រុមហ៊ុនធំៗជាច្រើនទៀតរបស់ក្រុមហ៊ុនសាមសុងក្នុងប្រទេសកម្ពុជា។
វគ្គបណ្តុះបណ្តាលសាមសុង Tech Institute គឺជាសកម្មភាពប្រកបដោយទំនួលខុសត្រូវខ្ពស់ក្នុងការជួយជ្រោមជ្រែងនិងបណ្តុះបណ្តាលធនធានមនុស្សនៅក្នុងប្រទេសកម្ពុជាក៏ដូចជាបង្កើតឱកាសការងារជាច្រើនជូនដល់ប្រជាជនកម្ពុជាឲ្យស្របទៅនឹងតម្រូវការដ៏ខ្ពស់ក្នុងទីផ្សារការងារនាពេលបច្ចុប្បន្ននិងនាពេលអនាគត។