នៅពេលនិយាយដល់ឈ្មោះក្រុមហ៊ុន Singtech យើងទាំងអស់គ្នា ប្រាកដជាបានស្គាល់រួចមកហើយ ពីព្រោះថា ក្រុមហ៊ុនម៉ាកសញ្ញាសិង្ហបុរីនេះ បានឈានជើងចូលក្នុងប្រទេសកម្ពុជាជាយូរឆ្នាំមកហើយ ជាមួយនឹងការបញ្ចេញលក់នូវទូរស័ព្ទ Android ដូចក្រុមហ៊ុនដទៃដែរ ប៉ុន្តែមានតម្លៃទាបជាងគេ ងាយស្រួលដល់អ្នកដែលមានថវិការទាប និងមធ្យមអាចចំណាយលុយបន្ដិចបន្ដួចទិញបានយ៉ាងងាយ។ ជាមធ្យមទូរស័ព្ទរបស់ក្រុមហ៊ុន Singtech មានតម្លៃទាបត្រឹម 100 ដុល្លារស្ដើងប៉ុណ្ណោះ ប៉ុន្ដែគុណភាព គឺអាចទទួលយកបាន ហើយក៏មានរូបរាងស្រស់ស្អាតគ្រាន់បើផងដែរ។ ប៉ុន្មានថ្ងៃខាងមុខនេះ ក្រុមហ៊ុននឹងធ្វើការបញ្ចេញស្មាតហ្វូនថ្មីចំនួន 2 ម៉ូឌែលគឺ Singtech Infinity i1 និង Infinity iMix ។
Singtech Infinity i1 ត្រូវបានបំពាក់នូវអេក្រង់ខ្នាតទ្រវែង 18:9 Aspect Ratio ដូចទៅនឹងទូរស័ព្ទរបស់ក្រុមហ៊ុនដទៃដែរ ហើយអេក្រង់នេះក៏ត្រូវបានការពារដោយកញ្ចក់ Dragontrail ផុសឡើង 2.5D ទៀតផង។ អេក្រង់នេះមានទំហំ 5.7 អ៊ីញ និងមានកម្រិតបង្ហាញ HD+ (720 x 1440 ភិចស៊ែល)។ រចនាបថរបស់ទូរស័ព្ទនេះ ក៏អំណោយផលល្អដែរ វាមានកម្រាស់ 8.9 ប៉ុន្តែវាកោងអោបមកខាងមុខស្ដើង ធ្វើឲ្យងាយស្រួលកាន់ប្រើ ហើយក៏មានទំងន់ធ្ងន់ដល់ 191 ក្រាមដែលទំនងជារឹងមាំគួរសម។ ម៉ាស៊ីនខាងក្នុងគឺមានលក្ខណៈជាស្មាតហ្វូនមធ្យម វាប្រើប្រាស់ឈីប MediaTek MT6737H ជាប្រភេទស៊ីភីយូ 64 ប៊ីត មានស៊ីភីយូ 4 គ្រាប់ Cortex-A53 ល្បឿន 1.3 ជីកាហឺ និងអង្គក្រាហ្វិច Mali-T720 MP2។ មាន រ៉េមទំហំ 2 ជីកាបៃ និងអង្គផ្ទុកទិន្នន័យក្នុងម៉ាស៊ីន 16 ជីកាបៃ និងអាចបន្ថែម microSD បានដល់ 32 ជីកាបៃ ខាងក្រៅផងដែរ។
ខាងក្រោយក៏មានស៊េនស័រស្កេនម្រាមដៃ និងមានកាមេរ៉ាចំនួន 2 គ្រាប់ដោយកាមេរ៉ាគោលទំហំ 13 មេហ្គាភិចស៊ែល Aperture f/2.0 និងមួយគ្រាប់ទៀតទំហំ 5 មេហ្គាភិចស៊ែល ចំណែកកាមេរ៉ាមុខវិញ មានទំហំ 8 មេហ្គាភិចស៊ែល Aperture f/2.4។ ទូរស័ព្ទនេះដំណើរការដោយ Android Nougat និងមានថ្មទំហំ 3000 មីលីអំពែ និងប្រើប្រាស់រន្ធសាកថ្ម microUSB។
Singtech Infinity iMix ជាប្រភេទអេក្រង់ទូរស័ព្ទដែលមានអេក្រង់លាតគែមខ្លី ហើយកំពុងពេញនិយម ព្រោះវាធ្វើឲ្យទូរស័ព្ទមានរូបរាងតូចស្រួលកាន់ ជាមួយនឹងគែមអេក្រង់ទាំង 3 គឺឆ្វេង ស្ដាំ និងលើ មានសភាពខ្លីដូចជាទូរស័ព្ទតម្លៃ Mi Mix, Essential Phone និង Sharp Aquos អញ្ចឹងដែរ។ នៅខាងមុខនេះ យើងក៏ឃើញមានប៊ូតុង Home មួយផងដែរ ដោយវាបានបង្កប់នូវស៊េនស័រស្កេនម្រាមដៃទៀតផង។ ក្រលេកមើលទៅផ្នែកអេក្រង់ទូរស័ព្ទវិញ វាពិតជាប្លែក ដែលធ្វើឲ្យម៉ូឌែលនេះកាន់តែទាក់ទាញជាងទូរស័ព្ទដែលមានតម្លៃខ្ទង់ 100 ដុល្លាស្តើងរដ៏ទៃទៀត។
ចំណែកលក្ខណៈសម្បត្តិមួយចំនួនទៀត វាក៏ស្ថិតនៅក្នុងលក្ខណៈសមរម្យអាចទទួលយកបានផងដែរ ដូចជាអេក្រង់របស់វាមានទំហំ 5.5 អ៊ីញ ជាអេក្រង់ខ្នាតស្ដង់ដារ 16:9 និងកម្រិតបង្ហាញរូបភាព HD (720 x 1280 ភិចស៊ែល)។ កាមេរ៉ាខាងក្រោយក៏ជាកាមេរ៉ាភ្លោះផងដែរ មានទំហំ 13 មេហ្គាភិចស៊ែល Aperture f/2.2 ថែមទាំងមាននូវមុខងារថតព្រាលផ្ទៃខាងក្រោយក៏ពេញនិយមទៀតផង។ ចំណែកឯកាមេរ៉ាមុខមានទំហំ 13 មេហ្គាភិចស៊ែល Aperture f/2.2 ដូចគ្នា ហើយក៏មាននូវមុខងារ Face Beauty ដែលជួយលើកសម្រស់ទៀតផង។
ចំណែកម៉ាស៊ីនខាងក្នុងមានលក្ខណៈខ្លាំង ដោយសាវាប្រើប្រាស់នូវឈីប MediaTek MT6737 មានស៊ីភីយូជាប្រភេទ 64-bit មានចំនួន 4 គ្រាប់ជាស៊ីភីយូ Cortex-A53 ល្បឿន 1.3GHz និងមានរ៉េម 2GB និងអង្គផ្ទុកទិន្នន័យក្នុងម៉ាស៊ីន 16GB ហើយក៏អាចថែមមេម៉ូរីបានដល់ 32GB ទៀតផង។ វាត្រូវបានដំណើរការដោយ Android Nougat និង មានថ្មទំហំ 3000 មីលីអំពែ។ អញ្ចឹងទាំងនេះ គឺជាលក្ខណៈសម្បត្តិត្រួសៗរបស់ Singtech Infinity i1 និង Infinity iMix ដែលឃើញថាលក្ខណៈសម្បត្តិរបស់វាគឺស្ថិតក្នុងលំដាប់មួយល្អប្រសើរជាងមុន អាចប្រើប្រាស់ការងារទូទៅ និងការកំសាន្ដរបស់អ្នកបាន ប៉ុន្ដែអ្វីដែលឡូយនោះគឺអេក្រង់របស់វា និងកាមេរ៉ាភ្លោះ លើសពីនេះវាក៏មានតម្លៃសមរម្យផងដែរ ត្រឹមតែខ្ទង់ 100 ដុល្លាស្តើងប៉ុណ្ណោះ ដែលវានឹងចេញលក់នាពេលឆាប់ៗនេះហើយ។
