នៅក្នុងព្រឹត្តិការណ៍នៃខួបរយៈពេល 10 ឆ្នាំកន្លងទៅថ្មីៗនេះ ក្រុមហ៊ុន Xiaomi បានប្រកាសបង្ហាញនូវផលិតផលថ្មីនៅក្នុងភាពជាដៃគូជាមួយនឹងក្រុមហ៊ុន Lamborghini នោះគឺ រថយន្ត Ninebot Gokart Pro Lamborghini edition។
ផលិតផលថ្មីនេះ គឺមានពណ៌លឿងយ៉ាងទាក់ទាញ ហើយវាក៏មានឡូហ្គោសញ្ញារបស់ក្រុមហ៊ុន Lamborghini នៅលើតួខ្លួនរបស់វាដូចទៅនឹងម៉ូឌែល Gokart Pro ដែលបង្ហាញខ្លួននៅដើមឆ្នាំនេះផងដែរ។ យោងតាមការបង្ហាញនៅលើគណនីបណ្តាញសង្គមហ្វេសប៊ុក #Mi Home - Chbar Ampov បានអោយដឹងថា រថយន្តនេះ គឺមកដល់កម្ពុជាហើយ តែមិនទាន់ដឹងថា មានតម្លៃប៉ុន្មនាននោះទេ។
សូមជំរាបថា Gokart ថ្មីនេះ គឺជាផលិតផលមួយដែលជាកិច្ចសហការរវាងក្រុមហ៊ុន Ninebot-Segway ដែលជាក្រុមហ៊ុនកម្មសិទ្ធិរបស់ក្រុមហ៊ុន Xiaomi និងក្រុមហ៊ុនផលិតរថយន្តដ៏ល្បីឈ្មោះ Lamborghini ដែលមានការប្រើប្រាស់នូវពណ៌លឿង និងមានការឌីស្សាញជាទម្រង់រថយន្តដ៏អស្ចារ្យបំផុត។
រថយន្តតូចនេះ ក៏មានការប្រើប្រាស់នូវកង់ស្ព័រផងដែរ។ រថយន្ត Gokart Pro Lamborghini edition នេះ គឺមានគែមលោហធាតុដ៏រឹងមាំជាមួយនឹងការទ្រទ្រង់នូវទម្ងន់ដល់ទៅ 100 គីឡូក្រាមដែលផ្តល់នូវភាពរឹងមាំក្នុងការប្រើប្រាស់ និងការបើកបរនៅក្នុងផ្លូវដែលមានល្បឿនលឿន។
សម្រាប់រថយន្តនេះ គឺប្រើប្រាស់នូវអគ្គិសនីជាមួយនឹងកម្លាំងថាមពល 432 Wh។ តាមការបញ្ជាក់របស់ក្រុមហ៊ុន Xiaomi នោះ សម្រាប់រថយន្ត NineBot GoKart Pro Lamborghini edition នេះគឺជារថយយន្តដែលសមត្ថភាពក្នុងការបញ្ចេញនូវសំឡេងដូចទៅនឹងម៉ាស៊ីនរថយន្តប្រណាំងដ៏ឆ្លាតវៃផងដែរ។ រថយន្តនេះអាចបើកបរនៅក្នុងល្បឿន 40 គីឡូម៉ែត្រក្នុងមួយម៉ោង៕
