ចូលមកដល់ឆ្នាំថ្មី 2022 ភ្លាម ក្រុមហ៊ុម Samsung គឺមិនបានបង្អង់ពេលយូរទេ គឺចាប់ផ្តើមប្រកាសចេញនូវផលិតផលថ្មីភ្លាម ដោយនៅពេលនេះ ស្មាតហ្វូន The Galaxy S21 FE គឺបានបង្ហាញខ្លួនជាផ្លូវការណ៍ ដូចការគ្រោងទុកអញ្ចឹង។
ស្មាតហ្វូន Galaxy S21 FE 5G ត្រូវបានក្រុមហ៊ុនបំពាក់មកជាមួយអេក្រង់ទំហំ 6.4-inch បង្ហាញចេញបានក្នុងកម្រិត 2340x1080px AMOLED និងអាចរត់បានក្នុងល្បឿន 120Hz ជាមួយនឹងការប៉ះថាច់លើអេក្រង់បានក្នុងកម្រិត 240Hz ថែមទៀតផង។ ស្មាតហ្វូននេះ គឺដំណើរការលើឈីប Snapdragon 888 ដែលមានការគាំទ្រដោយបច្ចេកវិទ្យា 5G រួចជាស្រេច។
និយាយពីការថតរូប ស្មាតហ្វូន Galaxy S21 FE 5G មានកាមេរ៉ាមុខទំហំ 32MP fixed-focus f/2.2 selfie ហើយសម្រាប់កាមេរ៉ាក្រោយ គឺមានចំនួន 3 គ្រាប់ ដោយកាមេរ៉ាគោលមានទំហំ 12MP 1/1.76-inch មាន f/1.8 main camera គាំទ្រដោយមុខងារ OIS និងគ្រាប់ទីពីរមានទំហំ 12MP f/2.2 ultra-wide ហើយនិងគ្រាប់ទីបីមានទំហំ 8MP f/2.4 stabilized 3x tele។
បន្ថែមពីនេះនៅលើកាមេរ៉ារបស់ Galaxy S21 FE 5G ក៏មានបំពាក់មកជាមួយនូវមុខងារ Night mode ដែលអាចចាប់រូបភាពបាន 14 នៅក្នុងពេលតែមួយទៀតផង។ លើសពីនេះទៀត ក្រុមហ៊ុននេះក៏បានបញ្ចូលនូវមុខងារថតវីដេអូ ដែលអាចធ្វើការចាប់បញ្ចូលគា្នរវាងកាមេរ៉ាមុខ និងកាមេរ៉ាក្រោយអោយទៅជាវីដេអូតែមួយបានទៀតផង។
សម្រាប់បច្ចេកវិទ្យាថ្មីវិញ ស្មាតហ្វូននេះ ក៏មានការប្រើប្រាស់នូវបច្ចេកវិទ្យា AI face restoration ដែលមានសមត្ថភាពអាចប្រើជាជំនួយនៅក្នុងការបន្ថែមសម្រស់ទៅលើស្បែក លើរោមភ្នែក ក៏ដូចជាបបូរមាត់ផងដែរ នៅក្នុងនោះ អ្នកប្រើប្រាស់ក៏អាចប្រើប្រាស់មុខងារនេះសម្រាប់ធ្វើការកែប្រែរូបភាណាដែលយើងមិនត្រូវការបានថែមទៀត។ ស្មាតហ្វូន S21 FE 5G គឺមានរូបរាងស្អាត និងស្តើង ហើយនិងស្រាលជាងជំនាន់មុន គឺមានកម្រ៉ាស់ស្តើងត្រឹមតែ 7.9mm និងមានទម្ងន់ត្រឹមតែ 177g ប៉ុណ្ណោះ។ បើមើលទៅលើរូបផ្នែកខាងក្រោយស្មាតហ្វូននេះ គឺមានសភាពស្អាតមែនទែន ដោយសារតែកាមេរ៉ារបស់ស្មាតហ្វូននេះ ត្រូវបានច្របាច់បញ្ចូលគ្នាជាមួយតួស្មាតហ្វូនតែម្តង។
សម្រាប់ថាមពលវិញ ស្មាតហ្វូននេះ មានថ្មទំហំ 4,500mAh ដែលមានសមត្ថភាពអាចប្រើប្រាស់បានដល់ទៅ 2 ថ្ងៃ នេះបើតាមការបញ្ជាក់ពីក្រុមហ៊ុន Samsung។ ស្មាតហ្វូន Galaxy S21 FE 5G នឹងចេញលក់ជាផ្លូវការណ៌នៅថ្ងៃទី 11 ខែមករានេះ ជាមួយនឹងតម្លៃ 749 យូរ៉ូ ឬ 699 ផោន សម្រាប់ម៉ូដែលមានរ៉េមទំហំ 8GB-128GB និងមានជម្រើសពណ៌ ចំនួន 4 ពណ៌ គឺមានដូចជា White, Graphite, Lavender និង new Olive។