កាលពីថ្ងៃទី 29 ខែឧសភាឆ្នាំ 2022 កន្លងទៅនេះ ក្រុមហ៊ុន ASUS ប្រចាំនៅប្រទេសកម្ពុជា បានរៀបចំឡើងនូវ ROG Fan Gathering 2022 ដែលជាព្រឹត្តិការណ៍ដ៏ធំប្រចាំឆ្នាំសំរាប់អ្នកស្រលាញ់ខាងវិស័យកីឡាអេឡិចត្រូនិច អ្នកចូលចិត្តបច្ចេកវិទ្យាថ្មីៗ ក៏ដូចជា Creator ដែលត្រូវការម៉ាស៊ីនកុំព្យូទ័រយួរដៃដែលមានកម្លាំងខ្លាំងនិងការច្នៃប្រឌិតខ្ពស់។
ព្រឹត្តិការណ៌ដ៏អស្ចារ្យមួយនេះ ត្រូវបានក្រុមហ៊ុន ASUS រៀបចំធ្វើឡើងនូវផ្សារទំនើប Aeon Sen Sok ដែលមានការអញ្ជើញភ្ញៀវជាច្រើនកុះករមកចូលរួមប្រមាណ 500 នាក់ ដើម្បីបានធ្វើការសាកល្បងតេស្តម៉ូដែលថ្មីៗ ដែលក្រុមហ៊ុន បានដាក់តាំងបង្ហាញជាច្រើន រាប់តាំងពីម៉ូដែលលំដាប់ទូទៅ រហូតដល់ម៉ូដែលលំដាប់ខ្ពស់ដែលមានតម្លៃរហូតដល់ទៅជិត 5000 ដុល្លា។
តាមប្រសាសន៌របស់លោក Lawrence Liu ដែលជាប្រធានក្រុមហ៊ុន ASUS ប្រចាំនៅប្រទេសកម្ពុជា បានបញ្ជាក់អោយដឹងថា ក្រុមហ៊ុន ASUS ពិតជាសេចក្តីសោមនស្សរីករាយជាខ្លាំង ដែលបានរៀបចំនូវព្រឹត្តិការណ៌ជួបជុំហ្វេនៗរបស់យើងនៅពេលនេះ ដោយសារ 2 ឆ្នាំកន្លងមកនេះ យើងបានខកខានដោយសារតែវិបត្តិនៃមេរោគកូវីតបានរាត្បាតនៅពាសពេញពិភពលោក។
ជាមួយគ្នានេះលោក KimAng Sim ដែលជាប្រធានផ្នែកលក់ផលិតផលម៉ាស៊ីនកុំព្យូទ័រ ASUS ប្រចាំនៅប្រទេសកម្ពុជា ក៏បានធ្វើបទបង្ហាញទៅលើផលិតផលថ្មីជាច្រើន ដែលចេញលក់នៅលើទីផ្សារកម្ពុជាផងដែរ។
ផលិតលលថ្មីៗទាំងនោះរួមានដូចជា សេរ៊ី TUF 2022 សំរាប់អ្នកឌីស្ស៉ាញឬលេងហ្គេមទូទៅ និងស៊េរី ROG Strix G ហើយនិង ROG Strix Scar Edition សំរាប់អ្នកត្រូវការកម្លាំងម៉ាស៊ីនខ្លាំង ព្រមជាមួយនិងសេរ៊ី Zephyrus G15 និង M16 សំរាប់អ្នកដែលត្រូវការម៉ាស៊ីនខ្លាំងហើយស្តើងស្អាត រួមទាំងម៉ូដែលសេរ៊ី Zephyrus Flow Z13 សំរាប់អ្នកត្រូវការម៉ាស៊ីនកម្លាំងយក្សដែលមានទំហំ 13 អ៊ីញ ហើយអាចដកអេក្រង់បានថែមទៀតផង។ ហើយសម្រាប់សេរ៊ីលំដាប់កំពូល ដែលមានអេក្រង់ដល់ទៅ 2 និងមានកម្លាំងខ្លាំងបំផុតចុងក្រោយនោះគឺ ROG Zephyrus DuoGX650 ផងដែរ។
ក្រៅពីការបង្ហាញនូវផលិតផលដ៏គួរអោយចាប់អារម្មណ៍នេះ យើងឃើញមានវត្តមានរបស់តារាល្បីៗជាច្រើនបានមកចូលរួមចែករំលែកនិងសំណេះសំណាលជាមួយភ្ញៀវអ្នកគាំទ្រជាច្រើន រួមមាន៖ លោក ឆេងសុភក្ត្រ (Mr. Reanthort) លោក John Sey Mr. Ream Angkor ក៏ដូចជា Influencer Tik Tokផ្សេងៗទៀតផងដែរ។ អ្វីដែលពិសេសថែមទៀតនោះគឺមានការសម្តែងដើរម៉ូតដែលរៀបចំឡើងដោយក្រុម Cosplay ស្អាតៗជាច្រើនដែលធ្វើអោយទិដ្ធភាពកាន់តែសប្បាយរីករាយ។
សូមជំរាបថា នៅក្នុងព្រឹត្តិការណ៌នេះ ក្រុមហ៊ុន ASUS ក៏មានរៀបចំអោយមានការប្រកួតហ្គេម Valorant រវាងក្រុម Team Max និង ReigN Priority នៅលើកុំព្យូទ័រ ROG ដោយផ្ទាល់តែម្តង។