នៅថ្ងៃទី 21 ខែធ្នូ ឆ្នាំ 2024 នេះ ក្រុមហ៊ុន United Auto Trading Co.,Ltd ដែលជាក្រុមហ៊ុនទទួលសិទ្ធិចែកចាយផ្តាច់មុខនូវរថយន្ត Chevrolet ពីក្រុមហ៊ុនអាមេរិចដ៏ធំមានឈ្មោះថា General Motor ដែលទទួលបានការគាំទ្រ មានឈ្មោះបោះសំឡេងខ្លាំងនៅក្នុងបណ្តាប្រទេសទាំងអាស៊ី និងអឺរ៉ុប បានរៀបចំឡើងនូវសន្និសីទសារព័ត៌មានស្តីពីដំណើរកម្សាន្តអតិថិជន Chevrolet ប្រចាំឆ្នាំ 2024 ទៅកាន់ប្រទេសថៃ ដែលព្រឹត្តិការណ៌នេះ នឹងប្រព្រឹត្តទៅនៅថ្ងៃទី 27-28-29 ខែធ្នូ ឆ្នាំ 2024 ឆាប់ៗនេះហើយ។
ព្រឹត្តិការណ៌នេះ មានការរៀបចំឡើងនូវមជ្ឈមណ្ឌលតាំងបង្ហាញ និងលក់រថយន្ត ដែលមានទីតាំងតាមបណ្តោយសហព័ន្ធរុស្ស៊ី ហើយនិងមានការអញ្ជើញចូលរួមពីសំណាក់ថ្នាក់ដឹកនាំក្រុមហ៊ុន Chevrolet ក៏ដូចជាក្រុមហ៊ុនដៃគូសហការឧបត្ថម និងអតិថិជនរបស់ Chevrolet រួមនិងអ្នកសារព័ត៌មានជាច្រើនរូប។
បើតាមការបញ្ជាក់របស់ក្រុមហ៊ុន United Auto Trading Co.,Ltd បានអោយដឹងថា ការរៀបចំនូវកម្មវិធីដំណើរកំសាន្តសម្រាប់អតិថិជនដ៏ធំប្រចាំឆ្នាំនេះ គឺជាការអបអរសាទរនៃចំណងមិត្តភាពដ៏រឹងមាំជាមួយអតិថិជន Chevrolet និងម្ចាស់ឧបត្ថម្ភរបស់យើង។ Chevrolet គឺជាក្រុមហ៊ុនធំដែលមានដើមកំណើតតាំងពីឆ្នាំ 1911 មកម្ល៉េះ ដោយមានបទពិសោធន៍ចាប់ដៃគូសហការជាមួយក្រុមហ៊ុនធំៗជាច្រើន។ ក្រុមហ៊ុន Chevrolet មានផលិតរថយន្តជាច្រើនប្រភេទប្រកបដោយគុណភាពដែលទទួលស្គាល់ជាសកលថែមទៀតផង។
ក្រុមហ៊ុន United Auto Trading Co.,Ltd បានបញ្ជាក់បន្តថា គោលបំណងសំខាន់នៃដំណើរកម្សាន្តអតិថិជន Chevrolet គឺដើម្បីផ្តល់នូវការបញ្ចូលគ្នានៃ ភាពស្និទ្ធស្នាល ស្វែងយល់បន្ថែមវប្បធម៌ប្រទេសជិតខាង និងជាការដកបទពិសោធន៍ថ្មី ក្នុងការធ្វើដំណើរដោយរថយន្ត Chevrolet របស់អាមេរិកផ្ទាល់លើដងវិថីដ៏វែងឆ្ងាយ។ ហើយនេះ គឺជាដំណើរកម្សាន្តមួយ ដែលមិនត្រឹមតែបង្ហាញពីភាពខ្លាំងរបស់រថយន្ត Chevrolet ប៉ុណ្ណោះទេ ប៉ុន្តែក៏ជាការអបអរចំពោះស្មារតីនៃការធ្វើដំណើរជាក្រុម ដែលជំរុញយើងឲ្យឆ្ពោះទៅកាន់គោលដៅគ្រោងទុក។
សម្រាប់ដំណើរកម្សាន្តឆ្នាំនេះ គឺមានលក្ខណៈជាក្បួនរថយន្តចំនួន 33 គ្រឿង ដែលសមាជិកចូលរួមប្រហែល 150 នាក់។ គោលដៅចេញដំណើរ គឺចេញពីពីរាជធានីភ្នំពេញ ដោយឆ្លងកាត់ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តប៉ៃលិន នឹងឆ្ពោះទៅកាន់គោលដៅខេត្តចន្ទបុរី នៃប្រទេសថៃ។
កម្មវិធីដំណើរកម្សាន្តប្រចាំឆ្នាំនៃអតិថិជនរបស់ក្រុមគ្រួសារ Chevrolet នេះមានការចូលរួម ឧបត្ថម្ភធំដោយ PPCBank ធនាគារភ្នំពេញពាណិជ្ជ និងឧបត្ថម្ភថ្នាក់មាសដោយ ធនាគារឯកទេស ខេប៊ី ដេហាន ម.ក នៅក្នុងនោះក៏មានសហការឧបត្ថម្ភដោយ ធនាគារឯកទេស ដូនពេញ ម.ក និងធនាគារឯកទេស អ៊ីអន (ខេមបូឌា) ភីអិលស៊ី ហើយនិងមានការគាំទ្រដោយ Texas Chicken, Papa rich, Gyu-Kaku, Shabu Shabu On Yasai, Ichiban, Carl Jr, Fairplus, Circle K, និង Norm+ ផងដែរ៕
