Xiaomi ដែលជាក្រុមហ៊ុនបច្ចេកវិទ្យាយក្សមួយរបស់ចិន គឺពិតជាទទួលបាននូវជោគជ័យខ្លាំងមែនទែននៅក្នុងទីផ្សារនាឡិកាឆ្លាតវៃ។ ចាប់តាំងពីម៉ូឌែលដំបូង Mi Band របស់ខ្លួននោះ នាឡិកាឆ្លាតវៃរបស់ក្រុមហ៊ុននេះ គឺពិតជាទាក់ទាញខ្លាំងមែនទែន។ ទោះជាយ៉ាងណាក៏ដោយ ក្រុមហ៊ុននេះ ក៏មានការប្រកួតប្រជែងទីផ្សារខ្លាំងមែនទែនសម្រាប់នាឡិកា Mi Band 3 និង Mi Band 4 របស់ខ្លួនផងដែរ។ នាឡិកា Xiaomi Mi Band 4 មានការលក់បានច្រើនជាង 1 លានគ្រឿងនៅក្នុងរយៈពេល 8 ថ្ងៃប៉ុណ្ណោះ។ នេះ គឺបង្ហាញអំពីការពេញនិយមខ្លាំង ហើយប្រជាប្រិយភាពរបស់នាឡិកានេះពិតជាអាចពង្រឹងទៅលើការចាប់អារម្មណ៍សម្រាប់វត្តមានរបស់ Xiaomi Mi Band 5 ជាក់ជាមិនខាន។
ចាប់ពីនាឡិកា Mi Band 3 នេះ ក្រុមហ៊ុន Xiaomi ក៏ធ្វើការប្រកាសចេញនូវវត្តមានរបស់ NFC version សម្រាប់ប្រើប្រាស់នៅលើនាឡិកានេះផងដែរ។ដូចនេះ ក្រុមហ៊ុន Xiaomi នឹងធ្វើការបោះជំហានទៅមុខមួយកម្រិតទៀតសម្រាប់ការប្រតិបត្តិទៅលើមុខងារ NFC នេះ សម្រាប់ពេលនេះ Xiaomi NFC Bands គឺអាចដំណើរការបានតែនៅក្នុងទីផ្សាររបស់ចិនប៉ុណ្ណោះ។ របាយការណ៍ចុងក្រោយបំផុតពី TizenHelp បានបញ្ជាក់ថា សម្រាប់ Xiaomi Mi Band 5 NFC version នឹងអាចដំណើរការបានសម្រាប់ទីផ្សារពិភពលោកផងដែរ។ បើទោះបីជារបាយការណ៍នេះ នៅមិនទាន់បញ្ជាក់នៅឡើយទេនោះ វាគឺពិតជាសមហេតុផលសម្រាប់ក្រុមហ៊ុន Xiaomi ក្នុងការប្រកាសចេញនូវការទ្រទ្រង់ទៅលើមុខងារ NFC នេះ សម្រាប់ទីផ្សាររបស់ពិភពលោកនោះ។ នេះ គឺជាមានការពិចារណាថា អ្នកប្រើប្រាស់នាឡិកា Xiaomi Mi Band 4 NFCគឺអាចប្រើប្រាស់បាននៅក្រៅទីផ្សាររបស់ចិននោះ។
តាមការបញ្ជាក់នៅក្នុងរបាយការណ៍នេះ នាឡិកា Mi Band 5 NFC global version នេះនឹងទ្រទ្រង់ទៅលើការចាយលុយអនឡាញ និងប្រើប្រាស់នៅលើការចំណាយនៅលើរថយន្តក្រុងថែមទៀត។ សម្រាប់មុខងារទាំងនេះ អាចដំណើរការបាននៅក្នុងប្រទេសចិន។ ក្រុមហ៊ុន Xiaomi ធ្វើការបញ្ចេញនូវនាឡិកា Mi Band របស់ខ្លួនជារៀងរាល់ឆ្នាំដូចនេះ វត្តមានរបស់ Band 5 របស់ក្រុមហ៊ុននេះនឹងបង្ហាញខ្លួននៅឆ្នាំក្រោយនេះ។ ព័ត៌មានកាលពីពេលមុននេះបញ្ជាក់ថា នាឡិកា Mi Band 5 ប្រហែលជាបង្ហាញខ្លួននៅក្នុងត្រីមាសទី 2 ឆ្នាំ 2020 ខាងមុខនេះ។
ជាធម្មតា ក្រុមហ៊ុន Xiaomi នឹងធ្វើការសហការជាមួយនឹងក្រុមហ៊ុន Huami សម្រាប់នាឡិកាជំនាន់ថ្មីនេះរបស់ខ្លួន។ ដូចអ្វីដែលយើងបាននិយាយកាលពីពេលមុននេះ នេះ គឺមិនមែនជាការបញ្ជាក់ជាផ្លូវការពីក្រុមហ៊ុននោះទេ។ តើអ្នកគិតអ្វីខ្លះអំពីនាឡិកា Xiaomi Mi Band 5 NFC សម្រាប់អ្នកប្រើប្រាស់នៅលើទីផ្សារអន្តរជាតិនោះ?
