ខណៈពេលដែលក្រុមហ៊ុនផលិតទូរទស្សន៍ជាច្រើន បានធ្វើការផ្លាស់ប្តូរទៅលើបច្ចេកវិទ្យា MiniLED display technology សម្រាប់ទូរទស្សន៍ High-End របស់ខ្លួននោះ ត្រូវបានអ្នកតាមដាននៅក្នុងឥឧស្សាហ៍កម្មនេះ និយាយថា វានឹងមានការប្រកួតប្រជែងកាន់តែខ្លាំងក្លា រវាងម៉ាកយីហោជាច្រើនដូចជាក្រុមហ៊ុន LG, Samsung និង TCL សម្រាប់ការដណ្តើមយកចំណែកនៅក្នុងទីផ្សារសំខាន់ៗជាច្រើន។
តាមការបញ្ជាក់នៅក្នុងរបាយការណ៍ចេញពី TheElec បានអោយដឹងថា ក្រុមហ៊ុនផលិតទូរទស្សន៍កំពូលចំនួន 3 របស់ពិភពលោកនេះ បានប្រកាសបង្ហាញនូវទូរទស្សន៍ MiniLED TV របស់ខ្លួននៅក្នុងព្រឹត្តិការណ៍ CES 2021 កាលពីពេលថ្មីៗនេះ។ ទូរទស្សន៍ MiniLED គឺជាទម្រង់មួយនៃទូរទស្សន៍ LCD TVs ដែលប្រើប្រាស់នូវពន្លឺ LED តូចៗនៅផ្នែកខាងក្រោយ។
អំពូលភ្លើង LEDs នេះមានចន្លោះពី 100 ទៅ 200 micrometers ដែលមានទំហំតូចជាង LEDs ធម្មតាដែលមានទំហំ 300 micrometers ។ នេះគឺជាបដិវត្តន៍ថ្មីនៃបច្ចេកវិទ្យា LCD technology សម្រាប់អេក្រង់ OLED ។
ថ្មីៗនេះ ក្រុមហ៊ុន Samsung បានប្រកាសបង្ហាញនូវទូរទស្សន៍ Neo QLED TV របស់ខ្លួនដែលនឹងចាប់ផ្តើមដាក់លក់នៅក្នុងខែមីនា ឆ្នាំ 2021 នេះផងដែរ ដោយកម្រិតអេក្រង់របស់ទូរទស្ស៍ថ្មីនេះ គឺមានកម្រិត 4K និង 8K។
ស្រដៀងគ្នានេះផងដែរ ក្រុមហ៊ុន LG ក៏បានបង្ហាញនូវទូរទស្សន៍ QNED TV របស់ខ្លួននៅក្នុងខែធ្នូកាលពីឆ្នាំ 2020 កន្លងទៅផងដែរ ដែលទូរទស្សន៍នេះ គឺមានអេក្រង់កម្រិត 86 inch 8K។ អេក្រង់នេះ មានភ្លើង 30,000 MiniLEDs ដែលមានច្រើនជាង 2,500 local dimming zones។ ក្រុមហ៊ុននេះ ក៏មានគម្រោងក្នុងការបង្ហាញនូវទូរតស្សន៍ 86 inch, 90 inch, 95 inch និង 99 inch ក្នុងពេលឆាប់ៗនេះផងដែរ៕