ថ្មីៗនេះ ក្រុមហ៊ុន Republic of Gamers (ROG) និង IKEA បានយល់ព្រមបន្តចាប់ដៃគ្នានៅក្នុងកិច្ចសហប្រតិបត្តិការទៅលើការឌីស្សាញនិងផលិតនូវគ្រឿងសង្ហារឹម និង Accessories ជាច្រើនដែលផ្តោតទៅលើការលេងហ្គេម។ កិច្ចព្រមព្រៀងនេះ គឺបានចាប់ផ្តើមទទួលបាននូវលទ្ធផលជាច្រើនហើយ ដោយសារតែកាលពីខែមុននេះ ក្រុមហ៊ុន IKEA បានបង្ហាញនូវគ្រឿងសង្ហារឹមលេងហ្គេមជាច្រើនទៅកាន់ទីផ្សាររបស់ចិន ជាមួយនឹងក្តីសង្ឃឹមក្នុងការពង្រីកនូវផលិតផលជាច្រើនទៀតសម្រាប់ទីផ្សារពិភពលោកនៅក្នុងឆ្នាំនេះ។
ផលិតផលលេងហ្គេមថ្មីៗនេះ គឺផ្តោតទៅលើការលេងហ្គេមដែលក្នុងនោះក្រុមហ៊ុន IKEA ក៏បញ្ចេញនូវផលិតផលចំនួន 6 ក្រុមរបស់ខ្លួនដែលក្នុងនោះមានដូចជា HUVUDSPELARE, UTESPELARE, MATCHSPEL, GRUPPSPEL, UPPSPEL និង LÅNESPELARE ។ ផលិតផលមួយនៅក្នុងចំនោមផលិតផលក្នុងក្រុមទាំង 6 នេះ គឺមានឈ្មោះហៅថា UPPSPEL ហើយនេះគឺជាកិច្ចសហការរបស់ក្រុមហ៊ុនទាំង 2 នេះ។
ផលិតផលរបស់ UPPSPEL នេះគឺត្រូវបានឌីស្សាញ និងផលិតដោយក្រុមហ៊ុន Asus ROG និង IKEA ។ សម្រាប់ផលិតផល 5 ក្រុមទៀតនោះ គឺត្រូវបានអភិវឌ្ឍដោយក្រុមហ៊ុន IKEA ។ នៅក្នុងបញ្ជីផលិតផលរបស់ក្រុមហ៊ុន IKEA/ Republic of Gamers គឺមានច្រើនជាង 30 មុខ។
សម្រាប់បញ្ជីនៃគ្រឿងសង្ហារឹមជាច្រើន ដែលផ្តោតទៅលើហ្គេមនេះ ត្រូវរំពឹងថា នឹងបង្ហាញខ្លួននៅក្នុងប្រទេសជប៉ុននៅក្នុងខែឧសភានេះ។ ផលិតផលទាំងនេះ គឺមានតុ និងកៅអីលេងហ្គេម ខ្នើយ និងផលិតផលជាច្រើនទៀតដែលប្រើប្រាស់នៅក្នុងការលេងហ្គេមនោះ។ អ្នកលេងហ្គេមជាច្រើន ត្រូវរង់ចាំនូវផលិតផលទាំងនេះ ដែលនឹងបង្ហាញខ្លួននៅក្នុងខែតុលា ឆ្នាំ 2021 នេះ៕