នៅក្នុងព្រឹត្តិការណ៍ Spring Loaded យប់មិញក្រុមហ៊ុន Apple បានដាក់បង្ហាញចេញនូវសមត្ថផលថ្មីៗរបស់ខ្លួនរួមមាន New iPad Pro, New iMacs, និង AirTags ជាដើម។ ហើយក្នុងសំនេរអត្ថបទនេះយើងនឹងនិយាយតែចំពោះ New iPad Pro Series ជាមុនសិន សម្រាប់ផលិតផលផ្សេងទៀតយើងនឹងធ្វើការចុះផ្សាយបន្តបន្ទាប់ទៀត។
ការរចនារូបរាង
យើងឃើញថា iPad Pro 12.9-inch ស៊េរីឆ្នាំ 2021 នេះគឺពិតជាមានកម្រាស់ក្រាស់ជាងជំនាន់មុនបន្តិចមែនគឺឡើងពី 5.9mm នៅលើជំនាន់ឆ្នាំ 2020 ដល់ 6.4mm នៅលើជំនាន់ថ្មីឆ្នាំ 2021 ហើយទំងន់ក៏ឡើងជាងជំនាន់មុនផងដែរគឺដល់ 682 ក្រាមសម្រាប់ម៉ូដែល Wi-Fi និង 685 ក្រាមសម្រាប់ម៉ូដែល 5G ប៉ុន្តែ រក្សាប្រវែងបណ្តោយ និងទទឹងខ្លួនដូចគ្នាដដែល។ ហើយសម្រាប់ម៉ូដែល iPad Pro 11-inch 2021 វិញគឺរក្សាទំហំវិមាត្រ និងកម្រាស់ដូចមុនដដែល ប៉ុន្តែស្រកទំងន់ជាង iPad Pro 11-inch 2020 គឺមកនៅត្រឹម 466 ក្រាមសម្រាប់ម៉ូដែល Wi-Fi និង 470 ក្រាមសម្រាប់ម៉ូដែល 5G។
បច្ចេកវិទ្យាអេក្រង់ថ្មី
iPad Pro ជំនាន់ថ្មីឆ្នាំ 2021 នេះគឺពិតជាបានបំពាក់នូវបច្ចេកវិទ្យាអេក្រង់ថ្មី mini-LED Display ពិតមែន ប៉ុន្តែ សម្រាប់តែម៉ូដែល iPad Pro 12.9-inch ប៉ុណ្ណោះ ហើយសម្រាប់ម៉ូដែល 11-inch គឺបន្តប្រើបន្ទះអេក្រង់ LCD ដូចមុនដដែល។ Apple បានហៅអេក្រង់ថ្មី mini-LED Display របស់ iPad Pro 12.9-inch ថា Liquid Retina HDR Display។ បច្ចេកវិទ្យាបន្ទះអេក្រង់ថ្មីនេះមានលក្ខណៈពិសេសស្រដៀងគ្នាទៅនឹងបន្ទះអេក្រង់ Pro Display HDR របស់ម៉ូនីទ័រនៃម៉ាស៊ីនកុំព្យូទ័រលើតុដែរ។
វាផ្តល់នូវកម្រិតពន្លឺខ្ពស់ដល់ 1,600nits និងក្នុងកម្រិត 1,000nit នៅពេលកំនត់ប្រើអេក្រង់បែប Full-Screen។ បន្ទះអេក្រង់ Liquid Retina HDR Display ថ្មីនេះទ្រទ្រង់នូវបច្ចេកវិទ្យាចាក់ពណ៌ DCI-P3, Dolby Vision, HDR10, Wide Color Gamut, True-tone ជាមួយកម្រិត refresh rate 120Hz ProMotion។
បន្ថែមពីនេះបន្ទះអេក្រង់ថ្មីនេះប្រើប្រាស់នូវអំពូល LED តូចៗចំនួន 10,000 គ្រាប់ដែលមានផ្ទៃបាញ់ពន្លឺចេញដល់ 2,500 Local dimming zones បើធៀបនឹងបន្ទះអេក្រង់ iPad Pro ឆ្នាំ 2020 គឺមានអំពូល LED តែ 72 គ្រាប់តែប៉ុណ្ណោះ។ ចំនែកបន្ទះអេក្រង់របស់ New iPad Pro 11-Inch វិញគឺមានកម្រិតពន្លឺ 600nits, ភ្ជាប់នូវបច្ចេកវិទ្យា True-tone, DCI-P3 និងមានកម្រិត refresh rate 120Hz ProMotion គ្នាដែរ។
ប្រព័ន្ទកាមេរ៉ា
ងាកមកប្រព័ន្ធកាមេរ៉ាដែលដំឡើងនៅលើ New iPad Pro ឆ្នាំ 2021 នេះវិញគឺនៅរក្សាទំហំដូចមុនដដែលគឺ 12MP សម្រាប់កាមេរ៉ាគោល ឬហៅថា TrueDepth Camera និងទំហំ 10MP សម្រាប់លែន Ultra wide ជាមួយសមត្ថភាពថតប្លង់ទូលាយបានកម្រិត 122 ដឺក្រេ រួមនឹងសែនស័រ TOF 3D LiDAR សម្រាប់វ៉ាស់កម្មវត្ថុដូចមុន។ ចំនែកកាមេរ៉ាមុខគឺមានទំហំ 12MP ជាប្រភេទលែនទូលាយកម្រិត 122 ដឺក្រេ។ សម្រាប់ប្រព័ន្ធកាមេរ៉ារបស់ iPad Pro ជំនាន់ថ្មីនេះត្រូវបាន Apple បង្កើនផលិតភាពទៅលើមុខងារ ISP និង NPU អោយធ្វើការគណនាប្លង់ថតបានកាន់តែលឿនរហ័សជាងមុន រួមជាមួយនឹងមុខងារ HDR 3 ដែលបញ្ជាទៅលើសែនស័រ LiDAR អោយជួយធ្វើការក្នុងការ focus ប្លង់ថតនៅទីតាំងខ្សោយពន្លឺបានរហ័ស និងបានច្បាស់ជាងមុនផងដែរ។
កំលាំងម៉ាស៊ីនថ្មីខ្លាំងជាងមុន
និយាយពីកំលាំងម៉ាស៊ីនឯណេះវិញ New iPad Pro 2021 ត្រូវបានក្រុមហ៊ុនធ្វើការបំពាក់នូវបន្ទះឈីប M1 ដែលបានធ្វើការអភិវឌ្ឍន៍ចេញពីឈីប M1 របស់ MacBook Pro។ បន្ទះឈីបថ្មីមានសមត្ថភាពប្រើការខ្លាំងជាងបើធៀបនឹងបន្ទះឈីប A12Z ដែលប្រើនៅលើ iPad Pro 2020។ M1-iPad Pro 2021 មាន CPU ខ្លាំងជាងមុន 50% និង GPU ខ្លាំងជាងមុន 40% បើធៀបនឹង CPU និង GPU របស់ឈីប A12Z។
iPad Pro ជំនាន់ថ្មីនេះមានជម្រើសរ៉េមទំហំចាប់ពី 8GB ដល់ 16GB ជាមួយម៉េមូរីក្នុងម៉ាស៊ីនចាប់ពីទំហំ 128GB/256GB/512GB/1TB ដល់ 2TB។ New iPad Pro 2021 ប្រតិបត្តិការដោយ iPadOS14.5។ iPad Pro 12.9-inch 2021 មានថ្មកំលាំង 40.88Whr រីឯ iPad Pro 11-inch 2021 មានថ្មកំលាំង 28.65Whr និងទ្រទ្រង់បច្ចេកវិទ្យាសាកភ្លើងល្បឿន 18W តាមរយះរន្ធចម្លង USB-C 3.1/Thunderbolt 4 ដូចគ្នា។
តម្លៃ
iPad Pro 12.9-inch មានតម្លៃចាប់ពី $1,100 ដល់ $2,400 និង iPad Pro 11-inch មានតម្លៃចាប់ពី $800 ដល់ $2,100 ទៅតាមទំហំរ៉េម ទំហំផ្ទុកក្នុងម៉ាស៊ីន និងម៉ូដែលរបស់ពូកវា (Wi-Fi ឬ 5G)៕
