ក្រុមហ៊ុនផលិតគ្រឿងបរិក្តាសម្រាប់ប្រើប្រាស់ជាមួយកុំព្យូទ័រ និងទូរស័ព្ទដៃរបស់ចិន Anker បានប្រកាសចេញនូវឧបករណ៍ស៊េរីថ្មីមួយដែលផ្តល់នូវអត្ថប្រយោជន៍ប្រើប្រាស់ដ៏អស្ចារ្យ និងផ្តល់នូវភាពងាយស្រួលក្នុងការប្រើប្រាស់ក្នុងកិច្ចការងារប្រចាំថ្ងៃ។ Anker PowerExpand 12-in-1 USB-C PD Media Dock គឺជាមជ្ឈមណ្ឌលសម្រាប់ធ្វើតភ្ជាប់ជាមួយឧបករណ៍ដ៏សម្បូរបែបមួយដែលផ្តល់អោយយើងនូវភាពងាយស្រួលក្នុងការប្រើប្រាស់សម្រាប់បំពេញកិច្ចការងារប្រចាំថ្ងៃវបានកាន់តែរលូនជាមួយមុខងារដ៏សម្បូរបែបមិនធ្លាប់មានពីមុនមក។ ឧបករណ៍ស៊េរីថ្មីនេះត្រូវបានក្រុមហ៊ុនធ្វើការរចនាឡើងមានរាងមូលតូចល្មមទំហំធំជាងកំភួនដៃមនុស្សចាស់បន្តិច។
នៅលើឧបករណ៍នេះមានមកជាមួយរន្ធសម្រាប់តភ្ជាប់ទៅកាន់ឧបករណ៍ផ្សេងៗចំនួន 12 រន្ធដោយក្នុងនោះរួមមានរន្ធដោតម៉ាយក្រូហ្វូន, SD/ microSD, USB-C3.1, 2x USB-A, HDMI2.0, DP1.4, PC Input/Output និង Network Port (Ethernet RJ45)។ PowerExpand 12-in-1 USB-C PD Media Dock មានរន្ធសាកភ្លើងចូលជាប្រភេទ USB-C ដែលទ្រទ្រង់កំលាំងសាកចូលល្បឿនលឿនដល់ទៅ 45W។ ហើយវាក៏ផ្តល់អោយយើងជាអ្នកប្រើប្រាស់អាចធ្វើការកូពីរូបភាព ចម្រៀង និងវីដេអូចេញចូលបានលឿនតាមរយះរន្ធ USB-A ជាមួយល្បឿនដល់ទៅ 5Gbps ថែមទៀតផង។
ចំនែករន្ធសម្រាប់ដោត SD/microSD វិញមានលទ្ធភាពអាចទ្រទ្រង់បានជាមួយនឹងម៉េមូរីកាតគ្រប់ប្រភេទតែម្តងក្នុងការចម្លងរូបភាព ឬវីដេអូហ្វាល់។ បន្ថែមពីនេះសម្រាប់រន្ធ DisplayPort និង HDMI2.0 ដែលភ្ជាប់នៅលើ Board របស់វាអាចអោយយើងធ្វើការតភ្ជាប់ទៅកាន់អេក្រង់ម៉ូនីទ័របានច្រើនក្នុងពេលតែមួយដែលផ្តល់នូវបទពិសោធន៍ក្នុងការប្រើប្រាស់បំពេញកិច្ចការងារក៏ដូចជាការកម្សាន្តបានច្រើនក្នុងពេលដំណាលគ្នាធ្វើអោយកិច្ចការងារ និងការកម្សាន្តប្រចាំថ្ងៃរបស់យើងប្រព្រឹត្តិទៅដោយភាពរលូន និងលឿនរហ័សទាន់ចិត្ត។
PowerExpand 12-in-1 USB-C PD Media Dock មានភ្ជាប់មកជាមួយឆ្នាំងសាកកំលាំង 65W, ខ្សែ USB-C និង USB2.0។ ហើយឧបករណ៍នេះអាចទ្រទ្រង់បានជាមួយនឹងឧបករណ៍ដំណើរការដោយ MacOS, iPadOS, Windows, Linux និង Chrome OS ប៉ុន្តែសម្រាប់ឧបករណ៍ Android គឺមិនមាននៅក្នុងបញ្ចីរបស់ Anker នោះទេ។ ឧបករណ៍ស៊េរីថ្មីដែលមានមុខងារច្រើនយ៉ាងរបស់ Anker មួយនេះមានដាក់លក់នៅលើបណ្តាញលក់ទំនិញអនឡាញ Taobao របស់ចិនជាមួយតម្លៃ CNY899 ឬខ្ទង់ប្រហែល $131 ហើយវាក៏ឃើញមាននៅលើបញ្ចីលក់របស់បណ្តាញ Amazon ផងដែរ ហើយវាអាចនឹងត្រូវលក់នៅទីផ្សារសហរដ្ឋអាមេរិក ប៉ុន្តែចំពោះតម្លៃគឺមិនទាន់ត្រូវបានបង្ហាញនៅឡើយទេ៕
