ក្រុមហ៊ុន Asus ទើបតែបានធ្វើការប្រកាសចេញកាបូបស្ពាយសម្រាប់កុំព្យូទ័រយូរដៃ ROG Gaming ទំហំ 16-inch ដែលមានការរចនាឡើងយ៉ាងពិសេសជាមួយប្រព័ន្ធសុវត្ថិភាព និងផាសុខភាពសម្រាប់ការប្រើប្រាស់ ជាពិសេស គឺឡូយបំផុតសម្រាប់ Gamer ដែលជ្រើសរើសប្រើម៉ាស៊ីន Gaming Laptop ម៉ាក ROG។ ការកាបូបស្ពាយស៊េរីថ្មីនេះ មានឈ្មោះ Asus ROG Ranger Gaming Backpack 16។
កាបូបស្ពាយស៊េរីថ្មីនេះ មិនត្រឹមតែរចនាឡើងសម្រាប់ការប្រើប្រាស់ជាមួយនឹងម៉ាស៊ីន ROG Gaming Laptop ប៉ុណ្ណោះទេ ប៉ុន្តែ វាផ្តល់នៅទំហំធំទូលាយសម្រាប់ការទុកដាក់សំភារៈជាច្រើនទៀតបានដូចជាការដាក់ឆ្នាំងសាក, Tablet និងសំភារៈសំខាន់ៗជាច្រើនទៀត។
កាបូបស្ពាយ Asus ROG Ranger Gaming Backpack 16 ត្រូវបានផលិតឡើងពីសារធាតុ 1260D high-density polyester ដែលមានភាពទន់តែស្វិតមាំល្អធន់នឹងភាពឆ្កូត ជាមួយនឹងស្បែកប្រភេទ PU ដែលផ្តល់នៅភាពធន់ មិនជ្រាបទឹក ហើយជាពិសេសវាបានបំពាក់នូវខ្សែរ៉ួតដែលមានសមត្ថភាពការពារទឹក water-repellent zippers បានយ៉ាងមានសុវត្ថិភាពខ្ពស់។
បន្ថែមពីនេះ កាបូបស្ពាយស៊េរីថ្មីនេះ មានភ្ជាប់មកជាមួយហោប៉ៅជាច្រើនដែលផ្តល់ភាពងាយស្រួលក្នុងការទុកដាក់របស់របរ។ ទោះជាយ៉ាងណា ក្រុមហ៊ុន Asus មិនទាន់បានបង្ហាញពីតម្លៃ និងកាលបរិច្ឆេទក្នុងការប្រកាសចេញលក់កាបូបស្ពាយស៊េរីថ្មី ROG Ranger Gaming Backpack 16 នៅឡើយទេ ប៉ុន្តែ មានការរំពឹងថា កាបូបស្ពាយស៊េរីថ្មីមួយនេះនឹងដាក់លក់នៅលើទីផ្សារក្នុងហាងឆាប់ៗខាងមុខនេះ៕
