Leica បានប្រកាសចេញកូនកាមេរ៉ាស៊េរីថ្មី Sofort 2 ដែលអាចថតរូប និងព្រីនរូបភាពបានភ្លាមតែម្តង

ក្រុមហ៊ុនផលិតកាមេរ៉ារបស់ប្រទេសអាល្លឺម៉ង Leica ទើបតែបានប្រកាសចេញកូនកាមេរ៉ាដ៏តូចច្រឡឹងស៊េរីថ្មីម៉ូដែល Leica Sofort 2 (ដោយពាក្យ Sofort ជាភាសារអាល្លឺម៉ងមានន័យថា  “ភ្លាមៗ”)។ Sofort 2 គឺជាជំនាន់ទីពីរបន្ទាប់ពីជំនាន់ទីមួយដែលបានប្រកាសចេញកាលពីប៉ុន្មានឆ្នាំមុននេះ ហើយតម្លៃរបស់កូនកាមេរ៉ានេះ គឺនៅតែមានតម្លៃថ្លៃសម្រាប់ពេលបច្ចុប្បន្ន។

Leica Sofort 2 មានជម្រើសបីពណ៌ គឺខ្មៅ ស និងក្រហម។ កាមេរ៉ាកូនកាត់ប្រភេទ Hybrid Digital Camera ដ៏តូចច្រឡឹងនេះត្រូវបានក្រុមហ៊ុនបំពាក់មកជាមួយសែនស័រទំហំ 4.9MP ខ្នាត 1/5" ជាប្រភេទ CMOS sensor ហើយរាល់រូបភាពដែលបានផ្តិតចេញមក គឺត្រូវផ្ទុកនៅលើម៉េមូរីប្រភេទ microSD។ ក្រៅពីមានសមត្ថភាពថតរូបបានស្អាត Leica Sofort 2 អាចធ្វើជាកូនម៉ាស៊ីនព្រីនសម្រាប់ព្រីនរូបថតបានភ្លាមៗ ហើយយើងអាចផ្ទេររូបភាពដែលយើងបានថតពីក្នុងទូរស័ព្ទដៃ ឬកាមេរ៉ារបស់ Leica ចូលទៅកាន់ Sofort 2 ដើម្បីព្រីមចេញមកបានថែមទៀតផង។ សម្រាប់ការព្រីនរូបថតគឺប្រើប្រាស់នូវ Sofort color film mini និងអាចព្រីនរូបភាពចេញបានក្នុងទំហំ  86x54mm។

នៅលើផ្ទៃខាងក្រោយរបស់ Leica Sofort 2 មានអេក្រង់ LCD ទំហំ 3-inch និងមានមីនុយកម្មវិធីកាមេរ៉ាដូចគ្នានឹងកាមេរ៉ាផ្សេងទៀតរបស់ Leica ដែរ។ ចំពោះលែនកាមេរ៉ាវិញ ត្រូវបានប្រើជាប្រភេទ 28mm equivalent Leica Summar f/2 lens ដែលដូចគ្នាទៅនឹង Focal Length នៅលើស៊េរីកាមេរ៉ា  Leica Q series fixed-lens cameras ដូច្នេះដែរ។ Leica Sofort 2 ត្រូវបានក្រុមហ៊ុនប្រកាសតម្លៃលក់ប្រហែល €389 ឬខ្ទង់ $389 ហើយនឹងត្រូវចេញលក់ផ្លូវការណ៍នៅថ្ងៃទី 09 ក្នុងខែ វិច្ឆិកា ឆ្នាំ 2023 ខាងមុខនេះ៕