នៅពេលនេះ ក្រុមហ៊ុន Huawei បានចាប់ផ្តើមលក់ស្មាតហ្វូនជំនាន់ថ្មី Pura 80 Pro និង Pura 80 Pro+ ជាលើកដំបូងបំផុតនៅក្នុងប្រទេសចិនហើយ ដោយលទ្ធផលដែលទទួលបាននៅពេលនេះ គឺពិតជាអស្ចារ្យខ្លាំងមែនទែន។ បើមើលទៅលើតម្រូវការរបស់ស្មាតហ្វូន Huawei Pura 80 Pro និង Pro+ គឺច្រើនមែនទែន ដែលធ្វើអោយការបង្ហាញវត្តមានស្មាតហ្វូន Ultra អាចនឹងត្រូវពន្យារពេលមួយរយៈសិនមុនការចេញលក់។

គួរបញ្ជាក់ថា គិតចាប់ពីម៉ោង 10:08 នៅថ្ងៃចេញលក់ដំបូងនេះ ក្រុមហ៊ុន Huawei បើកទ្វារហាង Offline និងOnline របស់ខ្លួនដែលមានមនុស្សជាច្រើនរង់ចាំទិញស្មាតហ្វូន Huawei Pura 80 Pro និង Pura 80 Pro+ នៅក្នុងប្រទេសចិន។ ប្រភពខាងលើនេះបន្តថា សម្រាប់ការលក់ស្មាតហ្វូន Pura 80 Pro នៅពេលនេះ បានបង្ហាញថា ក្រុមហ៊ុន Huawei អាចនឹងពន្យារពេលក្នុងការលក់ទៅលើស្មាតហ្វូន Ultra។

មានការរំពឹងថា ក្រុមហ៊ុនអាចនឹងចេញលក់ស្មាតហ្វូន Pura 80 Ultra នេះ នៅពាក់កណ្តាលខែកក្កដាឆ្នាំនេះ។ សម្រាប់ការលក់លើកទី 1 របស់ស្មាតហ្វូន Pura 80 Pro និង Pro+ នៅក្នុងហាងលក់ផ្លូវការ និង online channels ផ្លូវការរបស់ក្រុមហ៊ុននេះគឺអស់ស្តុកនៅក្នុងពេល 10 នាទីប៉ុណ្ណោះ បន្ទាប់ពីការលក់ជាផ្លូវការនេះ។ រូបភាពជាច្រើនបង្ហាញថា តម្រូវការទៅលើស្តុករបស់ស្មាតហ្វូន Huawei Pura 80 Pro/Pro+ គឺមានចំនួនខ្ពស់មែនទែនសម្រាប់អ្នកប្រើប្រាស់ជាច្រើននៅក្នុងប្រទេសចិន។

តាមរយៈនៃការដាក់លក់នេះ មានអ្នកគាំទ្រជាច្រើនតម្រង់ជួរគ្នាទិញស្មាតហ្វូននេះ នៅលើផ្លូវ Nanjing East Road ក្នុងទីក្រុងស៊ាងហៃ ហាង Sanlitun នៅទីក្រុងប៉េកាំង និងជាច្រើនកន្លែងទៀតផងដែរ។ អតិថិជនជាច្រើននិយាយថា ពួកគេត្រូវរង់ចាំប្រហែលជា ១៥ នាទីដើម្បីអាចទទួលបានស្មាតហ្វូននេះ។

នៅក្នុងការបង្ហោះផ្សេងទៀតបង្ហាញថា ហាងជាច្រើនរបស់ក្រុមហ៊ុន Huawei គឺមានការតម្រង់ជួរទិញស្មាតហ្វូន Pura 80 ថ្មីនេះដោយសារតែស្មាតហ្វូននេះមានទម្ងន់ស្រាល និងសមត្ថភាពនៃការថតរូបភាពខ្លាំង។ មានការព្យាករណ៌ថា ស្មាតហ្វូន  Pura 80 series នឹងមានតម្រូវការខ្ពស់កើនឡើងខ្លាំងនៅលើទីផ្សារនៅក្នុងឆ្នាំនេះ ហើយការនាំចេញស្មាតហ្វូននេះ អាចនឹងមានកំណើនខ្ពស់ជាងជំនាន់មុនផងដែរ៕