នៅថ្ងៃប្រកាសចេញកំពូលស្មាតហ្វូន Galaxy S25 Series កាលពីថ្ងៃទី 22 ថ្មីៗនេះ Samsung បានធ្វើការបង្ហាញវីដេអូ teaser របស់ស្មាតហ្វូនម៉ូដែលថ្មីសមាជិកថ្មីមួយទៀតដែលមានឈ្មោះថា Galaxy S25 Edge ប៉ុន្តែ ក្រុមហ៊ុនមិនបានបង្ហាញព័ត៌មានលម្អិតពីស្មាតហ្វូនសមាជិកថ្មីក្នុងគ្រួសារ Galaxy S25 មួយនេះនោះទេ។

ដោយឡែកនៅថ្ងៃនេះ បើតាមការបង្ហាញនៅលើទិន្នន័យ Database របស់ស្ថាប័ន 3C ប្រទេសចិនបានបង្ហាញថា Galaxy S25 Edge ដែលមានលេខកូដ SM-S9370 នឹងគាំទ្រកំលាំងសាកភ្លើងល្បឿនលឿន 25W ដែលដូចគ្នានឹងម៉ូដែល Galaxy S25 ដែរ គ្រាន់តែទាបជាងកំលាំងសាកភ្លើងនៅលើ Galaxy S25+ និង Galaxy S25 Ultra ដែលមានកំលាំងដល់ 45W។ ហើយសម្រាប់ទំហំថ្មរបស់ Galaxy S25 Edge មិនទាន់ត្រូវបានគេបញ្ជាក់នៅឡើយទេ ប៉ុន្តែ មានការសន្និដ្ឋានថា ស្មាតហ្វូនម៉ូដែលថ្មីនេះអាចមានថ្មទំហំចន្លោះពី 3,000mAh ទៅ 4,000mAh។

Samsung Galaxy S25 Edge អាចនឹងបង្ហាញវត្តមានផ្លូវការណ៍នៅអំឡុងខែមេសា ឆ្នាំ 2025 ហើយអាចនឹងជ្រើសរើសទីផ្សារលក់ក្នុងចំនួនមានកំនត់។ Galaxy S25 Edge នឹងមានអេក្រង់ទំហំ 6.6-inch AMOLED Display កម្រិតបង្ហាញ Full-HD+ ទំហំ 120Hz, ប្រើបន្ទះឈីប Snapdragon 8 Elit For Galaxy និងមានកាមេរ៉ាទំហំ 200MP Primary Sensor រួមនឹងសែនស័រមួយគ្រាប់ទៀតទំហំ 50MP៕