បន្ទាប់ពីការប្រកាសចេញនូវស្មាតហ្វូនជំនាន់ថ្មី Xiaomi’s 14 Series ទទួលបាននូវការគាំទ្រខ្លាំងពីសំណាក់អ្នកប្រើប្រាស់ជាច្រើននោះ នៅថ្ងៃនេះ ក្រុមហ៊ុនបច្ចេកវិទ្យាយក្សរបស់ចិនមួយនេះ បានចាប់ផ្តើមបន្តការបង្រឹងទៅលើស្មាតហ្វូនថ្នាក់ប្រណិតជំនាន់ថ្មីរបស់ខ្លួនម៉ូដែល Xiaomi 15 ន្ថែមទៀតហើយ ប៉ុន្តែមិនទាន់ច្បាស់ថា នឹងមានការប្រកាសចេញនៅលើទីផ្សារនៅឆ្នាំ 2024 នេះ ឬ យ៉ាងណានោះទេ។ ស្របពេលជាមួយគ្នានេះ ក៏មានការទម្លាយថា ស្មាតហ្វូនថ្មីនេះ ក៏នឹងមានការផ្លាស់ប្តូរការឌីស្សាញមួយចំនួនផងដែរ ជាពិសេសនោះ គឺការតម្លៃខ្ពស់ជាងមុន។

ថ្មីៗនេះ យោងតាមការទម្លាយចេញពីប្រភពជឿជាក់មួយដែលមានឈ្មោះថា Digital Chat Station ក៏បានបញ្ជាក់ពីការតម្លើងថ្លៃទៅលើស្មាតហ្វូនជំនាន់ថ្មីនេះដូចគ្នា។ សូមជំរាបថា ក្រុមហ៊ុន Xiaomi បានប្រកាសដាក់លក់ស្មាតហ្វូន Xiaomi 14 នៅលើទីផ្សារប្រទេសចិន ជាមួយតម្លៃ CNY 3,999 ($563) ទៅលើទំហំ 8GB+256GB។

ផ្អែកលើតម្លៃខាងលើនេះ មានការប៉ាន់ស្មានថា ស្មាតហ្វូនជំនាន់ថ្មី Xiaomi 15 អាចនឹងមានតម្លៃខ្ពស់ជាង $600 សម្រាប់ការដាក់លក់នៅលើទីផ្សារប្រទេសចិន។ ទាក់ទងជាមួយការតម្លើងថ្លៃនេះ គេនៅមិនទាន់មានការបញ្ជាក់ច្បាស់ថា មកពីអ្វីនោះទេ ខណៈដែលពាក្យចាមអារ៉ាមួយចំនួននិយាយថា អាចមកពីការប់ដែតទៅលើសមាសភាគថ្មី និងមុខងារប្រើប្រាស់ថ្មីៗ។

ប្រភពខាងលើនេះបន្តថា ស្មាតហ្វូន Xiaomi 15 អាចនឹងមានបំពាក់មកជាមួយនូវបន្ទះឈីប Snapdragon 8 Gen 4 ដែលជាបន្ទះឈីបជំនាន់ថ្មីរបស់ក្រុមហ៊ុន Qualcomm ហើយក៏មានការបញ្ជាក់ថា នេះគឺជាបន្ទះឈីបដែលមានការអាប់ដែរទោលើ Oryon CPU cores និងមានការពង្រឹងទៅលើ NPU ថែមទៀតផង។

ស្មាតហ្វូនជំនាន់ថ្មីនេះ នឹងមានការបំពាក់នូវអេក្រង់កម្រិតខ្ពស់ OLED CSOT LTPO មានសមត្ថភាពអាចបង្ហាញចេញបាន 1.5K ហើយថែមទាំងមានកម្រិតពន្លឺខ្ពស់ជាងមុនថែមទៀតផង។ បន្ថែមពីនេះ ស្មាតហ្វូននេះ ក៏នឹងមានការអាប់ដែតទៅលើម៉ូឌុលកាមេរ៉ា និងថ្មមានសមត្ថភាពខ្ពស់ និងកាន់បានយូរទៀតផង។ ផ្អែកលើការផ្លាស់ប្តូរទៅលើផ្នែកនានានេះហើយ ដែលធ្វើអោយស្មាតហ្វូននេះមានតម្លៃខ្ពស់ជាងមុន។